19th Sunday Ordinary Time Year C

Ika-19 na Domingo kan Ordinaryong Panahon, Taon C

          Si Abraham, sosog sa namate niato sa Ikaduwang Babasahon sa mga Hebreo, tunay na ejemplo kan pagtubod.  Marhay na an saiyang buhay sa Ur kan Caldei pero sa invitación kan Kagurangyan Yahweh binayaan niya an gabos asin nagpaduman sa Tierra Promesa.  Binayaan ni Abraham an saiyang mga namomotan asin mga rogaring asin nagsunod sa togon niYahweh paduman sa daing kasiguraduhan asin daing garantía ta nagtubod siya sa tataramon kan Saro sanang Dios.  Pagtubod an naging energía niya, an saiyang kusog, sa pagsunod sa kagustuhan kan Kagurangnan.  Iyo man si Sarah, ejemplo man para sa satuyang pagtubod, minsan may diit na pag-duda, yaon giraray an pagtubod niya sa Kagurangnan Yahweh na siya magigin ina kan dakulong na mga naciones maski na ngani sinda ni Abraham gurang na asin siya bawas pa.  Sinda man na duwa nahadlok kun ano an mangyayari sa saindang futuro, pero an an saindang pagtubod an nagpahiling sainda asin nagpamate kan mga bagay-bagay na dai pa man ngani ninda na-e-eksperyensyahan.  Lalong lalo na siguro kun namate na ninda an Marhay na Bareta na iyo si Cristo Jesús, Dios nani-tawo, nagadan asin nabuhay liwat para sato.

          Sa mga panahon tang ini dakulon man an mga Abraham asin mga Sarah.  May isad na abogado, dakulaon an saiyang suceso asin dakulon an saiyang kayamanan.  Marhay siya sa abogacía pero an saiyang mga método bakong matanos.  Bako niya hinihiling kun inocente o may sala an cliente, kun di hinihiling niya kun makabayad ini ki dakula o dai.  Pinapagana niya gabos gamit an cuarta.  Naghahagad ki quinientos mil asin tres cientos mil sana an itatao sa juzgado.  Naghahagad ki dos cientos mil maski na ngani dai man naghahagad ki lagay an juzgado.  Matabaon an saiyang bulsa pero an puso niya daing laman.  Pag-uli niya sa harong sa saiyang agom asin tolong aki sinda tururog na.  Dakul na veces hubog pa siya asin hale sa mga inoman na may mga kababayihan pa.  Paghale man kan mga aki niya para sa escuela sa aga, turog pa siya.  Mayaman man siya sa mga harong asin sa coche, dai man siya naging ama sa mga kaakian niya asin dai siya naging marhay na agom.  Hanggang namate niya asin nadangog an Tataramon kan Mahal na Dios asin nakilala mismo si Cristo Jesús, na nagligtas saiya.  Dai man en seguida, ta saro man ini na proceso asin paglakaw, pero padiit-diit tinama kan abogadong ini an saiyang buhay asin an Dios na an sinunod niya dai na an cuarta.  An familia na an inasikaso niya dai na an suceso asin mga kasiraman sa buhay.  Nagtubod siya asin ining pagtubod sinunod niya, isinabuhay niya siring ki Abraham asin Sarah.  Dai man masyado laman an saiyang bulsa ngonian, igwa man siya ki tama sana para sa familia niya.  Asin sa kagurangan nindang mag-agom ngonian tinaw-an pa sinda, siya asin saiyang agom, ki sarong aki pa.  Tinawan man siya ki saro pang oportunidad para magin tunay na ama asin agom asin pinamate man saiya kan Dios an consolación kan sarong tunay na familia na nagkakaminootan.

          Marahay-rahay mga tugan an mensaje kan Dios satuya gabos ngonian na ika-diecinueve na Domingao kan Tiempo Ordinario.  Marahay-rahay na hapot ini satuya ni Jesús na puede niatong paghorop-horopan ngonian na aldaw kan Kagurangnan.  Ako daw igwa ki pagtubod?  Tunay na pagtubod, bako lang dahil sa Bonyag, o dahil sa tradición kan sakong mga magurang o mga lolo asin lola, tunay kaya na pagtubod an yaon sa sakuyang buhay?  Ini daw na pagtubod bako lang sa sakong isip bilang idea o hinihinguha ko daw na masaromsom sa sakong puso, asin mahiling sa sakong buhay?  O nahahadlok kaya ako magin tunay na paratubod?  Kaya ko kaya talikdan gabos, cuarta, poder, suceso asin patin sakuyang confort asin mga kasiraman sa buhay para an Dios lang asin daing iba an sakuyang sunudon sa buhay?

          Kagurangnan, mamibi kita sa Dios kaiba an satuyang mga namomotan sa buhay ngonian na Domingo, tawi ako, tawi kami ki kusog na sundon an tunay na Kadonongan, an kabuahan para sa iba, na talikdan an mga confort asin kasiraman kaining buhay sin Ika sana an pagsundon.  Tawi kami ki kusog na mag-decisión contra sa corrupción, contra sa mga kasalan, contra sa nakagawian maski gabos ini sabi kan iba ok lang, o ginigibo ini kan kadaklan.  Giboha kaming magin parejo ninda Abraham asin Sarah na an Yahweh Kagurangnan sana an dangogon sa buhay.  Hare lugod niamo malingawan an mga promesa kan kami binonyagan, asin isabuhay niamo an mga agyat ni Cristo Kagurangnan.  Pakusoga an samong pagtubod Saiya na iyo sana an tunay na makakatao samuya ki kaogmahan asin kaligtasan.  Amen.