Corporis et Sanguinis Christ Year C

     Ngonian na Domingo sine-celebrar kan bilog na Simbahan an kafiestahan kan Corpus et Sanguis Christi.  Iyo ini an kafiestahan kan Hawak, Corpus, asin Dugo, Sanguis, ni Cristo.  Satuyang pagtubod bilang mga Cristiano Catolico na an satuyang iniinom sa laog kan Santa Misa asin an satuyang kinakakan sa pag-comunión bakong simpleng arak o tinapay sana, kundi an mga ini nagigin, asin iyo man nanggad na, Hawak asin Dugo ni Cristo.

     Nata arog kaini an satuyang pagtubod?  Iyo ini an satuyang tinutubod ta si Cristo mismo an nagsabi, sa testimonio kan Banal na Biblia asin kan Sagrada Tradición gikan sa mga Apóstoles asin sa satong mga kamagurangan, na iyo ining tinapay an Hawak kan Paratubos, asin iyo ining arak an Dugo kan Paraligtas.  Ini gabos ipinahayag ni Jesu Cristo para sato asin para sa kaligtasan kan bilog na kinaban sa mga minasunod na pasaje kan Evangelio asin kan Bag-ong Tipan: Lucas capítulo 22, Mateo capítulo 26, Marcos capítulo 14 asin Primerong Surat ni Pablo sa mga taga-Corinto capítulo 11.  Daing duda, sosog sa ipsissima verba, an mismong mga tataramon ni Cristo, na inuulit-ulit niato sa cada Santa Misa sa acto kan consecración, an paggibo kan Dios na an tinapay magin Hawak asin an arak magin Dugo.  Iyo man ini an doctrina kan transubstanciación, kun saen sa paghiling, pagnamit asin sa gabos na paagi kan observación física an tinapay tinapay pa man giraray asin an arak arak pa man giraray, pero naiba na palan an substancia.  Iba an pigsasabi sa satuya kan satong mga mata asin mga dila, pero iba man an pigsasabi kan satuyang isip asin puso na nagtutubod.  An tinapay bako na realmente tinapay, asin an arak bako nang realmente arak.  Naiba an realidad, an tinapay iyo na an Hawak asin an arak iyo na an Dugo.

     O Dios, tawi kami nin dakulang pagtubod para dangogon ining saimong doctrina asin magin tatao kaming isabuhay an samong tinutubod.  Sa samong kaluyan pakusuga an samong pagtubod asin sa samong kakulangan panoa kami kan Saimong pagkaherak.

     Tunay kaya an satong pagtubod na an satong kinakakan asin iniinom sa laog kan Santa Misa Hawak asin Dugo mismo kan satong Kagurangnan Jesu Cristo?  Tunay kaya niatong tinutubod na an Santa Hostia bako lang tinapay o sarong biscuit kun di Hawak mismo kan satong Paratubos?  Tunay kaya niatong tinutubod na an Arak na laog kan Caliz, pagkatapos kan consecracion, bako nang arak kun di Dugo kan Paraligtas?

     Kun siring mga tugang marahay-rahay na paggibohon niato an mga gibong devoción kan satong mga kamagurangan asin kan iba pa na nagsisirbing ejemplo sa satuya sa panahon ngonian.

     Sa kadahilanan na nagtutubod ako na sa Santa Misa yaon si Cristo Jesús mismo, ma-preparar ako ki marhay cada vez na magdadatong an Domingo o cada vez na ako magsisimba.  Sabado pa sana pigpepreparar ko na an sakong isip asin hawak sa pagsimba pagdatong kan Domingo.  Nangangadyi na ako asin iniisip ko na kun ano an sakuyang mga papangadyion asin kun mga siisay an sakuyang papangadyian.  Ipepreparar ko na an sakong susul-uton sa kinaagahan na Santa Misa, an Sunday best dress kun baga sabi kan satong mga kamagurangan.  Pag ako may kasalan na magabat Sabado pa sana hihingohaon ko na na magpa-simbahan para maka-kumpisal sa padi pagkatapos kan Misa Anticipada, para sa Santa Misa sa masunod na aldaw na Domingo ako makaka-comunión ki pano kan gracia asin dai sa sacrilegio na iyo an resulta kan pag-comunión sa laog kan estado kan kasalan.  Pagkaagang amay maduman na ako sa Simbahan sa pagsimba ki atab.  Papakarhayon ko an sadiri ko para the best ako pag-atubang ko sa Kagurangnan asin pagtanggap ko saiya, the best parejo sa pangluwas asin panglaog na aspecto.  Malinig ako sa laog asin sa luwas, sa espiritu asin sa hawak.  Dai ako makakan ki ano man una hora antes mag-comunion asin paka-comunión ko maluhod ako asin mapangadyi para sa sakong sadiri asin para sa sakong mga namomot-an, asin para sa kiisay pa man na plinano kong pangadyian.  Dai ako maki-tsimisan sa laog kan simbahan asin dai ako magtetext asin dai ako magkakan, maski na ngani dulce sana, ta aram ko na harong ini kan Dios asin an Dios an sakuyang ka-olay ngonian.  Gusto niya one hundred percent an atención ko yaon Saiya.  Habang nagho-homilia an padi tunay na hihingohaon ko na nasa saiya an atención ko ta aram ko na oportunidad na ini para más maintiendihan ko an sakong mga tinutubudan asin para más magin convencido ako manungod sa mga doctrina kan simbahan.

     Kagurangnan, más lalo lugod kaming magutom sa Saimong Hawak asin mapaha sa Saimong Dugo.  Amen.