Ascension Sunday Year C

          Ngonian na Domingo, Ascension Sunday, ginigiromdom kan bilog na Simbahan an pagsakat sa langit ni Jesus, Dios asin Tawo, después na Siya magsakit, magadan, ilubong asin mabuhay liwat hale sa mga gadan.  Nagpahiling Siya ki nagkapirang veces sa Saiyang ina asin sa Saiyang mga apóstoles asin discípulos.  Itinugdok Niya an Simbahan asin Saiyang ipina-seguro na ini bakong mawawara sa ibabaw kan daga mantang magdatong liwat Siya sa Paghukom sa satuya gabos, mga buhay asin mga gadan man.

          An Domingong ini iyo man an Catholic Communication’s Sunday.  An comunicación sarong importantehunon na instrumento sa panahon ta ngonian para sa New Evangelization.  An mensaje Cristiano Católico boot niatong maipaabot sa gabos lalong lalo na sa mga nangluluya an pagtubod siring mana sin en modo especial sa mga dai pa ki pagtubod.  Maw-ot niato na an gabos mas magin tatao manongod sa sadiring pagtubod asin gabos mas magin convencido sa satuyang mga tinutubudan.

          Siring man ngonian na Domingo iyo an Aldaw kan mga Ina.  Satuyang tinatawan ki amor, respecto asin apreciación an satuyang mga ina na satuyang ginikanan asin iyo sinda an mga nagpadakula sa satuya.  Kun dai sinda, dai kita.  An satuyang pagtubod sainda man gikan.  Bako ta sindang linilingawan, asin aalalayan niato sinda lalo na sa saindang pagkagurang.  Ngonian na aldaw en modo especial satuya sindang pinapangadyian.

          Sa paghorop-horop niato sa Domingong ini enot na puede niatong taw-an ki atención iyo an Pagsakat sa Langit ni Jesús na iyo man an satuyang destino final.  Marahay-rahay na inspiración sa satuyang aroaldaw na paglapigot sa karahayan na an premio kan satuyang marhay na buhay iyo an kaogmahan na daing kasagkoran sa ikaduwang buhay.  Kita na naghingoha magpakamarhay masakat kita sa langit kaiba si Jesús.  Cada vez na kita mangluya asin maharani sa tentación isipon niato ining katotohanan na ini, cada vez na kita mawaraan ki atención asin focus giromdomon niato an satuyang destino, cada vez na kita masala sa ibang agihan yaon giraray an guía.  Bako kita mga bato, o mga puno, o mga hayop sana, na hanggang sa ibabaw lang kan daga an destino.  Kita mga aki kan Dios, asin sa Harong kan Ama sa langit an satuyang ultimo na pakakadtoan.

          An pangaduwa niato na puedeng paghorop-horop ngonian na aldaw kan Kagurangnan an Sacramento kan Pagkumpisal, na puede niato sabihon an satuyang pagsakat giraray sa gracia hale sa pagkadapa sa kasal-an.  Antes na si Jesús magbaya itinao niya an poder sa saiyang mga apóstoles na magpatawad an mga ini kan gabos na mga kasalan.  An mga obispo asin mga kapadian tinanggap ining poder sa saindang pagiging mga padi siring na si Cristo Padi.  Magduman kita sainda sa banal na Pagkumpisal sa kumpisalan cada vez na kita masumok sa kumunoy kan kasalan, bakong sa aga, o sa masunod na semana, kun di hora mismo, pag kaipuhan niato.  Aramon niato an mga schedule kan pakumpisal sa satuyang mga parroquia asin magkumpisal kita regularmente.  Tukdo kan mga banal na ini na pagsabi kan satuyang mga kasalan sa Dios sa paagi kan padi sarong importantehon na ingrediente pasiring sa kabanalan.  Madapa man kita asin matumba sa putik an pagkumpisal nagpapatindog giraray sa satuya asin minalinig giraray kan satuyang mga kalag.

          Masunod na puede niato isabay sa satuyang paghorop-horop ngonian na Ascension Sunday iyo an katotoohan na an buhay espiritual niato iyo man baga saro na pagsakat.  Sabi kan mga banal saro ini na buhay kan ascetism, ascending, pagsakat.  Kaya ngani ngonian na kita mas nagiging harani sa Dios mas nagiging masakit ta boot sabihon nagsasakat na kita sa bulod kan kabanalan.  Paitaas an langit, paibaba man an infierno.  Pasiram-siram man habang buhay, pagdusa man na daing kasagkoran an naghahalat sa mga nagpapabaya asin dai nagsasakat.  Magsakit man kita ngonian sa kadikit na panahon, kaogmahan man na daing kasagkoran an minahulat sa satuya sa ikaduwang buhay.  Minsan satuyang nalilingawan ini dahil man seguro kan kakurihan kan pagsakit sa ngonian.  Hare niato paglingawan asin pirmi pagdumdumun ining katotohanan na satuyang pagsakat, masakit mana n pagsakat, hayahay man an satuyang padudumanan.

          Ultimong punto iyo an paggiromdom sa gabos na presente digdi asin paggiromdom man nindo sa satuyang mga ka-familia asin mga kaugos, magboto kita sa aga.  Mag-atab mag boto.  Magboto sin tama.  Dapat tama sabi baga ninda.  Asin botohan an tawo bako dahil nagtao ki quinientos o dahil padihon o madihon o dahil kamag-anak o dahil may utang na loob ka saiya, kun di botohan an candidato na karapat-dapat, maka-Dios, makatawo, an the best, tunay na maserbi sa tawo.  Giromdomon mo na an boto mo bako lang para saimo asin bako lang para sa bilog na Pilipinas, kun di man lalong lalo na para sa mga aki mo aisn mga namomot-an mo sa buhay.  Tama na.  Dapat tama naman.  Amen.