Fifth Sunday of Lent Year C BICOL

          Nagdadangadang na asin yaon na sa satuyang mga pintoan an Semana Santa.  Kaya ngani ini na ika-lima na Domingo kan Cuaresma iyo an pigtatawag na Passion Sunday kun saen mas pinapa-igting kan cada Cristiano an saiyang preparación sa maabot na Pagsakit, Pagkagadan asin Pagkabuhay-liwat ni Jesús.  Ngonian ngani sa satuya man na liturgia, tradición kan Simbahan na tahuban na ki uve na mga tela an gabos na imágenes asin estatua sa laog kan Simbahan.

          Mga preparaciones na marhay sa Cuaresma iyo baga an mga minasunod: pag-ayuno asin pag-abstinencia, pagpangadyi asin paglimos.  Pag-ayuno na iyo an pagbawas ki pagkakan asin pag-abstinencia iyo an pag-was sa pagkakan ki carne, mga sacrificio na pig-aatang sa Kagurangnan sa kapatawaran kan kasal-an asin sa pagpahalaga sa espíritu que sa hawak.  An paglimos iyo an pagtao sa kapwa na mas nangangaipo sa sadiri bako lamang sa espíritu kan sacrificio kun di man para sa pag-servi asin pagtabang sa mga mas nangangaipo.  An pagpangadyi iyo an paghingoha na maki-olay sa Dios na dai nahihiling para man mas maging mahuyo asin mamomot-on sa mga tugang niato na nahihiling.

          An Evangelio ta ngonian ginono ki Juan capitulo 8 saro sa mas kilala na mga cuento sa buhay ni Jesus asin saro man ini sa mas nagpapahiling kan puso ni Jesus na justo pero al mismo tiempo maheherakon.  Sarong babae an nadakopan na nakidurog sa bako niyang agom kaya siya pigturuklang kan mga fariseos asin mga katawohan sa atubangan ni Jesus.  Siya daa an maghusga.  Inimbitaran ni Jesus sinda, kun sisay an daing sala siya an maunang magbato kan gapo para gadanon an babaeng nagkasala sosog sa ley ni Moises.  Saro saro nagharale sinda ta nahiling ninda na sinda man parakasala.  Dai hinusgahan ni Jesus an babae, saiya ining tinanidan na dai na magkasala ulit.  An Kagurangnan marahayon asin maheherakon.  Justo si Jesús dahil an sala sala, pero maheherakon man Siya ta aram niya na may oportunidad kitang mag bag-ong buhay hanggang buhay kita.  Habang may hinangos an tawo may pag-asa.

          An mga kasalan kan hawak tunay na nagkakawsa sa satuya ki mga makusugon na mga tentaciones.  An demonio digdi ginagamit an satuya mismong mga natural na inclinación asin mga imaginación para iineksyon an saiyang mga marigsok na mga kaisipan.  Pag nahuhulog kita sa mga bagay-bagay na mga nahihiling na contra sa santa pureza an mga ini dai man nahahale pa sa imaginación kun di pabalik-balik ini asin minsan ngani makusog pa que sa actual na paghiling.  Sa imaginación nagsusunod an mga satuyang mga fisical na reacción sa gabos na ini.  Madalion mahulog.  Sa isip, sa gibo.  Kita man nagiging parejo kan babaeng parakasala sa satuyang mga sadiring mga situaciones.  Kita man itinutuklang ngonian sa atubang ni Jesus para kita husgahan asin gadanon.

Mga tugang, bako kitang pighuhusgahan kan Kagurangnan.  Sa mga kasalan kan laman an saiyang invitación sa gabos an pagtindog giraray, an pagbalik-loob giraray sa Dios, an paghingoha giraray sa santa pureza.  Ano man kun nagkasala, an importante magkumpisal.  Ano man kun naulit sa pagkakasala, an importante na magbalik sa pagkumpisal.  Kun pirang veces kita nadapa, iyo man pirang veces kita magtindog giraray.  Iyan na supog na iyan hinahale kan demonio sa momento kan kasal-an asin saiyang binabalik sa momento kan pagkumpisal.  Haleon niato an supog, isipon niato na si Jesus na marahayon asin maheherakon an satuyang dinuduman.  Al mismo tiempo gibohon man niato an gabos para makaiwas sa mga kasal-an kan laman, na tunay na magin mga tawo na nabubuhay sa santa pureza, sa kabinian.  Magin practical kita: ingatan niato an gabos na naglalaog sa satuyang mga mata, an gabos na satuyang namamate, an gabos na satuyang mga imaginaciones.  Kaya ngani baga may SPG sa televisión, kaya ngani baga may mga película asin mga programa sa TV na dapat dai niato pighihiling, kaya ngani baga magin maingat kita mga babasahon niato, sa mga magazines, sa mga periódico, sa internet, kaya ngani baga dapat maingat man kita sa mga jokes naton asin sa satuyang mga pag-orolay.  An mga tentaciones dyan nagpopoon.  Pagmakalaog na an demonio sa satuyang mga mata asin mga talinga, dakulaon na an porcentaje na kita mahuhulog sa karat-an.  Sa ocasión pa lang kan kasalan dumulag na kita.  Sa tentación pa lang dumulag na kita.

          Gabay pa kan mga banal contra sa kasal-an kan laman iyo an mga minasunod, an pag-ayuno asin pag-abstinencia, asin an pagpangadyi asin an devoción sa Ina niato sa pag-rosario.