An mensaje kan Dios sa satuya ngonian mga tugang, mga discípulos
ni Cristo, ngonian na ika-22 na Domingo kan Tiempo Ordinario, iyo an kapakumbabaan. Sa Libro ni Sirac capítulo 3 nadangog niato
an minasunod: Kun ika orog na dakula orog
ka man magpakumbaba, tanganing magkamit kan in biyaya sa atubang nin
Kagurangnan. Kinakanta man kan Salmo
68 na: Harong na eerokan itinatao nin
Dios sa mga dukha, an mga nabibilanggo saiyang iliniligtas, alagad an mga
masombikal mag-eerok sa alang na daga.
An mga dukha, an mga dukha sa espíritu iyo an inilalangkaw ni Jesús
Kagurangnan sa Saiyang Sermon kan mga Paladan asin an mga masombikal, an mga
mapaabawabaw iyo man an Saiyang binababa, siring man sa Kanta ni Mama María
kaiba an pinsan niyang si Isabel, kantang nadadangog niato durante Fiesta kan
Visitación. Sa Surat sa mga Hebreo
capítulo 12 nadangog man niato an
minasunod: Nagdolok kamo sa katiriponan
kan mga panganay nin Dios na an mga ngaran nasusurat sa langit. An mga banal iyo an mga orog na pinapalangkaw
kan Dios ta iyo sinda an orog na nagpakumbaba sa sadiri sa atubang kan Dios
asin kapwa. Asin sa Evangelio sosog ki
Lucas capítulo 14 clarado asin duda na kapakubabaan iyo man nanggad an tunay na
mensaje ni Cristo sa mga Cristiano: Huli
ta an siisay man na nagpapakumbaba, ilalangkaw. Siring man: Kun magbangkete ka, alokon mo an mga dukha, mga kimay, mga pilay asin
mga buta. Paladan kan Dios an mga
simple asin humilde, asin sinasadol niya kita gabos na magin generoso asin
mapagmangno sa mga simple asin humilde.
Ngonian paghorophoropan niato an kapakumbabaan. Kun sososogon
niato an tataramon mismo na kapakumbabaan, makukua niato an tataramon na
baba. Bakong hababa sa pagtindog, ta
bako boot sabihon hababa na automático na mga mapakumbaba ta igwa man ki mga
hababa na mapaabawabaw, minsan ngani kan mga aki pa kita más hababa kita asin
más mapakumbaba kita, siring man na may mga aki na nahihilingan na niato an
pagigin mapabawabaw lalo na dahil nahihiling an mga mal ejemplo kan mga
nakakagurang. Más masososog ta an kadonongan
kan tataramon na Bikol na hababa bakong sa pagtindog na hababa kun di sa boot,
sa laog kan kabotan na hababa. Na
hinihiling an sadiri na hababa, bakong dahil maluya an boot ta may mga kilala
kitang mga banal asin yaon man an mga paladan na hababa an hiling sa sadiri
bilang mga parakasala asin nagkasala, pero mahihiling niato asin mababasa niato
sa talambuhay ninda na daing ibang más makusog pa an boot que sa sainda, sinda
na nakilaban contra sa karatan, contra sa demonio, contra sa mundo, sinda na
nagin misionero sa manlaenlaen na lugar, asin hasta nagadan para sa Dios na
saindang tinutubudan sa buhay hanggang sa kagadanan. An kapakumbabaan yaon sa laog kan boot, sa
paghiling sa sadiri na hababa, ta iyo man nanggad an katotoohan, na kita hababa
ta kita mga aki kan Dios, na di hamak nakakapalangkay sato, asin kita hababa ta
kita mga nagkasala. Sa katotoohan
makukua an kapakubabaan. Una vez
makilala niato an satong sadiri, bilang tunay na kita na daing pagsaginsagin,
asin makilala niato an Dios na bilang Siya, tunay na mahihiling niato asin mamamangno
kun gano tunay na kita hababa asin makaoolok an satong kapaabawabawan.
Uya mga tugang an mga nagkapirang mga punto práctico na puede
niato idagdag sa satuyang mga paghorohorop ngonian na Domingo, bilang solo o
kaiba an satong familia atchan pagkarakan o sa iba pang oportunidad kan
sagradong aldaw na ini. Enot, sa satong
mga paghingoha sa trabajo, sa escuela asin sa business, kapakumbabaan an paghingoha sa karahayan asin paglikay sa
sala, asin paghingoha hanggan maabot an pinakatoktok niato kun anano man an
satuyang ginigibo na dae natutumakan an iba.
Bakong kapaabawabawan ihambog an naabot sa buhay ta señal ini na
ginigibo niato ki marhay an marhay asin marhay an satong ginigibo kun
maihahambog niato ini sa iba. Dahil baga
kun nagtatakas ka sa trabajo dae mo maihahambok an promotion na puede man giraray itao saimo. Dahil kun nagcocodigo ka sa mga exámenes dae
mo maihahambog na first honor
ka. Asin kun nagdadaya ka sa negocio mo
dae mo maihahambog an saimong pagyaman.
Kapakumbabaan iyo man an paggamit kan saimong mga karahayan sa buhay an
pagpasalamat sa Kagurangnan na iyo an kagtao kan gabos sa paagi kan paghiras mo
kaini sa mga kapwa mo daing pinapalad o mga nangangaipo. Pangaduwa, kapakumbabaan an pagtanggap sa mga
puna o corrección na sa pagkamoot itinatao saimo kan saimong tugang, minsan sa
bakong tamang paagi. Magpasalamat sa
saiyang pagmangno sa saimo asin in vez na tamuyawon siya ta nakulugan ka dahil
sala na palan an ginigibo mo, magpasalamat asin más lalo magdakula an pagkamoot
sa nag-corregir saimo ta dae mo aram minsan dakulon na pagsakit an inagi niya
bago ka makoreksyonan asin magpasalamat ta may nagmamangno saimo ta makaheherak
an tawong dae na minamangno kan kapwa, asin magpasalamat ta rinarayo ka niya sa
demonio asin rinarani ka niya sa Dios.
Pangtolo asin último, kapakumbabaan an pagkumpisal sa padi sa
confesionario, digdi sa Catedral paladan kita ta igwa kita ki saro asin lugod
madagdagan iyan, asin paladan man kita sa Catedral ta cada Sabado después la
Misa, igwa kita ki confesión regular. Sa
satong pagkakasala, sa satong pag-acusar sa sadiri sa atubang kan Dios sa
atubang kan padi, pinapahiling niato sa Dios an satong puso na mapakumbaba, an
tunay na kita. Mapakumbaba an sarong
tawo na tatao maghagad kapatawaran asin mapaabawabaw an sarong tawo na nunca
tatao maghagad ki kapatawaran. Dae na
maghulat sa ultimong hinangos bago magrani sa Dios, puedeng dai ni ki panahon
asin antes kita nakahagad tawad, hinagad na kan Dios an satong buhay. Kapakumbabaan man an pagigin pirmi preparado.
Mamibi kita mga tugang: Kagurangnan
tawi ako ki puso na mapakumbaba, puso na nahihiling an katotoohan, si tunay na
ako, aki Mo asin parakasala sa atubang mo.
Kun ako mapaabawabaw ibaba ako.
Kun ako nagpapadakula sa sadiri giboha akong sadit sa atubang mo. Ta iyo man nanggad ako aki mo asin ika Ama
ko. Amen.
Walang komento:
Mag-post ng isang Komento