24th Sunday in Ordinary Time, Year C

          An mga imagen na ipinapahiling kan Dios sa satuya sa mga Babasahon en modo especial sa Lucas capítulo 15 ngonian na Domingo iyo an mga minasunod: imagen kan sarong pastor na binabayaan an noventa y nueve na mga carnero para hanapon an saro na carnero na nawara; imagen kan sarong babae na hinanap hanggang sa makua an sarong pedazo nin cuarta; asin imagen kan sarong ama na maski na ngani dai iginalang kan saiyang aki yaon pa man giraray sa paghalat kan pagbalik kaini asin sa pagtanggap kaini sa saiyang harong na bagan dai nangyari.  Iyo ini an mga imagen kan Dios, an mga pagpapakilala Niya mismo sa satuya, kun siisay Siya, hale mismo sa ngimot ni Jesús, Dios Aki, asin kita nag-oomaw asin nagpapasalamat sa Dios ta Siya mamomoton asin maheherakon, siring sa pangadyie kan Salmo 50.  Siring man sosog sa mga imagen na ini iyo man an mga ini an agyat sa satuya: siring na an Dios arog kaiyan, kita man lugod arogon Siya sa pagigin marahay na pastor, maigot na babae, asin mamomoton asin maheherakon na ama.

          Poon kan si Adán asin si Eva nagkasala an realidad kan kasalan yaon sa cada saro sa satuya, asin sa cada momento kan satong buhay poon kan kita nagpoon magmangno hasta sa punto na dai na kita nagmamangno ta gadan na.  Sa panahon ni Moisés, sosog sa Éxodos capítulo 32, an mga Israelita yaon na sa directa experiencia ki Yahweh pero yaon pa man giraray an saindang pagkasala.  Bakong garantía an proximidad, an pagkaharani sa banal para an saro magin banal.  Lalo na ngani más hinihingoha kan maraot na an mga banal malugmok sa kasalan: kun haen an devoción yaon an tentación, olay kan kadonongan kan mga kagurangan.  An buhay ni san Pablo puede niatong sabihon na satong buhay man.  Hapot ni san Pablo sa sadiri asin maski kita aram niato an kasimbagan: kay nano ginigibo ko an habo ko gibohon, asin kay nano bako ko ginigibo an mga gusto kong gibohon.  Tunay na maluya an tawo asin sa Dios sana siya magsarig asin sa Saiya lang siya magigin makusog.

          Maski na kita mga parakasala, asin paulit-ulit niato an Dios tinatalikudan asin tinutumang, Siya dai nagsasawa na mag-acudir satuya.  Handa pa ngani siya bayaan an noventa y nueve iligtas sana an saro ta cada saro satuya especial sa saiyang mga mata.  Si Cristo magpapapako sa Cruz maski para sa saro sana satuya.  Handa siyang gibohon an gabos para makua niya liwat kita: masulo ki lampada asin haloghogon an bilog na harong para makua lang an cuarta asin kita más especial pa que sa cuarta.  Handa siyang limoton an gabos asin ibalik kita sa dati niatong estado na bagan dae nangyari: ibinabalik niya an satong singsing, an mga zapatos, asin an gubing, asin yaon an pinatabang baka sa celebración kan satong pagbalik saiya ta Siya an satong Ama, asin kita saiyang aki.  Patawada kami Ama sa gabos niamong mga kasalan asin dakulaon an samong pasasalamat ta Ika mamomoton asin maheherakon.

          Ngonian Ama, kami man maghihingoha sa buhay, na siring na Ika mamomoton asin maheherakon, kami man maghihingoha, maski mapagal asin kun minsan bagan imposible, pero kami man maghihingoha na magin mamomoton asin maheherakon.  Mag-iintiendi, magpapatawad, makikipag-ulian sa iba.  Sosog sa saimong ejemplo, hihingohaon mi ini.  Amen.