Ika-Sampolong Domingo kan Ordinaryong Panahon Taon C

          An Evangelio na satuyang nadangog sosog ki Lukas capítulo 7 versículo 11 hanggang 17 naghihiras sa satuya kan sarong momento asin milagro sa buhay kan satong Kagurangnan Jesucristo: iyo ini an pagbuhay Niya liwat sa sarong aking lalaki kan sarong balo na tinaw-an ki testimonia kan kadakul na tawo.

          Madadangog niato ining Evangelio bilang saro sa mga sugestiones na mga Evangelio na puedeng basahon sa sarong Misa sa Gadan.  An liturgia kan Simbahan, sa paagi kan sugestión na ini, nagtutukdo satuya kan primerong interpretación na puede niatong makua hale sa Evangeliong ini.  Na si Cristo, Kagurangnan kan mga buhay asin mga gadan, asin sa saiyang pagkamoot asin pagkaherak sa sato, kitang mga nagagadan binubuhay niya liwat sa buhay na ini, siring man sa pangaduwang buhay, sa buhay na daing kasagkoran.  An satuyang pagtubod sa pangaduwang buhay Saiyang pinapakusog ta sinasabi Niya sa satuya na bubuhayon man kita Niya, ta naggibo na Niya ini kaidto pa, asin nagkapirang veces na.  An satuyang paglaom más nagkukusog mantang pinapahiling kan Kagurangnan an evidencia kan saiyang kapangyarihan sa gabos, evidencia na kinakaipuhan kan satuyang maluya pa na pagtubod asin paglaom sa Saiya.

          Makukua man niato sa texto ko Evangelio an mga minasunod pa man na mga pag-adal asin mga paghorop-horop.  Nahihiling niato sa momento na ini sa buhay ni Jesus an milagro na saiyang ginibo sa sarong bakong Judío.  Normalmente an mga Judío, asin si Jesús sarong Judío ta an saiyang mga magurang sa daga, sinda José asin María, mga Judío, linilimitar an saindang relación sa mga bakong Judío.  Pinapahiling ni Jesús digdi na Siya napadigdi bako lang sa Saiyang mga kadugo kundi para sa gabos, para sa sato gabos.  Además ining ina na bakong Judía, sarong balo.  Sa kapanahonan ni Jesús an sarong balo dai ki importancia.  Pero hiling niato na siya tinatawan ngonian ni Jesús ki bilog Niya na atención asin ginibohan pa siya ki dakulaon na servicio, sa paagi kan pagbuhay-liwat kan saiyang aking lalaki.    Mahihiling niato an apreciación digdi kan Kagurangnan sa mga kasaraditan kan sociedad asin an hararom Niya na pag-intiendi sa satuyang mga kasakitan asin kadipisilan asin kahagadan kan satong puso minsan ngani dai pa kita naghahagad.  Siring na itinao Niya sa balo an aking lalaking ini na iyo an magtatao giraray sa balo ki importancia sa sociedad, iyo man an itinatao kan Dios sa satuya – an tunay niato na mga kaipuhan.

          Puede pa niato idagdag sa satuyang paghorop-horop ngonian kun papaano ginibo ni Jesús ining milagro bako lang sa atubang kan balo asin kan saiyang mga katood kundi man sa atubang kan iba pang kadakul na mga katawohan na yaon duman na nag-te-testimoniar sa gabos na ini.  Bako ginibo ni Jesús an milagro na ini ta boot niyang maghambog asin magpasikat sa mga yaon duman.  Iyo baga ini an mga tataramon na sinabi ni Lukas sa versículo 13 kan mismong capítulo 7: kan mahiling ni Jesús an ina kan gadan, naherak siya nin marahay.  Pagkaherak asin pagkamoot kan Dios an isinasabuhay digdi bakong ano pa man na ibang dahilan.  Si Jesús ginigibo an tama asin an dapat maski saen, maski napapanahon man ini o dae.  Cada momento sa Kagurangnan oportunidad sa pagserbi asin pagpatindog giraray sa mga napadungkal.  Kita man sinasadol kan Kagurangnan na gibohon an tama asin an dapat sa secreto o sa público, minsan ngani warang ibang nakaaram o minsan man an gabos nakahiling.  Sabi ngani kan mga banal, kun nahihiling kan iba an satuyang mga kaluyahan, marahay-rahay man na mahiling man ninda an satong mga kakusugan asin marahay na mga gawe.  Sa marhay na ejemplo man na ini sinda man na-i-inspirar na maggibo man kan karahayan.  Clarado pero na an satuyang intención iyo an pagserbi sa Dios asin sa kapwa asin bako an pagpahiling sana.

          Kagurangnan, Kagurangnan kan mga buhay, ika an nagtatao samuya ki buhay, lugod gamiton mi an samuyang buhay sa pagserbi Saimo asin sa kapwa siring kan saimong ejemplo, sa secreto man o sa público, sa hilom man o sa atubang kan bilog na mundo.  Amen.