21st Sunday Ordinary Time Year C

          Kagurangnan, dikit daw sana an makakaligtas?  Nagsimbag si Jesus, “Maghingowa kamong makalaog sa hayakpit na pintoan…”  Sa hapot na ini, bakong sinimbag kan Kagurangnan sa paagi na puede niatong pag-isipon na gusto kan naghapot.  May mga hapot kita asin an Kagurangnan gusto ipaabot satuya na bakong importante an iba niatong mga kahapotan, o más marhay sabihon may más importante pa na mga kahapotan que sa dikit sana? o siisay? o san-o?  Orog na más importanteng maaraman niato kun papaano makalaog sa Kahadean Niya.  An kasimbagan digdi puedeng magdara satuya sa acción sa satuyang buhay asin bako lang sa pagpuno sa curiosidad na iyo sana an nagiginibuhan kan mga enot na mga hapot.  Minsan man naghahapot kita asin bagan daing kasimbagan.  Tibaad sala an satong hapot, o más may importante pa dyan na mga kahapotan na kaipuhan iyo palan an satuyang hinahapot, o sinisimbag na palan kita kan Dios pero iba man an satuyang hapot.

          Maghingowa kamong makalaog sa hayakpit na pintoan; huli ta sinasabihan ko kamo na dakul an maghihingowang maglaog diyan alagad dai makakalaog.  Tunay man nanggad na nagkapira an mga hayakpit na pintoan an dapat niatong laogan sa satuyang buhay, nagpopoon pa sana kita, o yaon na kita sa butnga kan buhay o patapos na an satuyang paglakaw pasiring sa langit.  Bakong automático an satuyang kaligtasan, na dahil Bonyag asin Kumpil kita asin nag Primera Comunión, kita sigurado na an langit sa satuya asin maski dai na kita maghingoha ki gurano pa man.  Aroaldaw an paghingoha para sa pagsakat sa langit.  Bakong sararoan na decisión kun di paulit-ulit na opo sa Kagurangnan asin paulit-ulit na pagsayuma sa sadiri, sa mundo asin sa tentación.  Bakong fácil maglaog asin bakong garantizado sa gabos na nagpopoon na gabos makakatapos.  Mag-aarabot an mga punto kun saen makakamate kita ki kahugakan, pagkadismaya, kawaraan ki gana o kun anano pa na kaulangan.  An importante padagos sana sa paghingoha lalong lalo na aram ta niato na an gracia kan Dios yaon pirmi sa mga nagtatabang sa saindang sadiri sa kaayadan.

          “Kun sarahan na kan kagharong an pintoan, kamong mga nagtitindog sa luwas mapoon pagtoktok asin pag-apod, ‘Kagurangnan, buksan mo man kami!’  Alagad masimbag siya saindo, ‘Dai ko aram kun mga taga-saen kamo!’  Dangan masimbag kamo, ‘Kaiba mo kaming nagkakan saka nag-inom; nagtukdo kas sa banwaan mi!’ Alagad masimbag siya, ‘Sinabi ko nang dai ko aram kun mga taga-saen kamo!  Hale kamo diyan, mga paragibo nin maraot!’  Bakong suficiente na yaon kita sa pagdangog sa Tataramon kan Mahal na Dios kun sa buhay paragibo kita nin maraot, kaipuhan na maghingoha na isapuso asin isabuhay an mga nadangog.  Dakulon an mga nakakadangog pero diit sana an nakakamate.  Dakulon an nakakaaram kan mensaje pero diit sana an nakakaintiendi.  Dai nahihiling sa gibo an mga naaadman na karahayan asin padagos sana sa karatan.  Kita man na nagrerecibe kan Hawak asin Dugo ni Cristo minsan bako ini para sa satuyang kaligtasan kun di para sa satuya mismong karaotan kun an gracia kan Santa Misa nababalewala sa buhay niato pagtapos kan Misa, sa laog kan harong o kan oficina, sa familia o sa trabajo o sa sociedad.

          Kagurangnan, namimibi kami, lugod danay kaming makiolay Saimo aroaldaw sa Pagpangadyi asin maadman mi an mga tunay na kahapotan asin mamatean mi hale Saimo an mga importante na mga kasimbagan na ma-i-a-aplicar mi sa samuyang pang-oroaldaw na paghingoha.   Kagurangnan, tabangi kamong danay na maglaog sa mga hayakpit na mga pintoan na iyo sana an makakaparani samuya Saimo asin tabangi man kaming sikwalon an mga fácil pero mga salang gawe, actitud asin estilo kan buhay na nakakapaharayo ugaring samo Saimo.  Asin Kagurangnan, tabangi kaming nagdadangog kan Saimong Tataramon asin nagkakakan kan Saimong Hawak asin Dugo, na ini lugod gabos tunay na makatabang samo para makaabot sa buhay na daing kasagkoran.  Amen.