26th Sunday in Ordinary Time, Year C, Diocese of Sorsogon

          May debate an nagkapirang mga experto kan Biblia manungod sa cuento ni Cristo Jesús sa Evangelio sosog ki san Lucas capítulo 16.  Kun ini daw sarong cuento o ini sarong parábola sana, ta an saiyang estructura nagpapahiling kan sarong parábola pero an mga parábola ni Jesús daing mga pangaran pero an saro sa mga protagonista kan satong cuento nginaranan Lázaro.  Bako man importante para sa satuya ngonian kun ini cuento o parábola, ta an mensaje sa satuya iyo an más importante, mensaje na hihongohaon niato na isabuhay aroaldaw bilang mga discípulo ni Cristo.

          An mayaman sosog sa Lucas capítulo 16 naglangoy sa cuarta: siya sana an nakakagubing ki purpura na mahalunon kaitong panahon ta an pangkulay kaini hale pa sa mga frutas kan dagat na sinisisid asin únicamente an mga hade, mga príncipe asin mayayaman an nakakagubing kaini.  Siya sana an nagkakakan ki mga pinatabang baka asin manlaenlaen pa na mga exquisito na handa sa acompañamiento pa kan música asin mga musiquero.  Mantang an saiyang mga kamot, pagkatapos magkakan, linilinigan niya gamit an tinapay asin ini tinatapok niya sa mga ayam.  Si Lázaro gusto man lamang magkakan maski kan tinapay na sana.  Kan sinda nagadan, an mayaman sa infierno si Lázaro sa langit ta kun siisay an nagpasiramsiram sa buhay na ini na wara man lamang ginibo asin inihiras para sa iba pagdatong kan panahon siya man an magdudusa na wara man lang puedeng gibohon asin ihiras saiya an iba.

          Sa historia kan satong nación Filipinas ngonian madali niatong ma-identificar an mayaman ki Nápoles, sa mga senadores asin mga congresistas; sa mga gobernadores, mayores asin capitanes kan satong mga provincia, mga banwa asin mga barangay; sa mga mayaman, may mga puesto asin mga comerciante.  Asin bako kitang masasala para sa iba, ta kaipuhan man niato sabihon na dakul sainda an mga marahay asin napapakarhay man sa saindang buhay sa servicio sa Dios asin sa kapwa.  Aclarado na condenado an tawo bako dahil siya mayaman kun di dahil bako niyang ginibo an makakaya niya para makatabang ki Lázaro asin bako siya naghiras kan saiyang kayamanan.  Asin dahil dai pinangaranan an mayaman madali niatong mahiling digdi sinda na mga mayaman, sinda na may mga puesto, sinda na may mga poder.  Aclarado na condenado an tawo na nabubuhay sa kinaban na parang mayo ki ikaduwang buhay kun saen aanihon kan gabos kun ano an saindang sinabwag: infierno para sa maraot asin langit para sa marahay.

          Pero, kita?  Ako asin ika?  Ining mensaje para man kaya sa satuya?  Opo, opo asin opo.  Facil magtukdo sa iba, pero paghorophoropan niato an satuyang mga buhay asin gawe: ako daw maski dae mayaman, ako daw asal mayaman na mata-pobre; ako daw puro na lang kayaman an nasa isip asin puro na lang cuarta an hanap sa buhay sa paglimot man sa kapwa asin sa Dios; ako daw naghihiras sa diit na yaon sakuya o hinu-justificar ko an sakong bakong pagtabang sa pagsabi na dai man ako maski kaigwahon man maski diit (sabi baga daing sisay man an pobrehon na dai makakatao asin mayamanon na dai makakarecibe); ako daw tunay na ginigibo ko an gabos para makatabang sa iba na nangangaipo kan sakong panahon, talento asin tabang.

          Sa punto na ini asin finalmente dangogon niato liwat an mga tugon ni san Pablo ki Timóteo sa saiyang primerong surat sa saiya capítulo 6 asin an mga tugon kan Salmo 146: kun ano an yaon sato tinao kan Kagurangnan bako lang para sato kun di man para maihiras sa iba.  Amén.