Ascension Sunday Year C (2)

          Ngonian na Domingo ginigiromdom kan bilog na Simbahan Catolica Cristiana an Ascension, an Pagsakat sa Langit ni Cristo Jesus, Paraligtas, hawak asin kalag.  Siya namundag ki Maria, nabuhay bilang Aki kan Tawo sa harong ni Jose, nagtrabaho, nanitawo sa bilog na boot sabihon kan paninitawo fuera kasalan.  Siya pinasakitan, nagadan sa Cruz, ilinubong, nabuhay liwat asin dinaog an kagadanan para man kita na mga buhay dai na magadan.  Nagpahiling Siya sa Saiyang Ina, sa mga apostoles asin mga discipulos.  Itinugdok Niya an Simbahan sa mga harigi na iyo si San Pedro asin an mga apostoles sa pagpa-seguro na an Marhay na Bareta maibalangibog sa bilog na rona kan mundo sa kapanahonan kan mga panahon.  Sosog ki San Lucas na kagsurat man kan mga Gibo kan mga Apostoles, si Jesus suminakat sa langit cuarenta dias despues kan saiyang pagkabuhay liwat.  Yaon Siya ngonian nagtutukaw sa too kan Dios Ama, hawak asin espiritu, asin Siya mabalik sa paghokom sa mga buhay asin mga gadan.

          Ngonian na tinapos na ni Jesus an Mision na itinao Saiya kan Ama, Saiya naman pinapadara an mga apostoles asin an mga discipulos, pag render cuenta kita gabos na mga taga-sunod Niya bilang mga Cristiano Catolico, pinapadara kita na ipadagos an Saiyang Mision.  Tatabangan kita Niya asin kan Ama, lalong lalo naman sa pasabong kan Espiritu Santo.  Puedeng masabi na pinapasa na Niya satuya an bola, kita naman an mag-discarte, kita naman an magpakilala sa Ama sa gabos niatong mga katugangan digdi sa ibabaw kan daga, especialmente sainda na dai pa namimidbidan an Tunay na Dios, Kaggibo asin Kagtao.  Kaya ngani ngonian na Domingo na iyo man an Catholic Communication’s Sunday, iyo ini a punto an mensaje, an agyat, an sugo sa satuya.  Gamiton niato an gabos na mga instrumento kan comunicacion para maggibo niato ining sugo ni Jesus.  An television, an radio, an periodico, an internet, an satuyang mga ngimot, lalong lalo na an satuyang mga buhay asin ejemplo, ibalangibog niato si Jesus sa gabos na dai pa namimidbidan Siya.  Dai niato masasabi na may katotohanan kun dai niato ibinabalingibo an Marhay na Bareta.  Sabi ni San Pablo sa mga taga Corinto, woe to me if I do not proclaim the Gospel.  Ining agyat na ini agyat sa gabos, sa gabos na panahon, in season or out of season, sabi giraray ni San Pablo ki Timoteo, kaipuhan niato ibalangibog an Marhay na Bareta, masakit man, o kita man hinuhugakan, o kita man natatamaan, o puedeng sa kabayaran kan dakulang sacrificio sa parte niato.

          Saro sa pinaka-importante na pagbalingibog kan Marhay na Bareta ta iyo ini an saro sa pinaka efectivo iyo an pagbalingibog kan mga ina sa saindang mga kaakian.  Kaya ngonian man na Domingo sa pag-celebrar niato kan Aldaw kan mga Ina, satuyang pasalamatan sinda na nagtao satuya kan satuyang buhay fisical asin espiritual ta sinda baga an nangidam sa satuya pero sinda man an nagpakilala ki Jesus sa satuya asin sinda man an nagkarga sa satuya mantang kita binobonyagan.  Mga mama, an pinakadula na pasasalamat boot niamong ipaabot saindo, dahil sa buhay niamo, asin dahil man sa buhay na daing kasagkoran na ginibo nindong posible para samuya.  Saludo kita sa gabos na mga ina, an mga presente digdi ngonian, an mga nasa harong, minsan ngani sinda naglalapigot sa ibang bansa, lalong lalo na saludo kita sainda dahil sinda padagos na nagpapaka-ina asin padagos na nagbabalangibog kan Marhay na Bareta sa saindang mga kaakian asin familia minsan ngani contra na digdi an sociedad.  An sociedad ngonian habo na kan mga ina, habo kan mga ina na nag-aaki, habo kan mga ina na nagtatao kan saindang buhay exclusivamente sa saindang mga agom asin mga kaakian, habo kan mga ina na nasa harong sana asin naghihinguha na mag-fundar ki sarong marahay na familia, habo kan mga ina na nagpapaka-ina.  Kaya mga mama, salamat asin saludo kami saindo, padagos lang kamo asin yaon kami nag-aalalay saindo asin mag-aalalay saindo hanggang kamo mga apo na an pigbabantayan nindo asin kamo na an kaipuhan bantayan, hanggang sa dai na kamo makaluto o makabalatas ki dalan ta maluya na an tuhod asin maluya na an paghiling, hanggang dai na nindo kami kilala dahil nabubuhay na kamo sa kahapon asin an futuro dai na ki kahulugan para saindo, hanggang dai na kamo makatindog asin yaon na sana kamo sa higdaan nindo ta arog man baga kami kaiyan kan kami namundag pa lamang hale saindo.

          Mga tugang, si Cristo Jesus suminakat sa langit hawak asin espiritu asin iwinalat sa satuya an mision na ibalangibog an Marhay na Bareta, siempre sa gracia Niya.  Ibalangibog ta ini sa gabos na paagi lalong lalo na rin sa mga mas moderno asin mas efectivo na mga paagi.  En modo especial sa paagi kan pagbalangibog kan mga ina sa saindang mga kaakian asin mga familia.  Amen.