Pamibi sa Diocesan Emmaus Journey

PAMIBI SA DIOCESAN EMMAUS JOURNEY

Kagurangnan, pinapasalamatan Ka niamo, huli kan biyaya kan saimong Tataramon na minapagibo kan misyon na itinao mo samuya, na samong isinasabuhay asin binabago sa pangaturogan kun saen bilang nagbabaklay na simbahan, ibinugtak niamo an samong mga paglaom asin kamawotan.

O Dios, yaon Saimo an samuyang pagsarig asin pagtiwala tanganing sa samuyang pagbaklay, mapag-horop-horop an saimong kabotan, maaraman an katotoohan kan saimong plano, masabotan an samuyang pagigin simbahan siring sa boot Mo.

Logod an samuyang Simbahan digdi sa Sorsogon, maglakaw sosog sa Saimong Espiritu asin katotoohan, sa pagpoon kan pagbaklay sa pagsiyasat giraray kan pangaturugan bilang Diocese. Logod an paglakaw pa Emmaus, siring sa duwang disipulos, magbukas kan dalan para sa samuya, na makilala Ka sa gabos na nangyayari sa samong buhay orog na, sa selebrasyon kan Banal na Eukaristia.

Kagurangnan, giyahan Mo kami asin padarhan an Saimong Banal na Espiritu, na mag erok sa samuya asin gibohon na danay naglalaad an samong puso kan daing sokol na pagkamoot, makusog na pagtubod, asin pusog na paglaom. Ibanhan Mo logod kami sa samuyang pagbaklay sa pagtubod, mapakumbaba sa pag-utob kan Saimong kabotan, mahuyo sa pagdangog kan Saimong tataramon asin bagoha man samuya an espiritu nin pagsakripisyo, sa paglingkod asin pagtrabaho sa saimong ubasan para sa pinaka-orog Mong kamurawayan asin honra.

Logod an samuyang Mahal na Ina, si Birhen Maria, buksan an saiyang mga takyag tanganing makamate kami nin kagayagayahan huli kan saiyang intersesyon asin tabang asin sa saiya samuyang idinodolot an samuyang paglaom asin mga kamawotan.

Amen.

San Pedro asin San Pablo, ipamibi mo kami.

TRANSLATED BY VERY REV. FR. NESTOR BENAVIDES