Pentecost Sunday Year C

          Ngonian na Domingo kan Pentecostes, ginigiromdom niato an paghilig kan Espiritu Santo sa Mahal na Ina na si María asin sa mga Apóstoles.  Si Jesu Cristo, Dio asin Tawo, Paraligtas, ipinadara kan Ama sa daga asin ipinangidam ki María, nagdakula sa harong ni José, nag-trabajo, nabuhay siring sa sarong Aki kan Tawo.  Si Jesús nani-tawo sa gabos fuera sa kasalan.  Siya nagbalangibog kan Marhay na Bareta na an Kahadean kan Dios nagdatong.  Magtubod an gabos Saiya asin gabos maliligtas.  Siya nagsakit, nagadan, ilinubong, nabuhay-liwat, suminakat sa langit asin nagtutukaw sa too kan Dios Amang Makakamhan.  Mabalik sa paghukom sa mga buhay asin sa mga gadan.  Siya man kaiba an Ama nagpadara kan Espiritu Santo nganing ini an magpano kan mga kulang pa, mag-perfecto kan mga imperfecto pa, magpakusog sa mga nangluluya, magpahirahay sa mga nararaot, mag-guia giraray sa mga nawawara, magtao nin buhay sa mga nagagadan.  An Ama, Kaglalang, sinugo an Aki, Kagtubos, asin Sinda ngonian sinusugo an Espiritu Santo, burabod kan Buhay asin Gracia.

          Salamat sa Espíritu Santo an kinaban nataw-an ki tunay asin panibag-ong buhay.  Binabag-o kan Espíritu an gabos na linalang tanganing sinda bakong para sa sainda man sana kun di para sa gabos asin últimamente para sa Dios.  Tinataw-an kan Espiritu an gabos nin paniba-ong dimensión, panibag-ong perspectiva, kun saen kita gabos bako lang para sa ibabaw kan daga kun di lalong lalo na para sa kaitaasan.

An Espíritu Santo an nagtuklang sa mga Cristiano na atamanon asin pagsungkuon an mga naghehelang kaya ngani baga an Simbahan iyo an nagpoon asin nag-fundar kan mga hospital.  Mga lugar kun saen an mga may helang tinatrato ki marhay, pinapakakan, ginugubingan, tinataw-an ki atop, ki amor asin respecto ta sa sainda nahihiling kan mga Cristiano si Cristo na nagsasakit sa Cruz.  An Espiritu an nagtuklang sa mga Cristiano na pakakanon an isip kan kaaraman asin pakusugon an isip kan kadonongan sa paagi kan mga manlaen-laen na paagi aisn instituciones ki educacion kaya baga an Simbahan an nag-fundar kan mga escuelas asin universidades.  Mga lugar kun saen an isip pinapabasog, an mga espiritu na napapapaha pinapainom, asin an ignorancia winawarak kan ilaw kan Espíritu mismo, gabos para sa karahayan kan kagabsan.  An Espíritu an nagtutuklang sa mga Cristiano na kilalahon sa cada miembro kan sociedad an saiyang mga kamanghod, magbabayi man o maglalaki, magbata man o gurang, mag may helang man o nasa karahayan, mag mayaman man o dukha.  Pinagsasaro kan Espíritu an mga nasisiway asin an ulo kan tawo kinakabit niya sa puso kaini.  Tunay na sa Espíritu kita nagngingisi sa cada saro, nagtatabang sa cada saro minsan ngani dai pa magkamiridbid, mas nagigin marahay-rahay an buhay sa sarong comunidad.

