Taon C Ika-tolong Domingo kan Cuaresma

Kan kita mga aki pa, pag kita may nagigibohan na maray an satuyang mga magurang nagtatao ki premio sa satuya.  Pag kita nakakagibo ki maraot, kita man tinatawan ninda ki lección.  Sa paagi man kan mga ini pinapahiling ninda an saindang pagmangno asin pagkamoot sa satuya.  Ta an marhay na gawe kaipuhan ipadagos asin an maraot kaipuhan palitan ki marhay.

          Kita mga aki kan Dios asin iyo man an ginigibo Niya sa satuya siring kan ginigibo kan satuyang mga magurang sa satuya.  Kun kita marhay, premio an tinatao Niya sa satuya.  Kun kita maraot, tinatawan man kita ki lección.  Yaon Saiya an iniciativa para kita makabalik Saiya sa pagbakle asin pagsolsol kan kasalan.  Iyo baga an namate niato sa parábola kan Naglagalag na Aki sa Evanglio kahapon según Lucas capitulo 15.  Boot kan Dios na kita magbalik sa Saiya, maski ano pa man an Satuyang naginibuhan.  Ini man baga an boot sabihon kan kumpisal, iyo baga an insisimbolo kan kumpisalan sa satuyang mga simbahan.

          Ngonian pero sa satuyang nadangog na Evangelio según gihapon ki Lucas capitulo 13 may hapot an katawohan ki Jesus.  May nagkapira daa na tawo na nag-osip ki Jesus dapit kan mga taga Galilea na ipinagadan ni Pilato mantang nagdodolot sinda nin mga atang sa Dios.  Ini para sa mga Judio makangingirhat na pagkagadan ta an saindang dugo naka-mezcla sa dugo kan mga hayop na saindang inaatang.  Naghahapot an mga tawo na anano baya an nagibohan kan mga tawong idto kaya dapat sindang magadan arog kaidto.  Dinagdagan pa ini ni Jesus.  Naghapot siya manongod sa diez y ocho katawong nagkagaradan kan marumpagan kan tore sa Siloe.  Sinda man nagadan sa makangingirhat na paagi, daing preparación, biglaan, asin ronot sinda.  An enot gibo kan tawo, an pangduwa bakong boot kan tawo, nangyari sana.  An hapot ngonian sa mga caso na ini sinda ba may nagibohan man na makakangingirhat para magadan sa makangingirhat na paagi.  Simbag ni Jesus:  “Bako!”  Sabi pa niya: “Alagad sinasabihan ko kamo na kun dai kamo magbakle, magagadan man kamo gabos arog sainda.”  Puedeng maging castigo ini kan Dios sa satuya, pero al mismo tiempo bakong pirmi boot sabihon kaini castigo.

          May sarong ina na pirang bulan man nagtungka asin naglapigot para sa saiyang aki na may cáncer.  Pirang bulan man ini ng aki naghingoha sa tabang kan ina, kan ama asin mga tugang.  Sa katapusi an aki na may cáncer nagadan.  Siya na maboot na aki, magalang, matinabang según sa gabos na nakakilala niya sa kataraed ninda, sa escuela asin sa saiyang mga kaugos.  Pirang aldaw sana pagkatapos kan dapit kan aki, an familia yaon naman sa pagtangis ta an ama na-accidente asin nagadan.  An ina na nawaraan kan aki ngonian nawaraan naman ki agom.  An mga aki na nawaraan ki tugang ngonian nawaraan naman ki ama.  Sabi kan ina, “Padre dai na ako naghahapot ki razón sa Kagurangnan, dai na ako naghahapot anano kay nangyayari ini sakuya?  Ubos na an sakuyang mga luha, paas na ako sa kaiiyak, an iyak nagin silencio na sana.  Sinasabi ko na sana sa Dios, Kagurangnan di ko na kaya, wara ako maintindihan prto yaon ako Saimo Ama, bahala ka na!”

          Mga tugang an mga maraot na bagay sa satuyang buhay totoong puedeng maging castigo sa satuyang mga maraot na gawe.  Castigo na al mismo tiempo sarong agyat sa satuya na talikudan an karat-an asin magbalik sa Kagurangnan.  Pero minsan may mga nangyayari sa satuyang buhay na maraot na puede niatong sabihon na di man castigo satuya ta kita nagin marahay man, kun di iniciativa pa kan Kagurangnan para kita maglaog sa mas personal na relación sa Saiya, kita mas magin marhay pa, kita mas magin banal pa.  Iyo baga an historia ni Job, iyo baga an historia kaidtong ina na duwang veces man nagadan sa pagkagadan kan saiyang mga namomot-an na aki asin agom.  Puede ser na sa horas kan kabiyadean asin pagtangis dai niato ini nahihiling, ta an satuyang mga mata napapano kan luha asin dai kita makahiling, ta gabos ngani parang dai ki sentido asin dai ki razón, pero minaabot an panahon asin an luha dai na, na an mga bagay-bagay nagigin claro asin nahihiling niato an mga paghiro kan Kagurangnan.  Terrible pero salamat sa Dios kita nagigin mas marahay,  terrible ta kita nakukulugan pero sa paghurma na ini kita nagigin mas marhay na tawo, terrible ta kita nagagadan man pero sa kagadanan na ini kita nabubuhay liwat mas marhay pa na tawo.

          Lugod sa mga tragedia kan satuyang buhay, na dai niato naiintiendihan kay anano nangyayari, parejo kaidtong ina sabihon niato, Kagurangnan dai na po ako maghahapot kan razón kay anano nangyayari an mga ini sakuya, kun di bahala ka na, aki mo ako, maghihingoha ako na magin marhay na aki mo, kapot mo an sakuyang buhay, an samuyang destino, bahala ka na Ama ko, Ama niamo!  Amen.