Domingo de la Trinidad

          Mga tugang, ngonian na Domingo, sine-celebrar kan bilog na Simbahan Católica an Trinity Sunday, Domingo de la Trinidad.  An Dios saro sana, igwa ki tolong Persona.  An satong señal kan Cruz ginigibo sa ngaran kan Ama asin kan Aki asin kan Espiritu Santo.  An satuyang bunyag ginigibo sa tolong Persona kan saro sanang Dios.  Siring man an cada Santa Misa sine-celebrar sa pag-honra sa tolong Persona kan sarong Dios.  Marahay-rahay na paghorop-horopan niato ining misterio na ini sa satuya man na sadiring ventaja asin man para sa ventaja kan satuyang mga kaakiaan na nag-de-depender sa satuya sa explicaciones kan saindang pagtubod.  Kun dae kita tatao manungod sa satuyang pagtubod, daing sorpresa nata an satuyang mga kaakian dai man ki aram, pero kun an mga magurang tatao asin sinda an magtutukdo sa saindang mga kaakian, dakul an maaaraman kan mga ini manungod sa saindang pagtubod asin sinda más magigin convencido.  Lugod más maintiendihan niato an mga doctrina kan satong Simbahan Católica ngonian na Taon kan Pagtubod para ma-explicar niato an mga ini sa bag-ong generación.

          Ining misterio na ini ipinaaram sa satuya ni Jesu Cristo mismo kan Siya, Dios Aki, nani-laman asin nagin Aki man kan Tawo.  Pirang veces sa Evangelio madadangog niato na an Saiyang Ama iyo an nagsugo Saiya asin dai Siyang ibang ginigibo kundi an kabotan kan Ama.  Madadangog man niato na ipinapadara kan Ama asin kan Aki an Espíritu Santo asin ini man nanggad an Espíritu Paracleto, nagtataong gracia sa satuya, asin nagtatabang sa satuya sa pang-aroaldaw na paghingoha sa paglakbay pabalik sa Ama.

          An mga Padres asin Doctores kan Simbahan hiningoha ining i-explicar sa satuya sa paagi na masabutan niato.  Pirang veces man ini nagin tema kan mga Concilio Ecuménico asin nagkapirang veces nagtao corrección an Papa, solo o kaiba an Concilio, sa mga sala na mga katukdoan sa forma kan mga herejía.  Si San Agustín naghingoha na ma-explicar sa gabos an misterio kan Trinidad sa makakaya kan satong capacidad sa paagi kan paggamit sa satuyang intelecto asin amor, sa paagi kan mga imágenes kan satuyang isip asin puso.  Ginamit kaining Padre asin Doctor an satuyang isip asin puso bilang modelo kun papaano más maiintiendihan niato an Sarong Dios sa Tolong Persona.  Sabi ni San Agustín, siring na an isip may iniisip asin an iniisip na ini base sa nahihiling, asin gabos ining procesong ini saro sana, arog man daa kaini an misterio kan Trinidad: sarong isip, pero iba an isip sa iniisip, asin iba an isip asin iniisip sa nahihiling na iyo an basehan kan iniisip kan isip.  Sarong isip, pero tolong realidad: an isip, an iniisip asin an nahihiling kan isip.  Sabi pa ni San Agustín, siring na an pagkamoot namomoot sa saiyang namomotan, arog man daa kaiyan an misterio kan Trinidad.  An pagkamoot iba sa acto kan pagmoot asin iba man an mga ini sa bagay o tawo na minomoot pero al mismo tiempo saro lang ining proceso na ini, saro lang na pagkamoot.  Sarong pagkamoot, pero tolong realidad: an pagkamoot, an pagmoot kan pagkamoot, an mimomoot kan pagkamoot.  Tunay na difícil ini gabos intiendihon asin si San Agustín ngani daa, un día, mientras siya naglalakaw-lakaw sa baybayon asin naghohorop-horop manungod sa misterio kan Trinidad asin kun papaano ini maintiendihan para man maihiras sa iba sa saiyang mga katukdoan, nahiling an sarong aki na naggibo kan  luho sa baybay asin pinapalis an tubig dagat sa luho.  Sabi niya sa aki, “Aki ko, anong ginigibo mo?”  Sabi kan aki saiya, “Pinapalis ko po an dagat sa luho na ini sa baybay?”  Simbag ni San Agustín, “Pero aki ko, imposible iyan na gusto mong gibohon!”  Simbag man kan aki, “Más imposible an iniisip mo!”

          Puedeng sa teórico na paagi difícil intiendihon an mistero kan Trinidad, kun papaano an Saro Dios yaon man an Tolong Persona, asin puede man na sa paagi na practico más masabotan niato ini.  Puede niato gamiton bilang imagen kan Trinidad an sarong familia.  An ama asin ina, sa saindang pagkamoot sa cada saro, yaon an saindang aki, asin sinda gabos saro sa pagkamoot.  Tinatawag niato sindang sarong familia.  Saro sa pagkamoot pero iba an ama sa ina, asin iba sinda sa saindang aki.  Dakul pa na mga imágenes an puede niatong gamiton para sa pag-explicar kan misterio kan Trinidad.  An iba ginagamit an pili: sarong pili pero iba an panit, sa lagting, sa pisog.  An iba man triangulo: sarong triangulo pero tolong ángulo.  Bahala na po kita sa pagpili kan imagen na puede niato magamit sa pag-explicar sa satuyang mga kabataan.  Basta giromdomon niato na mga imágenes sana an mga iyan asin dai ninda ma-e-explicar man nanggad sa modo perfecto an misterio ta a punto misterio ini.  Pag rendir cuenta sa atubang kan misterio an satuyang sasabihon iyo an: Amen.