Taon C ika-Onseng Domingo kan Ordinaryong Panahon

Dipisilon talaga na dai kitang control sa satuyang mga sadiring mga mata, ano po mga tugang sa Pagtubod?  Namate niato kanina sa Primerong Babasahon ika-duwang libro ni Samuel capítulo 14 na si Hadeng David nahulog sa kasalan dahil sa kaniyang mga mata asin dahil sa kaniyang maraot na binoot asin mga ginibo.  Nagpoon sana sa paghiling, naggin mas magabat na kasalan ki pagdurog sa dai niya agom, na más naggin pang magabat sa pagpagadan kan asawa kan saiyang nagin kabit.  An mata nagin causa lugod kan kadakul asin mga dakula na mga perjuicio sa sadiri asin sa iba, lalong lalo na perjuicio sa Dios.

          Pirang veces, ano po mga tugang, kita man arog man kaining Hadeng David sa satuyang aro-aldaw na buhay.  Nadadaog kita kan sadiri niato mismo: kan sadiri niatong mga mata, mga isip asin puso, sadiri niatong hawak.  An satuyang hawak iyo an satuyang instrumento sa pagbuhay.  Iyo man instrumento niato sa paggibo kan kadakul na karahayan para sa kamurawayan kan Dios asin para sa servicio sa kapwa.  Pero iyo man lugod an nagigin causa kan pagkaraot kan satong relación sa Dios asin sa kapwa, minsan ngani pagkaraot sa satuyang mga sadiri man sana.

          Satuya man na experiencia na dakulon na veces, sa paulit-ulit niato na pagkahulog sa mga kasalan, maski ano man an mga ini, ining kasalan nagigin vicio sa satuya.  Iyo baga mga tugang an vicio, baliktad kan virtud.  Kun an virtud sarong marahay na gawe na paulit-ulit asin fácil na sa satuya paggibohon, an vicio iyo man an sarong maraot nag awe na paulit-ulit man asin fácil na man paggibohon.  Una vez na nahuhulog kita sa sarong vicio, experiencia niato na dipisilon na an pagtalingkas.  Iyo baga an situación kan satuyang mga tugang na nabubungaw na kan vicio kan pag-inom por ejemplo.  Nadidipisilan sinda ki maray sa pagtalingkas, asin herak man kan sarong para-inom na nadidipisilan siyang haleon an sarong gawe na nakakaraot sa kaniya.  Lalong lalo na tunay na makaheherak an satuyang mga tugang na namalas na matumba sa dakulaon asin maraoton na vicio kan droga.  Tunay na herak man kan mga tugang niato na diit-diit na ginagadan an sadiri sa droga, asin tunay na herak man an saindang mga familia asin mga namomot-an sa buhay.  Tragedia sa sarong familia na igwa ini ki sarong aki na nabuang na sa droga, minsan más tragedia pa ini ke sa kagadanan.

          Pero mga tugang mensaje ngani kan ika-Duwang Babasahon, surat ni San Pablo sa mga taga-Galata capítulo 2, kun kita nadidipisilan, sa Dios daing difícil, daing imposible.  Kun sasadirihon niato an esfuerzo, talagang kita magkukulang pero kun iyo an Dios an maggibo kan paagi, gabos ini masosolusyonan.  Ta Siya na an nabubuhay sa laog niato, bako na kita, kun di an Dios na, sa Saiyang gracia, Siya an naghihiro sa satuyang mga isip, puso, espiritu asin hawak.    Kaya dai dapat kitang magsuko sa kasalan, sa kaluyahan, sa kadipisilan.  Minsan ngani maluya kita, minsan ngani dai kita makatalingkas sa vicio, confianza sana sa Dios asin padagos sana sa paghingoha.  Saen man baya kita paduman kun di sa karahayan ta an Dios an bahala satuya.  Minsan napapagalon na kita ta maski ano an satuyang hingoha lugmok man giraray kita sa kasalan.  Minsan nadadagit na kita sa satuyang sadiri ta nakakakumpisal pa sana kita, iyo na naman an satuyang gibo.  Minsan nagsusuko na kita ta sa kadakul dakul na marahay na intenciones asin sa kadakul dakul na sacrificio iyo man giraray an satuyang pagkatumba.  Padagos sana sa paghingoha, ta an Dios na nahihiling kita na naghihingoha minsan ngani dakulon an kapalpakan niato, Siya na an maggigibo ki solución.  Padagos sana sa pagkumpisal, ta isipon mo kun dai ka nagkukumpisal segurado más maraot ka pa ke sa presenteng situación.  An Dios pirmi nagpapatawad kan mga kasalan, asin, maski ano pa iyan na kasalan, basta yaon an tunay na pagbakle kan puso.  Padagos sana an pagdalagan sa carera kan buhay asin padagos sana an paglaban sa marhay na laban na ini, ta pirmi kita manggagana bakong sa satuyang sadiring capacidad kun di sa tabang kan Mahal na Dios.

          Ultimong bagay, na puede niato digdi idagdag sa satuyang paghorop-horop ngonian na ika-onseng Domingo kan Ordinaryong Panahon, makukua niato sa satuyang Evangelio según ki Luca capítulo 7.  Lugod kita dai magin pano ki pag-juzgar asin pag-condenar sa satuyang mga tugang na nalulugmok sa kasalan.  Bako kita más banal pa ke kiisay man, minsan ngani, más maluya pa kita sainda, asin salamat sana sa gracia kan Mahal na Dios na dai man kita nalulugmok sa mismong kasalan kan satuyang tugang.  Yaon lugod satuya an puso na humilde asin maheherakon sa atubang kan mga kaluyahan kan satuyang mga tugang.  Dai niato pagtatanggapon an kasalan, asin ini satuyang cocondernaron, pero dai niato itatapok an satuyang tugang na parakasala asin nagkasala.  Giromdomon lugod niato na kita mga parakasala man.  Asi kun sinda nagkakasala ngonian, kita man nagkasala man kahapon, asin puedeng puede mahulog naman sa kasalan sa masunod na aldaw.  Sa gracia kan Mahal na Dios lugod ini dai man mangyari, kun di mapuno lugod kita kan gracia Niya asin karahayan an gibohon bako an karigsokan.  Sa gracia kan Mahal na Dios asin sa satuya man na mga pamibi, an satong mga tugang na nagkakasala magbalik lugod sa Kagurangnan asin makakua ki kosog para sa pag-perseverar sa karahayan.  Sa gracia kan Mahal na Dios an satuyang mga mata magigin bakong instrumento ki kasalan, kun di instrumento ki dakul na mga karahayan.  Amen.