23rd Sunday in Ordinary Time, Year C

Mga Babasahon: Kadonongan 9:13-18; Salmo 90:3-4.5-6.12-13.14-17; Filemon 9:10.12-17; Lucas 14:25-33

          Mga hapot kan Kadonongan capítulo 9: Siisay an nakakasabot kan hatol nin Dios?  Siisay an nakakaisi kan kabotan nin Kagurangnan?  Dagdag pa na mga kahapotan: Masakit niatong maukudan kun ano an nasa daga; masakit niatong makua kun ano an uya sa satuya, alagad siisay an makakaaram kun ano an nasa langit?  Dapit sa saimong kaisipan, siisay an makakasabot kaiyan, kun dai mo tawan nin danonongan asin ipadara saiya an saimong banal na Espiritu hale sa langit?

          Tunay na may mga difícil na mensaje an Kagurangnan Dios sa satuya.  Papano niato sasaboton an satuyang mga nadangog sa Lucas capítulo 14: An magdolok sako dai magigin disipulo ko kun orog na namomotan niya ki sa sako an saiyang ama, ina, agom, mga aki, mga tugang, asin an sadiri niyang buhay.  Sabi pa ni Jesús Kagurangnan: Siring man, an dai saindo magbaya kan gabos na sadiri niya, dai magigin disipulo ko.

          Difícil man a veces an mensaje kan Kagurangnan dai kita ki duda na an saiyang mga mensaje iyo an Tataramon ki Buhay para sa satuya siring na an Eucaristía Pagkakan ki Buhay para sa gabos asin siring na an Dios Kagurangnan iyo an Kadonongan mismo asin Siya an Dalan, an Katotoohan asin an Buhay.  Kaya siring sa voto de confianza kan Salmo 90 kita man minapahayag sa Dios asin sa satuyang kapwa na: Sa gabos na panahon, Kagurangnan, Ika an samuyang paalawan.

          Entonces, balik kita sa mensaje asin satuyang paghorophoropan kun ano an boot sabihon kaini para sa satuya ngonian na panahon.  Ini an sakong napaghorophoropan asin bahala na po kamo magpayaman kaini sa saindo man sana o más marhay pa kaiba an saindong mga namomotan sa buhay, siring na an Domingo baga aldaw man kan familia.  Marahayrahay an sarong familia na naghihinanyog asin naghohorophorop sa Tataramon nin Dios bilang tunay na sarong familia.

          Sa guía kan Filemon capítulo 9, puedeng niatong isipon na an Kadonongan kan Dios tunay na binabaliktad kun minsan an kadonongan kan tawo.  Natural sa tawo an may mga sadiri, asin dahil sa satuyang substancia nagrarahay an satong buhay material asin nakakatabang kita sa satong kapwa.  Pero dakul na veces an satuyang sadiri sinasadiri na kita, asin bako na kita an kagsadiri, kun di an satuyang sadiri iyo na an kagsadiri sa satuya.  Nag-aabot an tawo sa punto na an dios-diosan niya iyo na an cuarta, an harong, an coche, an daga, asin kun anano pa na bagay.  Bako na control kan tawo an sadiri manungod sa mga bagay na ini, kun di an bagay na an may control sa tawo.  Nagdadatong an punto kun saen cerrado na an tawo sa Dios asin sa kapwa, minsan patin sa saiyang sadiri, asin ginigibo na lang niya an gabos para más magdakul an cuara, más magdakula an harong, más maggayon an coche, más maging productivo an daga, asin kun ano pa man.  Sa puntong ini, tunay na masasabi niato kaiba kan Kadononga capítulo 9 na: (A)n dai saindo magbaya kan gabos na sadiri niya, dai magigin disipulo ko.

          Nangyayari mga tugang na hinahale kan Dios an gabos sa tawo, gabos na saiyang substancia, minsan bakong gabos kun di parte kaini, asin nag-e-efecto ini ki kadipisilan asin pagdusa sa satuya.  Pero kun tunay na iisipon ini gabos sa ilaw kan pagtubod, pag rendir cuenta, para ini gabos sa satuyang karahayan, asin sa kataposan ining kadipisilan asin pagdusa ta hinale kan Dios an satong mga rogaring iyo lugod an nakakaligtas sa satuya.  Binabalik kita kan Dios sa satuyang sadiri asin kita giraray an may sadiri, asin sa horas kan pagbalik Niya giraray kan satuyang mga rogaring asin substancia sa satuya nagigiromdoman na niato na kita an kagsadiri, asin bako an mga bagay an may kagsadiri sa satuya.  O más marhay, an Dios an Kaggibo asin Kagtao, Siya an tunay na Kagsadiri.  Hinahale kan Kagurangn kung ano igwa kita para tawan kita Niya ki más pa que kung ano igwa kita.  Binabawi kan Kagurangnan an cuarta, an harong, an coche, an daga, asin kun ano pa man, para tawan kita ki más pa kan mga bagay na ini na nawawara, nararaot, nababaha, nahahab-as kan iba, asin últimamente nalalapa.  Binabawi kan Dios an gabos, an mga ini man ngani nalalapa, asin tinatawan Niya kita ki buhay na daing kasagkoran.

          Kaya mga tugang sa ika-23 na Domingo na ini, ini an satuyang pamibi, sarong pamibi na ginibo na sa kanta, kaya sa kanta na ini mamibi kita: kunin mo o Dios, at tanggapin mo: ang aking kalayaan, ang aking kalooban, isip at gunita ko, lahat ng hawak ko, ang loob ko, ay aking alay sa’Yo.  Bawia ini gabos Kagurangnan, gabos na yaon sakuya, gabos na ako, asin dai kami ibang minamawot kun di Ika.  Amen.