Taon C Cuarto Domingo del Tiempo Ordinario Parroquia de Santos Pedro y Pablo Ciudad de Sorsogon 3 Febrero 2013

Taon C Cuarto Domingo del Tiempo Ordinario Parroquia de Santos Pedro y Pablo Ciudad de Sorsogon 3 Febrero 2013

          Nadangog kan gabos an mga gibong ngangalasan ni Jesus kaya kan Siya na mismo an nagduman sa sinagoga asin nagbasa asin nagtaram, gabos nagboot magdangog.  Gabos marhay mantang si Jesus nagtataram kan mga bagay na aceptado kan gabos.  Pero kan nagpoon na si Jesus magtaram kan mga bagay na bakong aceptado kan mayoría, pero kan nagpoon na Siya magtukdo asin an iba natatamaan asin habo pag-akoon an saindang sala, asin pero kan nagpoon na Siya magbalangibog kan Marhay na Bareta na buhay, pero totoong kagadanan sa nagkapira, may nagkapira na naanggot ki Jesus, habo na Siya dangogon, gusto na Siya pahaleon, hasta ngani Siya ipinagadan.

          Si profeta Jeremias nagtaram sa Enot na Babasahon sa capítulo uno na an pagiging profeta sarong kahorohalangkawe na ministerio huli ta saro ining pagpili kan Kagurangnan, al mismo tiempo pano ini kan peligro asin remalaso sa buhay, pero dai maghandal an profeta ta yaon sa saiya an tabang asin bendición kan Dios na iyo an kagpili saiya.

          Mga tugang kong mga Cristiano, kita mga nagtutubod asin nagsusunod ki Cristo.  Sa satong Bonyag, na kinonferma sa satong Kompil asin dorodomingo pinapakusog kan Comunión, kita man parejo ni Cristo padi, hade asin profeta.  Si Cristo Profeta, kita man na mga Cristiano mga profeta man arog ki Cristo.  Maski na ngani convencido kita na ining pagserbi sa Dios asin sa Simbahan bilang mga profeta dakulaon na dignidad asin privilegio aram man niato kun gan-o ini kadificil, minsan ngani pano pa ki sacrificio.  Mababasa niato sa bilog na Lumang Tipan kun pan-o pinasakitan, pinakulogan asin an iba pinagadan an mga profeta.  Mamamate niato sa radio asin macoconsulta niato an datos sa internet kun pan-o an mga modernong profeta ngonian, an mga kagawad sa radio asin periódico, an iba pinagadan na.  Experiencia niato gabos kun pan-o kita, minsan ginigibo niato an satuyang obligación asin responsabilidad bilang profeta, kita man an napaparaot, nakakaag sa alanganin, asin nagigin may sala.  Kun an mga profeta kaitong panahon, an mga profeta ngonian, si Cristo, sinda gabos ipinako asin ipinapako sa Cruz, kita pa kaya.

          Kun arog palan kaini, pan-o na kita?  Hilom na sana kita?  Tatalikdan na niato an satuyang identidad, dignidad, asin obligación bilang mga profeta, tagabalangibog kan Marhay na Bareta, sa panahon man o luwas sa panahon?  Pirmi na sana ining nangyayari ngonian sa panahon ta.  Precisamente dahil sa pagtalikod na ini kan mga Cristiano ki Cristo, dahil sa pagsayuma niato na mga profeta sa Profeta na iyo si Jesus, napapabayaan na mangyari an mga bagay-bagay na pag render cuenta habo man palan talaga kan kadaklan na nagtutubod asin may pagtubod.  Nata naipasa an RA 10354?  Nata puedeng maipasa an plano na ley para sa divorcio?  Nata maisusunod diyan an maski anano pa man na leyes, maski na an mga ini contra sa naturaleza, contra sa moralidad, contra sa tawo mismo?  Ta kitang mga profeta hilom sana.  Para wara daw ki problema, para wara ribok, para di kita magadan.  Buhay pa lang ngani kita, gadan na.  Asin an satuyang mga kaakian mabubuhay sa gadan na sociedad.  Gabos ini dahil di niato ginibo an satuyang misión.  Cristiano, profeta ka!

          Magayunon an mga practical na mga paggiromdom ni San Pablo sa Ikaduwang Babasahon ginono sa saiyang Enot na Surat sa mga Taga-Corinto capítulo 12.  Sa pag-aplicar niato kan mga tataramon na ini sa pagigin niato mga profeta, dakulaon na bagay an tunay na pagkamoot sa profecia.  Sa satuyang pagtaram sa satuyang mga kafamilia, kaugos sa buhay, katrabajo asin mga pag-iriba, kun gibohon niato an pagigin profeta sa pagkamoot; kun an satuyang pagtaram maski kan sisay man naka-ugat sa pagkamoot; kun an satuyang pag-correger sa iba, pag-guía sainda, pagtukdo sainda, gabos nababase sa pagkamoot – daing duda na an lenguaje kan pagkamoot saindang maiintiendihan asin dakul an satuyang magiginibohan dahil dakula an magigin efecto kan satuyang mga profecia.  Sabi ngani ni San Pedro, love covers a multitude of sins, an pagkamoot minatahob kan dakul na kasalan.  May iba kaya na minasabi na nata magparaprofeta pa man, nata magparaprofecia pa man, wara man kita nagiginibohan.  An iba nagsabi na sinda nagin catequista años y años na, asin an mga aki kan saindang kinatesismohan, kinakatesismohan na ninda ngonian pero bagan wara man efecto.  Giromdoman niato an sabi ni San Pedro, an pagkamoot minatahob kan dakul na kasalan.  Minsan ngani man naiisip ko na nata magpara-educar pa sa mga kabataan, mapagalon, parang daing balik, daing balos, bagan tunay na wara efecto, para tayong tumatayo ng mga castillo sa buhangin.  Pero naiisip ko man na kun an sadiri kong mga maestro asin maestra asin mga catequista kan ako aki pa nagsuko man sa sakuya, segurado menos an sakuyang naaraman ngonian asin menos man an sakuyang naisabuhay.

          Mga tugang si Cristo profeta, kita mga Cristiano mga profeta.  Si Cristo itinao an buhay Niya sa satuya sa Saiyang pagprofecia.  Kita man itao man niato an satuyang buhay sa Saiya asin sa bilog na Simbahan sa pagprofecia, ini man satuyang ikagadan, o ini man para bagan dai man ki efecto sa iba.  Amen.