20th Sunday in Ordinary Time, Year C

An satuyang Evangelio ngonian na ika-veinte na Domingo kan Tiempo Ordinario ginono sa sinurat ni san Lucas capitulo12.  Ini puedeng a la primera vista makangangalas na maghale sa ngimot kan satong Kagurangnan si Jesucristo.  Siya iyo baga an Hade kan Katoninongan, siring man sa rokyaw kan mga ángeles sa pastores sa Bethlehem poon pa Siya namundag.  Katoninongan man an satuyang hinahagad sa Saiya cada vez na kita igwa ki dificultad sa satuyang buhay.  Asin Katoninongan na gikan man sa Dios an satuyang minamaw-ot bako lang para sa satuya lalong lalo na sa satuyang mga namomot-an sa buhay.  Entonces, ano kaya an boot sabihon kan sulo na ini, kan kalayo na ini na gusto ni Jesús lumaganap na sa bilog na kinaban, ano kaya an pagsuruhay na ini na dinadara niya sa cada harong, sa cada tawo?

Sa Primerong Babasahon na ginono sa Libro ni Jeremias, capitulo 38, namate niato kun papaano an buhay kan sarong profeta na tunay na hinihingoha an saiyang ministerio bilang voz de Dios, nabubuhay sa sarong difícil na situación.  Dahil sinasabi niya asin ginigibo niya an boot na sabihon asin gibohon niya kan Kagurangnan, an katawohan, na napa-fastidio asin nabubulabog kan saiyang mensaje, kan mensaje kan Dios, boot si Jeremias ipagadan.  Iyo man baga an ginigibo kan mundo ngonian sa mga moderno na mga profeta.  Dakulon na mga tugang niato na nasa radio asin periódico ginagadan.  Dakulon na mga tugang niato na mga kapadian asin kamadrehan an kinakaag sa dificil na situación para mapahilom sana kan mga tawong may ginigibong karatan asin may ginigibong contra sa saindang consciencia.  Sinda na ginagadan an saindang consciencia ginagadan man an mga profeta na ini na nagigin consciencia ninda.  Siring na si Juan Bautisto ginadan ni hadeng Herodes pag-instigar man ni Herodías sa paagi kan aki niya na si Salome.  Kita mismo, cada vez na hinihingoha niato na isabuhay an satuyang promesa kan kita binonyagan bilang mga profeta, kita an napapabutang sa maraot asin kita an nagdudusa dahil sa katotoohan asin karahayan.  An pagiging profeta boot sabihon an pagsabi asin paghingoha na mabuhay sa katotoohan, asin dahil habo ini kan iba nagigin difícil asin minsan yaon an pagpagadan sa sarong profeta.

Minsan ngani arog kaini ka-difícil an satuyang ministerio, an satuyang servicio sa katotoohan, pinapagiromdom kita asin pinapakusog an satuyang mga boot asin mga puso kan Ikaduwang Babasahon na ginono sa Surat sa mga Hebreo, capitulo 12.  Sige sana kita, sabi kan surat na ini, sige sana kita sa pagdalagan sa daralagan na ini.  Sige sana kita sa paghingoha sa karahayan asin katotoohan.  Sabi ngani kan moto na nababasa niato sa may Camp Escudero sa atubang kan Sorsogon Shopping Center: Magin honesto, maski an iba laen, maski an iba habo, maski an iba laen puede.  Makakakua man kita ki mga ejemplo asin inspiración sa mga kadakul na mga banal asin paladan na yaon sa Simbahan asin yaon nakapalibot sa satuya.

Kaya ngonian mas aclarado sa satuya an mensaje ni Jesús, Hade kan tunay na Katoninongan asin tunay na Katotoohan, sa Evangelio ginono ki san Lucas na nadangog niato kanina.  An kalayo na ini iyo an katotoohan na gikan ki Cristo an Katotoohan.  Sabi man nanggad Niya mismo: Siya an Dalan, an Buhay asin an Katotoohan.  Sinusunog kaini an mga kabuwaan sa mundo asin sa satuyang buhay asin an natatada iyo an tunay na kita, iyo an mga tunay na nasa mundo na nakakatabang sa gabos.  Magpamibi kita na sunugon niya an gabos na kabuwaan sa satuyang buhay, asin sunugon niya an gabos na dai importante na mga bagay-bagay na disturbo sana sa satuyang pagpabanal.  Sa paagi sana na ini tunay na mabubuhay kita sa katotoohan asin sa katoninongan.  Ta an totoo sana an nagpapatoninong asin an buwa dai nakakapatorog sa tawo.

An pag-iriwal na ini, ining división, an pagsuruhay na ini, boot sabihon ni Jesús sa satuya na bulabogon niato an satuyang mga nakasanayan na puedeng bako na natutugma sa satuyang identidad bilang mga Cristiano Catolico, mga aki kan Dios.  Tunay na makakaiwal niato an mundo, an sociedad, an comunidad, an familia, an satuyang sadiri ta an paghingoha sa karahayan asin paglaban sa karatan dakul na veces pagdalagan contra corriente, pagsagupa sa baliktad na pagdalagan kan kadakul na tawo ngonian sa kinaban na ginigibo na tama an sala.  Dakul na veces an paghingoha sa kabanalan iyo an paglangoy contra corriente, pagsagupa sa mundo na boot sana an kasiraman asin an fácil maski sala na.  Sabi ngani ni Papa Francisco sa mga kabataan kan nakalihis na Jornada Mundial de la Juventud, kan nakalihis na World Youth Day, bulabogon niato an satuyang mga diócesis, an satuyang mga parroquia, an satuyang mga comunidad, an satuyang mga familia, an satuyang mga sadiri, asin haleon sa satuyang buhay an mga nakasanayan na mga ugali o mga gibo na contra palan sa tunay na pagtubod asin sa tunay na pagigin Cristiano.  Haleon niato sa satuyang buhay an mga maraot na mga gawe asin mga maraot na mga pag-iisip para tunay na maabot niato an Katotoohan asin Katoninongan na iyo man nanggad an tunay na maw-ot niato sa buhay.

Sa paagi kan kalayo asin división, sa paagi kan katotoohan asin katoninongan, diyan kita makakaabot sa buhay na daing kasagkoran.  Amen.