Lucas 23:43 NGONIAN MAN SANA MAIBA KA SAKO SA PARAISO

NGONIAN MAN SANA MAIBA KA SAKO SA PARAISO

          Enot, si Jesús tinuya-tuya kan mga fariseos, esribas asin mga kapadian.  Siya saindang ipinagadan sa mga kamot kan mga Romano, sa kurahaw kan mga Judío.  An mga Judío sa Dalan kan Cruz siya man saindang pinag-olog-olog.  Ngonian hanggan an mga criminal mismo sinda man nagtuya-tuya sa satong Kagurangnan si Cristo Jesús.  Naglalala asin mas naglalala an pasakit sa satuyang Dios, bako lang física pati man psicológica asin emotiva.  Bako lang mga hampak, pati mga insulto asin maraot asin makulog na mga tataramon.  Siisay an nag-defensa saiya, bako an saiyang mga discípulos asin apóstoles na nagkawarara sa saindang pagtakas para dai madamay sa pag-condena sa Maestro Jesús.    Bako kun siisay na nakadangog sa saiyang mga Marhay asin Nakakaligtas na mga Tataramon.  Bako kun siisay na mga nakahiling kan saiyang mga Milagro bilang Aki kan Dios.  An nagdefensa saiya saro man na parakasala, saro man na criminal.  An tawo dakulaon na kasalan an kayang maginibuan pero dakulaon man na karahayan an kayang ipahiling digdi sa ibabaw kan daga hanggang siya may buhay pa.  Sa karahayan boot kaining marhay na criminal bako lang paggiromdom an itinao saiya ni Jesús kun di kasiguraduhan kan buhay na daing kasagkoran.  Sobra sobra pa an itinao que sa saiyang hinagad.

          Mga tugang sa pagtubod, habang kita nabubuhay yaon an oportunidad na itinatao sa satuya kan satuyang Dios Ama na magbalik Saiya.  Yaon an pagkumpisal.  Yaon an pagpangadyie.  Yaon an pagsolsol asin pagbakle.  Buwa na arog na kita kaiyan asin dai na kita ki magiginibuan.  Buwa na kita tawo sana kaya ok lang na kita magkasala.  Buwa na puede na an puede na ta aram man kan Kagurangnan na kita maluya.  Hanggang kaya niato magbakle asin magsolsol, hanggang kaya niato an más pa sa ngonian, an más pa sa ginigibo niato ngonian, sige kita.  Ta hiling niato na an premio daing iba, asin nada menos que an buhay na daing kasagkoran.  Sa satuya man sasabihon kan satong Kagurangnan Jesús: NGONIAN MAN SANA MAIBA KA SAKO SA PARAISO.