Taon C Ikalimang Domingo kan Ordinaryong Panahon

          Sa Evangelio segun Luca capítulo 5 tinawag ni Jesús an mga parasira ki sira para magin mga parasira ki tawo.  Anong igwa an mga parasira na puede niato makuahan ki lecciones sa ika-limang Domingo na ini kan Ordinaryo na Panahon, para ma-i-aplicar niato sa satuyang mga sadiring buhay espiritual?

An mga parasira mga mahigos sa saindang trabajo bilang parasira kan mg sira.  Ta iyo an saindang kabuhayan, aldaw banggi, amay sa aldaw, udto man, o hararom na an banggi, yaon sinda sa paglapigot.  Ta kun dai, dai man ki pagkakan asin an saindang familia, agom asin mga kaakian, magugutom siring na sinda marurutoy man.  Minsan ngani may doros, may bagyo, yaon sinda sa paghinguha na makasira.  Minsan ngani may borrasca yaon sinda sa pagbingwit ki isda.  Marahay-rahay an paghigos bilang virtud kan sarong Cristiano, kan sarong misionero, kan sarong parasunod ni Cristo na naghihingoha na magpakabanal sa saindang pang-aro-aldaw na pamumuhay.  Minsan ngani yaon an paghugak, minsan yaon an kapagalan, minsan yaon an kawaraan ki gana sa manlaen-laen na razón, an tawong mahigos sa karahayan minahingoha sa karahayan.  An tawong mahigos sa karahayan aroaldaw minahingoha sa paglikay sa sala.  An tawong mahigos sa pagpabanal padagos sana sa pagigin marahay na Cristiano maski ano pa an sabihon kan iba, maski ano pa an ginigibo kan iba, an Cristiano padagos sa pagsunod ki Cristo.  Ta aram kan Cristiano kun siya maghinugak sa pagsunod ki Cristo daing padumanan an saiyang buhay.

          An parasira matinios sa saiyang paghigos.  Maski nauuranon trabajo sana.  Maski naiinitan, nakaag lang ki panangga sa init, trabajo ulit.  Maski nalulula na sa balod trabajo giraray.  Maski nagugutom na padagos an laban.  Ta aram kan parasira na kun dai siya magin matinios gutom siya, patin an saiyang mga namomot-an sa buhay.  Sa satuyang buhay espiritual man orog na importante an pagigin matinios.  Maski may pagsakit, maski may kadipisilan, maski may sacrificio, an Cristiano yaon sa pagsunod ki Cristo.  Maski nakukulugan na siya, maski nakukulugan na siya kan iba, maski patin an Dios pinabayaan na siya, an Cristiano sunod lang ki Cristo.  Maski mahagkot sa kamundoan kan pagsosolo sa pagtubod asin karahayan, maski mainit sa pagcontra kan iba dahil nahihiling kan iba an piggigibo mo, maski may gutom ta kulang man an saimong kusog, an Cristiano matinios para ki Cristo.  Tatao siya magpas-an kan saiyang cruz ta si Cristo nagpas-an asin ipinako sa Cruz.  Aram kan Cristiano na kun dai siya matinios babayaan niya an gabos asin babayaan niya si Cristo.  Kun wara si Cristo, mawawara sa Cristiano an gabos.

          An parasira pano kan paciencia.  Una hora daing sira, once horas dai pa.  Un dia daing sira tulong aldaw na dai pang dakop.  Sige lang an parasira nagbabantay sa bingwit.  Nagbabantay sa hikot ta kun ini maghiro en seguida an saiyang reacción para makua an mga sira.  Ta aram kan parasira na dai minamadale an trabajo niya.  Ta aram kan parasira na kun mawaraan siya ki paciencia, mawawaraan man an agom asin aki niya ki pagkakan.  Iyo man baga an paciencia necesaria asin fundamental sa sarong Cristiano.  Daghang veces maghihingoha siya sa karahayan pero dai niya ini magigibo asin makukua, sige lang ta sa masunod yaon na an kapangganahan.  Daghang veces maghihingoha siyang likayan an mga salang saiyang natuudan, asin gigibohon man niya an mga ini giraray, pero sige lang ta maabot an panahon mawawara man an mga ini sa saiyang sistema.  Danghang veces maghihingoha siyang magsunod aroaldaw ki Cristo, daghang mga aldaw, asin daghang veces sa sarong aldaw, sige lang ta segurado maabot an punto na sa gracia kan Mahal na Dios an Cristiano tunay na magigin cien por cien discipulo ni Cristo bako lang sa tataramon ngonian hasta sa gibo na.

          Dios Ama, boot ko parejo ni Isaias sa primerong babasahon, boot ko na ipadara mo ako.  Suguon mo ako asin sakuyang gigibohon.  Ta aram ko siring sa sinabi ni San Pablo sa ikaduwang babasahon na ining mensaje na isinusugo mong ibalangibog sa bilog na rona iyo an mensaje kan buhay na daing kasagkoran, karahayan para sa gabos, para man sa sako.    Giboha ako Ama na parejo kan sarong maray na parasira, magin man mahigos, matinios asin paciencioso sa pagtrabajo para sa imo.  Lugod ako magin tunay na Cristiano, lugod ako sa tabang kan Espíritu Santo magin tunay na parasunod ni Cristo.  Amen.