ὁ θεὸς ἱλάσθητι μοι τῷ ἁμαρτωλῷ. O Dios, kaheraki ako ta ako parakasala. Iyo ini sa original na Griego an pangadyion kan parakolekta kan buhis sa nadangog niato na parabola hale ki Jesus sa Evangelio ngonian na ika 30 na Domingo kan Ordinaryong Panahon. Iyo man baga an pinapangadyi niato sa halipot na version kan satong Gawe nin Pagsolsol. Antes magkumpisal asin antes kita tawan ki absolucion kan padi pinapangadyi niato: Jesus na Kagurangnan, Aki kan Dios, kaheraki ako, ta ako parakasala.
An mga nadangog pa sana niato na Babasahon gabos, daing excepcion, nagpapahiling sato kan efectivo na pangadyi kan tawong mapakumbaba asin an pagsayang kan laway sa pagpangadyi kan tawong mapaabawabaw. Sa Evangelio sosog ki Lucas capitulo 18 namate niato an fariseo, imagen kan gabos na tawo na mapaabawabaw kita incluso cada vez na mapaabawabaw an satong puso. Ini sarong pangadyi na puedeng masabi caricatura kan Salmo 33 na satong nadangog. Sabi kan Salmo: an Kagurangnan nagdadangog sa agrangay kan mapakumbaba. Iyo man an mensaje kan Primerong Babasahon sa Libro kan Ecclesiastico: dinadangog kan Dios an agrangay kan dukha, kan viuda asin kan huerfano - an mga ilo. Incluso an pangadyi kan mga parakasala: si Jesucristo mismo an nagsabi sa Evangelio na dinadangog kan Kagurangnan an mapakumbaba na pamibi kan sarong parakolekta kan buhis, parakasala. Kaya baga gabos na kasalan napapatawad kan Kagurangnan, maski pa an mga pinakamagabat dahil sa puso na nagsosolsol asin sa daing sukol na pagkamoot asin pagkaherak kan Dios. Digdi sa Cathedral cada Sabado, pagkatapos kan a las cinco y media na Santa Misa, may mga padi na yaon nakatukaw naghahalat sa mga gustong makipagulian sa Dios. Aprovecharan ta ini.
Ako daw, papano an sakong pamibi? An sakuyang pamibi arog kaya kan mga pamibi kan mga dukha, viuda asin ilo, arog kaya kan pamibi ni san Pablo sa Ikaduwang Babasahon, kan pamibi kan parakolekta kan buhis sa Evangelio? O an sakuyang pamibi parang bagang arog na sa pamibi kan fariseo? Parang sungo-sungo kan tunay na kahulugan kan pagpapasalamat, pag-oomaw, paghahagad asin paghahagad ki kapatawaran. Ginamit kan fariseo sa saiyang pamibi sa original na Griego an tataramon na εὐχαριστῶ. Asin padagos siya sa paghambog sa Kagurangnan, sa Kagurangnan na nahihiling an secreto kan mga puso kan tawo, asin nahihiling an tunay na situacion kan mga bagay bagay, kan saiyang mga karahayan. Dai man nagrorokyaw, o nagpapasalamat, o naghahagad asin mas lalo dai lamang naghagad ki kapatawaran. Sa Santa Misa dai kita naghahambog sa litania kan mga marhay niato na gibo kun di kita nagluluhod sa atubang kan Hawak asin Dugo ni Cristo sa pakimaherak na kita Saiyang basugon asin haleon an satuyang paha. Nakikimaherak kita sa Santa Misa na pakusugon Niya kita para sa pagpadagos kan satong mga manlaenlaen na mision.
Mga tugang, ngonian na Domingo giromdomon man niato, en especial modo, an satong mga tugang na nasa prisohan. Ano an ginigibo niato para sainda? Pinapangadyi kaya niato sinda, asin an saindang mga nawalat na familia? Maski ano pa man an saindang caso, sinda tawo pa man giraray, sinda mga aki pa man giraray kan Mahal na Dios asin puede pa magbago, sinda satong mga tugang lalong lalo na ngonian na sinda nangangaipo. Puede kaya ako magbisita sa prisohan? Magdara frutas o gubing? Aram ko kaya an situacion kan satong mga priso digdi sa ciudad kan Sorsogon asin sa provincia. Ano kaya an maitatabang ko sa mga kilala ko na familia ninda? Pag sinda nakalaya na, handa kaya ako na tawan sinda ki pagkakataon sa sociedad? An pamibi kan mga priso saro man na dakulaon na pagagrangay na tinutusok an puso kan Mahal na Dios.
Ipamibi man niato an mga sistema judicial kan satong bansa. Justice delayed is justice denied. Lugod mas magin mahigos sinda asin mas masigkat sa pagresolbar kan mga caso. An mga juez, an mga abogado asin an gabos na nagtatrabaho sa mga corte kan Pilipinas, especialmente sa satong mga corte digdi sa ciudad kan Sorsogon asin sa provincia. Tawan lugod sinda ki kusog asin gracia na gibohon kita marhay an saindang marhay na gibo. Ipamibi niato an mga nasa Jail Department asin an mga nasa Prison Bureau. Bakong facil an saindang trabajo: pagpakakan, paglinis, pagmantenir kan seguridad asin paggibo kan mga actividades para sa mga priso. Lugod gibohon ninda ini bako lang ta ini trabajo kun di dahil pagserbi man sa tugang ninda na priso. Kita man makakasimbag en parte sa mga pamibi kan mga priso na nangangaipo. Amen.
Walang komento:
Mag-post ng isang Komento