Ika-13 na Domingo kan Ordinaryong Panahon Taon C

Iniimbitahan kita ni Cristo Jesus na tunay na magsunod sa Saiya.  An pagsunod na ini bako lang sa tataramon, o dahil sana igwa kita Baptismal certificate na maipapahiling, o dahil sana may mga pangluwas na mga bagay kita na mga ginigibo.  Iniimbitahan kita Niya ngonian na tunay na magsunod Saiya pareho kan pagsunod Saiya kan mga banal, arog ninda Elias asin Eliseo, o santos Pedro y Pablo, na satong mga Patron digdi sa Cathedral, asin iba na mga paladan kan Kagurangnan orog nang gayo sinda Mama Maria asin Papa Jose.

Sa Enot na Babasahon namate niato kun papaano si Eliseo pinili ni Elias ta iyo an pinili ni Yahweh.  An pagsunod ni Eliseo en seguida asin dae na ngani siya nakaduman para magtaong galang sa saiyang mga magurang.  Pagkapili saiya derecho siya sa pagserbi kataed ni Elias, bilang profeta ni Yahweh.  Tunay na may pag-sacrificio an pagsunod sa Kagurangnan.  Iyo man baga an nadangog niato hale mismo ki Jesus na satong Tagapagligtas.  Sa pagsunod Niya sa kabotan kan Saiyang Ama, sinunod Niya Ini hanggang sa pagpapako sa Cruz.  Asin iyo man an hagad Niya sa satuyang mga Cristiano, Saiyang mga discipulos.  Nada menos que an satong mga buhay an hahagad kan Kagurangnan.  Iyo man baga an pagsunod na ginibo kan satong mga Patron na sinda Santos Pedro y Pablo.  Una vez na si Pedro tinawag, winalat niya gabos, familia asin trabajo, para cien por cien an focus niya sa mision na itinatao kan Kagurangnan.  Minsan ngani dai siyang inadalan naghingoha siya sa maging leader kan mga apostoles asin kan bilog na Simbahan ta iyo an mision saiya ni Jesus mismo.  Una vez na si Pablo tinawag, winalat niya an dati niyang buhay bilang maimbod na fariseo asin nagin man siyang maimbod na apostol kan Kagurangnan.  Minsan ngani pano kan remalaso asin mga dificultades an saiyang mga paglakbay sa pagbalangibog kan Marhay na Bareta, hanggang sa pagtao kan saiyang buhay ginibo niya para sa Dios asin para sa Simbahan.

Sa Ika-duwang Babasahon si San Pablo nagsurat sa mga taga-Galacia asin sa satuya man kun pan-o an pagsunod sa Kagurangnan.  Iyo man an paglimot sa sadiri asin pagtao kan gabos sa Kagurangnan.  Minsan ngani ini mapagal gibohon ta kita naturalmente naggigibo kan mga bagay-bagay para sa satuyang interes, pagtubod man niato na ultimamente ining pagsunod sa Kagurangnan an tunay na satong interes, an tunay na nakakatao satuya ki kahulugan sa buhay, an tunay na nakakapa-ogma satuya.  Asin an Dios man an nagtatao satuya ki gracia para maggibo ini.  Minsan dificil an pagsunod, nagigin facil ta an Espiritu Santo tinatawan kita ki kusog, paciencia asin perseverancia sa buhay Cristiano.

Kagurangnan, gusto niamo na magsunod saimo.  Maluya kami, pakusuga kami.  Maluya kami, papagdanaya kami sa Saimong karahayan.  Maluya kami, giboha na tunay kaming magsunod bakong sa samong sadiri, bakong kun kiisay pa man, kun di saimo sana.  Amen.