National Migrants' Sunday

National Migrants’ Sunday February 17, 2013 Parroquia de Santos Pedro y Pablo, Ciudad de Sorsogon

            Si misis nakiolay kay mister na ma abroad siya ta nagdadarakula na an saindang tolong batit asin an sueldo ni mister bilang tricycle driver dai kasya.  Lalo na pag mag colegio na an matua ninda.  Kaya nag-ibang bansa si misis, maski habo man kan saiyang mister asin naghaharaya asin habo butsanan an saiyang pantalon kan saiyang puto na aki na maski na sadit pa aram na kun anano an kahulugan kan pagbaya asin pagsolo, kun anano an boot sabihon na dai an saiyang ina.

Duman sa abroad si misis nagkuskos ki sahig, naglaba ki mga cortina, nagkaon spaghetti, naging hielo sa hagkot, namatay pirang veces sa pungaw.  Pero padagos si misis, ta pirang ribo man an euros na naipapadara niya sa saiyang mag-arama.  Mga tulong Pasko man siya dai nakauli, tulong mga Fiesta Patronal kan saindang banwa na dai nakakakan puto asin dinuguan, mga tulong birthdays na dai nahiling an saiyang mga nagdadarakula na na mga aki.  Kaipuhan magkayod ta an euros kaipuhan sa educacion kan saindang mga batit.  An saiyang absencia pinapanoan na lang niya kan mga kun mga anoano na regalo, mga gadgets, na pinapadara pag ma cumpleaños an cada miembro kan saiyang familia na nawalat sa Pilipinas.

Sa ikaapat na taon nagbakal na siya ki ticket sa aeroplano ta ma-atender ngani kan graduation ni nini, saiyang matua.  Pag-abot niya sa harong, di na man palan trycicle driver an asawa niya kaya palan wara man lamang nagsundo sa saiya sa bus station kan banwa ninda sa provincia.  Pinabakal na palan ini mi nister matustusan an mga vicio asin mga babayi ni mister.  Di man palan makagraduate si nini ta may nono na man, four months old na.  An nakabados wara man ki trabajo pa ta parejo man niya, ini man undergrate pa, may duda ngani kun ini papanindogan an saindang nono.  May duwa pa man si misis na batit, kaya ini siniway na niya sa mag-ama niya asin pina-istar niya niyan sa manghod niya para mag-alaga sainda.

Nagbalik siya sa abroad para magkuskos ki sahig, maglaba ki mga cortina, magkaon pasta, maging hielo sa hagkot, mamatay pirang veces sa pungaw.  Kay an euros baya kaipuhan ipadagos na ipadara kay pan-o man ini na duwa pa niya na mga aki, pan-o man an magurang niya na an futuro bagan daing éxito, pan-o man an familia niya.

            Mga misis, kun an razón nindo sa pag-abroad, kamo man po mga mister, kun an razón nindo sa pang-ibang bansa euros o dollars sana, cuarta sana, bai na po pagdagos paglupad.  Magtener na sana kamo digdi sa Pilipinas, kaiba an saindong mga namomot-an sa buhay.  Digdi kita maghingoha, digdi kita maglapigot, digdi kita mag-trabajo, mag-negocio, magtukdo, magsirbi bilang mga nurses sa mga hospital, didi maging mga engineer o architect, didi maging mga doctor.  Magsirbi bilang Filipino sa kapwa Filipino.  Alagaan an sadiring mga aki, bako mga aki kan iba.  Labahan an sadiring mga cortina bako cortina kan iba.  Kuskusun an sadiring sahig, bako sahig kan iba.  O kun talagang kaipuhan mag-ibang bansa tabi man sa contrata na dos años bakong maging veinte años, sa orolay na temporary sana bakong maging permanent na, ta pag-uli po nindo wara na kamo mauulian.  Mas maray ngani, kun kaipuhan talaga mag-migrar, an bilog na familia an magduman.  Puedeng pa saro saro, pero hingohaon na gabos makaduman para tunay na kamo sarong familia.  Nag-asawa pa po kamo kun masiwayan man sana.  Nag-aki pa kamo kun an maalaga sainda ibang tawo asin an aalagaan nindo aki kan iba.  Asin an mga euros, o mga dollars man, o kun ano pa man yan, na ribo ribo sa pesos kun ma-recibe na kan saindong ka-familia iyo pa lugod an nagiging causa sa dakulaon na por ciento kan mga situaciones kan pag-iriwal kan mag-agom, kan pagkahulog sa kamundohan asin vicio kan mga kaakian, sa pagkaraot kan futuro bako lang kan cada miembro kan familia kundi man pagkaraot mismo kan bilog na familia.  Mga misis, kamo po an kaipuhan ninda mister bako an cuarta nindo.  Mga mister iyo man po saindo, kamo po an kaipuhan kan saindong mga misis bako an mga regalo nindo.  Mga magurang kamo an kaipuhan kan saindong mga kaakian bako an mga gadgets asin mga latest  na kung mga anano na suhol saindong mga aki sa saindong absencia.

            At least mga tugang gabos po ini iyo an sabi sako ni misis na ngonian yaon pa man gihapon an paglapigot sa ibang bansa.  Ta kun di pa po nindo nahahalata idto pong inistorya ko kasubago bakong MMK kun di tunay na istorya, por desgracia sosog po idto sa tunay na buhay.

            Ngonian po na National Migrant’s Sunday ipamibi po niato sinda misis asin sinda mister na yaon sa ibang bansa asin an saindang mga mister, mga misis asin mga kaakian na nawalat digdi sa satong mga banwa.  Amen.