29th Sunday in Ordinary Time Year C World Mission Sunday

          Ngonian na Domingo ika-veinte nueve kan Ordinaryong Panahon iyo man an Jornada Mundial de Misión, World Mission Sunday.  Tugote po ako nindo mga tugang na an satuyang tema na paghohorophoropan bako man nanggad manunungod sa mga namate niato na mga Babasahon kun di manungod sa misión kan cada Cristiano asin iuupod man niato an política sa nivel kan Baranggay, bilang an política parte man kan misión kan Simbahan, exclusivamente kan mga laico, asin sa oportunidad man na ini na harani na an Baranggay elections digdi sa Pilipinas.  Ini an satuyang tema: an misión asin an política.

          An misión hale sa Dios Ama.  An Aki daing ibang ginibo kan si Jesús yaon sa kinaban, kun di an ibalangibog an Marhay na Bareta sa saiyang mga milagro, mga tataramon asin sa saiyang buhay asin paarog.  Ining misión hale mismo sa Dios Ama.  Kan an Kagurangnan tinao na an Saiyang Buhay sa Cruz, asin sa ikatolong aldaw nabuhay liwat asin suminakat sa langit, ining misión pigpapadagos Niya lalong lalo na sa trabajo ngonian kan Espíritu Santo sa Simbahan Católica, finundar ni Jesús sa gapo na iyo si Pedro asin an mga Apóstoles, kaiba si Pablo, satuyang mga patrón digdi sa parroquia.  Daing ibang misión an Simbahan, kita daing ibang misión, kun di an mismong misión kan Espíritu, kan Aki, an misión na gikan sa Ama.  Naghihingoha kita na an Dios maiparani sa tawo asin an tawo magrani giraray, en definitiva, magpuli sa Dios.

          An Simbahan sa pagmimisión niya bako lang boot sabihon an mga kapadian, mga kamadrehan, mga religioso asin religiosa, mga catequista asin mga laico ministro.  An Simbahan bako lang an mga naka-sutana o mga nakagubing na pang liturgia.  Simbahan kita gabos na mga binonyagan, asin an misión más lalo pa na obligación niatong mga kinumpilan asin nagkakan kan Hawak asin Dugo ni Cristo sa Comunión.  Bako lang an mga naka-sutana, kun man asin minsan más lalo na importante sa misión an mga naka-pantalon asin naka-palda, mga nakapang gubing kan mundo.  An mga nasa mundo iyo man an más may oportunidad na ihiras an Tataramon, an Marhay na Bareta sa mundo.  An mga ina asin ama, lola asin lolo, ate asin kuya sa saindang familia.  An mga barkada sa saindang bararkadahan.  An mga nagtitinda, sa plaza.  An mga nag-o-oficina, sa mga ka-oficina.  An mga político, sa política.  Opo, maski an política, lalo na an política sa karahayan, iyo man an marhay na oportunidad para mag-misión asin ibalangibog an Marhay na Bareta.  Nahihiling ta ini sa buhay asin ejemplo kan satong mga marhay asin honesto na mga politicon na mga Cristiano asin nagpapaka-Cristiano sa política.  Dakulon asin dakulaon an naiseserbi kan político Cristiano sa pagbalangibog kan Marhay na Bareta ni Cristo sa saiyang mga nasasakopan.

Tunay na puede niato sabihon na an tunay na Cristiano Católico iyo an nagmi-misión asin kun ako dai nagmi-misión dai ko matatawag an sadiri ko na discípulo ni Cristo Jesús.  Kun dai ako nagbabalangibog kan Marhay na Bareta, bako ako tunay na Cristiano.

          Ngonian na maabot na Baranggay elections, mga tugang, magpili kita sin dapat, sin tama asin sin mga candidato na aram niato pagserbi asin pagmisión an plataforma, bakong pagpaserbi sa saindang sadiri asin an aram sana na misión iyo an maghab-as ki cuarta para sa sadiri nindang mga bulsa.  Puede niato sabihon na ini na Baranggay elections mas importante pa sa National elections ta digdi sa kasaditan nagpopoon an karahayan asin digdi man sa kasaditan nahahale an karatan.  Tabi man iboto si Kagawad o si Kapitan dahil nagseserbi asin nagmi-misión bako dahil may sanggatos na itinao, o dahil may favor na ginibo sa satuya, o dahil simplemente madihon o padihon, o pinsan o kamanghod.  Kun marhay iboto.  Kun aram mo na bakong marhay dai iboto.  A diferencia kan mga candidato sa pagka-presidente, senador, o congresista, sindang mga candidato na nagkakagadawad asin nagkakapitan, kilala niato.  Tabi man iboto an marahay, maka-Dios asin makatawo.  Bakong iboto an maki-cuarta asin makasadiri.  Kun wara man kita mapagpilian, iboto an sa hiling niato na pinakamarhay sa mga yaon na mga candidato.  Asin sa masunod, magdalagan man kamo sa política.  An sabi kan iba dai na daw mag-intra an Católico sa política kay maati asin puno kan corrupción.  Pero hilingon man niato an resulta kan perspectiva na ini.  Más lalo nagigin puno kan ati asin basura an política kay an mga parahab-as na sana an nagpo-política.  An satong presidente na naiboto contra sa buhay asin contra sa mga pobre.  An mga senadores asin congresistas na naiboto millones asin billones an pighahab-as hale kaban ng bayan.  An ibinulsa ngonian na elección iyo man asin di hamak na más dakul pa an hahab-ason sa mga bulsa pagtapos kan elección.  Hangga’t dai kita nagboboto sin tama asin hangga’t nagpapabakal kita ki boto, magigin parte responsable man kita sa pagroro kan nación.  Nahihiling niato an mga public market, agihan asin mga tulay sa Visayas kan nakaaging siete punto dos na linog.  Pira kaiyan an dai man kuta narumpag kun tama sana an budget na iginastos asin dai ki mga kupit an mga responsable hale sa kapitan pasiring sa congresista asin senador?  Pirang buhay pa kuta na naisalvar kun di kinurupit an pondo kan pagpagibo kan mga ini?  An pagpabakal kan boto puede niato sabihon pagpabakal kan sadiring buhay asin kan buhay kan satuyang mga namomotan.  An político nagbakal boto.  An tawo nagpabakal boto.  An político kinupit an cuarta hale sa mga proyecto na para sa tawo, ta iyo man an pinambawi sa ginastos para sa pagbakal kan boto kan tawo asin duminagdag pa para sa pagbakal kan saiyang mansión.  Naglinog asin nagbagyo, an mansión yaon man giraray pero an mga proyecto na pinatindog nagkaruruba na ta an mga budget kaini kulang na.  An sampolo na saco kan cimento nagin upat na sana.  An cabilla na dapat mataba, huminugos na.  Asin padagos an sistema kan corrupción, tunay na causa kan kapobrehan kan Pilipinas.

          Mga tugang, ngonian na Baranggay elections, magluwas asin magboto.  Iboto an dapat, iboto an tama, an nagse-serbi asin an nagmi-misión.  Asin sa masunod na elección, asin ngonian pa sana mag-preparar na, logod mag-intra sa política an mga Cristiano Católico na may kakayahan asin may boot mag-serbi asin mag-misión.  An política parte kan misión kay Simbahan, kan mga laico Cristiano Católico.  Iboto an dapat, iboto an tama, iboto an maki-tawo asin maki-Dios.   Amén.