12th Sunday of Ordinary Time, Year C

          Dakulon na mga Cristiano Católico ngonian na panahon dai na kilala si Cristo.  Dai na nagsisirimba.  Dai na tatao kan mga pangadyion asin dai na nangangadyi.  Dai na aram an saindang pagtubod, asin naturalmente dai na ninda nagigibo an saindang obligación bilang mga magurang sa saindang mga kaakian na iyo an pagtukdo sa sainda kan mga pangadyion asin mga doctrina kan religión Cristiana.  Ta kun dai man sinda, ano man an saindang maitatao sa saindang mga kaakian.

          Dakulon pa man giraray an mga Cristiano Católico na naghihingoha sa karahayan.  Dakul pa man an nagsisirimba, kita por ejemplo na uya digdi ngonian na ika-doseng Domingo kan Ordinaryong Panahon.  Dakul pa man an mga tatao kan mga pangadyion, asin marahay na nagsisimbag sa mga respuestas sa Santa Misa.  Dakul pa man an makaka-explicar kan mga razones kun nata arog kaiyan an satong tinutubudan.

          Pero clarado na maski an may pagtubod, lalong lalo na an wara na pagtubod, madidipisilan sa hapot mismo ni Jesus sa Evangelio ngonian na Domingo sa satuya: siisay si Jesus para sa saimo?  Mga tugang, siisay si Jesucristo para saindo?  Ako, siisay si Jesus para sakuya?

          An profeta na si Zacarias sa Primerong Babasahon nagtatao satuya kan sarong kasimbagan.  Si Jesus iyo Siya na satuyang ipinako sa Cruz.  Siya an nagtao ki Saiyang buhay para kita na nasa kagadanan magkaigwa nin buhay na daing kasagkoran sa Saiyang pagkagadan.  Siya an satuyang Tagapagligtas na yaon nakapako sa Cruz.  Siya an namoot satuya na itinao Niya an gabos sa pagkamoot para sato asin naniniwala kita na hasta ngonian iyo Siya pa man giraray an yaon nagtatao satuya ki gabos na satuyang pangangaipo.

          An Salmo man nagrorokyaw ki Jesus bilang, bako lang Tagapagligtas, kun di man Kagtao kan gabos niato na kaipuhan digdi man sa ibabaw kan daga.  Siya an kasimbagan sa gabos niatong kahapotan.  Siya iyo an satuyang hinahanap minsan dai niato aram kun ano an satuyang hinahanap.  Siya an kapinonan kan gabos niatong kakulangan, an kaogmahan kan satuyang buhay, an gabos sa satong kadaihan.

          An apóstol na si San Pablo, satong Patrón, sa Ikaduwang Babasahon na saiyang surat sa mga taga-Galacia, ipinapakilala si Jesus bilang kapanoan kan mga promesas na ginibo ni Yahweh sa mga Judio.  An Dios naggibo ko promesa asin Saiya ining tinutupad asin si Jesus an katuparan.  Siya an Tataramon kan Dios sa gabos na bagay asin sa Saiya an Dios nagsabi manungod sa gabos asin gabos nagiging clarado ki Jesucristo Tagapaglitas, Kagtao asin Kapanoan.

          Pero mga tugang ini gabos mga kasimbagan na makukua niato sa Sagrada Biblia, yaon pa man giraray ining kahapotan asin an kasimbagan magigin personal na.  Bahala na po kita sa satuyang paghorop-horop ngonian na Aldaw kan Dios, ngonian na Domingo, asin iyo ini an ipakiolay niato sa Kagurangnan mantang kita nagpapangadyie sa Saiya.  Mag-ontok kita ki diit na panahon sa satong pagpamibi digdi sa Simbahan o atchan sa satuyang mga harong asin mga cuarto.  Paghorop-horopan niato kun siisay si Jesucristo para satuya.  Kagurangnan, siisay ka para samo?  Kagurangnan, siisay ka para sako?  Amen.