          Namomot-an kong mga tugang na mga Cristiano Católico cuidado kita sa panahon ta ngonian kun saen an sociedad napapano na kan mga tawo na naggagadan kan Espíritu.  Ginagadan ninda an Espíritu ta iyo an inspiracion niato bako lang sa pagmangno sa kamanghod, bakong lang sa pagpara kan ignorancia, bako lang sa pagtabang sa mga nangangaipo kun di man sa iba pang millones na mga inspiraciones kan Espíritu sa satuyang sociedad digdi sa ciudad kan Sorsogon, sa nación kan Filipinas asin sa bilog na mundo.  Kaipuhan madakop ining mga paragadan kan Espíritu asin kulungon, minsan kita mismo an magdakop sa sadiri niato cada vez na nagigin paragadan kita kan Espíritu.  Hinahale na an Simbahan sa mga hospital asin an acto de caridad nagigin ngonian puramente manongod sa cuarta.  Saen an Espíritu kun an pag-servi niato sa kapwa katakod an paghagad ki kabayaran?  Kaipuhan magbayad sa mga hospital ta magsasarara an mga ini kun dai ki sustento, pero kun gabos na san exclusivamente sa pagbayad, asin dai na kita pakiaram sa mga kamanghod niato na nagsasakit asin dai makapa-hospital ta daing pagbayad, saen an Espíritu dyan?  Ginagadan niato.  Saen an Espiritu kun kada hiro kan satuyang kamot asin bitis, kada hingoha, kada servicio kaipuhan pabayadan asin nalingawan na an pagtao kan panahon asin parte kan satuyang buhay sa iba gratis et amore, libre asin may pagkamoot?  Hinahale na an Simbahan sa mga escuelas asin universidades asin nagigin exclusivamente cuarta an nagigin razon kan mga instituciones na ini.  Saen an Espiritu kun nunca makakalaog an wara mga pang-matricula sa mga escuelas asin universidades asin an cada tagdo kan kadongan kaipuhan bayadan ki ginto asin tanso? Saen an Espiritu kun nagigin discriminacion pa ngani contra sa mga mangmang an kadongan kan mga madonong kuno?  Cierto na kaipuhan magbayad kan matricula sa mga instituciones na ini ta kun dai ining mga suporta sinda man magsasarara, pero kun dahil lamang sa kawaraan kan cuarta an satuyang mga tugang na maninigo man pero dai pambayad dai na makakahaw-as sa ignorancia asin kapobrehan asin dai na kita ki pakiaram sa satuyang mga tugang na mga mangmang asin pinag-uulokan pa ngani sinda huli ta sala an pagbasa kan mga tataramon na inglés saen an Espíritu dyan?  Ginagadan niato.  Sinisiblag kita ngonian kan sociedad sa cada saro, habo kan kaiwal na kita magkasararo, habo kan demonio na kita makisumaro sa satuyang mga kapwa.  An pagngisi ngonian mahalon na asin binabakal na sa halangkawon na precio.  Pag may nangangaipo asin naglilimos minsan nagbubuta-butahan kita.  Kun mag na-a-accidente o may nagin victima kan crimen pira sa satuya an magkukusog kan boot asin mapapano kan Espíritu para magtabang?  Saen an Espíritu kun ni kamanghod mo di mo na kilala, ni kataed mo sa harong dai na kita ki pakiaram, cada persona para sa saiya sana?  Ginagadan niato.

          Lugod ngonian na Domingo kan Pentecostes mapano kita gabos kan Espíritu.  Magpamibi kita siring na si Profeta Isaías nagpamibi: An espíritu nin KAGURANGNAN magontok sa satuya, an espíritu nin kadonodongan saka pakasabot, an espíritu nin hatol saka kosog, an espirtiu nin pakaaram asin nin pagkatakot sa KAGURANGNAN.  Asin siring sa suanoy asin tradicional na pamibi niato na mga Católico Cristiano: Madya, O Espíritu Santo, panoa an puso nin saimong mga devoto, asin papaglaada an kalayo nin saimong pagkamoot.  Isobol mo an saimong Espiritu asin an gabos mahahaman.  Asin mababago an lawog nin kinaban.  O Dios, huli sa pasabong nin Espíritu Santo, pinaliwanagan mo an puso nin saimong mga devoto; itogot mo na, huli sa pasabong man sana kan Espiritu Santo, mag-isip kami nin matanos aisn magdanay kami sa pagkamit kan saimong karangahan.  Huli ki Jesu Cristo Kagurangnan niamo.  Amen.