28th Sunday in Ordinary Time, Year C, Sts. Peter and Paul Cathedral Parish, Sorsogon City

      

Mga tugang, ngonian na ika-veinte y ocho na Domingo kan Ordinaryong Panahon, iyo an satuyang paghorophoropan: ako daw sarong tawo na tatao magpasalamat; ako daw tatao magbalos ki karahayan kapalit sa karahayan; o ako daw una vez narecibi na hale sa Dios o hale sa kapwa an gracia, nalilingaw na asin ingrato na dai na pakiaram sa kagtao?

Sa Enot na Babasahon, ginono sa Ikaduwang libro kan mga Hade, capítulo 5, nadangog niato historia ni Naaman, sarong leproso na taga-Siria, kun pano siya binulong ni Yahweh sa paagi ni profeta Eliseo.  Asin sambit ni Naaman sa pagpasalamat, “Ngonian aram ko na dai nin ibang dios sa bilog na kinaban kundi an Dios nin Israel.  Ipinakikimaherak ko saimo na akoon mo ining dolo nin saimong surogoon.”  Sa karahayan hale sa Dios, si Naaman dai nalingaw magpasalamat asin dahil sa milagro na ini an saiyang pagtubod sa Tunay na Dios más naghararom asin nagboot siya na maski papano siya man makabalos sa Dios sa karahayan na saiyang narecibi.  Sa Salmo 98 an salmista minaawit, “Ipinahayag nin Kagurangnan an kaligtasan sa mga banwaan.”  Ini sarong pag-awit nin pagkilala sa kamurawayan kan Dios asin kan kaligtasan na hale Saiya.  An pagkilala saro man na forma kan salmista sa saiyang pagpasalamat.  Siring na kinikilala ni san Pablo sa saiyang Ikaduwang Surat ki Timoteo, capítulo 2, na si Jesucristo ilinigtas kita sa karatan pati sa karatan kan kagadanan.  Asin dahil sa dakulaon na gracia hale sa Dios, si san Pablo dai inirereklamo na siya nakakadenahan dahil sa pagbalangibog kan Tataramon nin Dios.  Naoogma pa ngani siya ta sa saiyang pagpasalamat sa ki Jesús, nagigibo niya ini bako lang sa paagi kan ngimot kundi man sa paagi kan saiyang pagsakit.  An pagsakit niya iyo an saiyang pagpasalamat.  Marhay pa sinda Naaman, an salmista, asin si san Pablo nagpasalamat sa Dios, ta an mga sampolong leproso sosog sa Evangelio na sinurat ni san Lucas, capítulo 17, saro sana sa sampolo an nagbalik asin nagpasalamat, asin siya pa ngani Samaritano, tradicional na kaiwal kan mga Judío, si Jesús Judío.  Nagbalik an Samaritano asin “(n)agdapa siya sa atubangan ni Jesus saka nagpasalamat.”  An saiyang pagdapa iyo an saiyang pagpasalamat.

          Sa Tagalog, siring man sa Bicol, an tataramon na salamat boot sabihon pagkilala sa karahayan na narecibi asin sa manlaenlaen na paagi pagbalos ki karahayan en cambio sa karahayan na natanggap.  Ini hale sa Arabo na tataramon, na boot sabihon, karahayan, integridad, na puede man boot sabihon karahayan ki salud o integridad sa buhay.  Asin ini man hale sa Hebreo na tataramon shalom, sa tulo na letra S, L asin M, na boot sabihon katoninongan.  Puede niato pag-isipon na an Filipino na kahulugan kan salamat boot sabihon sa karahayan na narecibi ko hale saimo, boot ko man na karahayan an maibalos ko saimo, ini man karahayan ki salud, integridad sa buhay o katoninongan saimong puso, familia asin comunidad.  Nasa naturaleza kan Filipino an magpasalamat sa paagi kan pagbalos ki karahayan kapalit ki karahayan, kaya ngani man sarong dakulaon na insulto para sa satuya na maturingan na ingrato.  Na dai tatao magbalos karahayan sa karahayan.  Ining pagbalos iyo man baga an namate niato sa mga nagpasalamat na sinda Naaman, an salmista asin an Samaritano.

          Sa punto na ini satuyang haputon giraray an satuyang mga sadiri: ako daw sarong tawo na tatao magpasalamat; ako daw tatao magbalos ki karahayan kapalit sa karahayan; o ako daw, una vez narecibi na hale sa Dios o hale sa kapwa an gracia, nalilingaw na asin ingrato na dai na pakiaram sa kagtao?

          Mga consideraciones practicas mga tugang antes niato tapuson ining paghorophorop.  Enot, an pagpasalamat bako lang tataramon kundi ini actitud asin gawe sa buhay.  Bako lang ini lip service, na pareho kan good morning o good afternoon nagigin bukambibig na sana.  Ini sarong modo de vida, sarong actitud sa buhay.  Kun arog kaini an satuyang pag-isip dai nanggad mangyayari na magigiromdoman lang niato an satuyang mama asin papa, ate asin kuya, mga katood kun may kaipuhan kita sainda.  Pati sa satuyang pamibi magigiromdoman niato sinda.  Pangaduwa, an pagpapasalamat nakakapaogma bako lang sa pinapasalamatan kundi man sa nagpapasalamat.  Tunay na bihirahon kita makahiling na pinapasalamatan na dai naoogma asin kan nagpapasalamat na mamundo an bayhon.  Normalmente an nagpapasalamat maogma man habang nagpapasalamat.  Kaogmahan an resulta kan pagpasalamat.  Asin pangatulo asin último, an pagsimba iyo an pinakahataas na pagpasalamat na puede niato maitao sa Dios. Sabi kan versículo 16 kan capítulo 17 kan Evangelio ni Lucas: καὶ ἔπεσεν ἐπὶ πρόσωπον παρὰ τοὺς πόδας αὐτοῦ εὐχαριστῶν αὐτῷ: καὶ αὐτὸς ἦν σαμαρίτης. Nagdapa siya sa atugangan ni Jesus saka nagpasalamat. An tawong ini Samaritano. An ginamit na tataramon na Griego para sa nagpasalamat iyo an εὐχαριστῶν. Saro pa na tawag sa Santa Misa iyo an eucharistia, Eukaristiya. Cada vez na kita nagsisimba kita nagpapasalamat sa Dios sa buhay na itinao, sa gabos na mga tawo na nakapalibot satuya, sa gabos na gracia na hale Saiya.

          Kagurangnan tawi ako kan puso na tatao magpasalamat asin tatao magdomdom magbalos kan karahayan sa karahayan na narecibi.  Amen.