Palm Sunday Year C

          Ngonian iyo an Domingo de Ramos, Domingo kun saen an satuyang mga palaspas na prineparar satuyang benendisyonan kaninang aga asin sa procesión giniromdom niato, sa historia ni Lucas capitulo 22 sin 23, an histórico na paglaog ni Jesús sa Jerusalem sa Hosanna kan katawohan asin pagkaag ninda kan saindang mga alikboy asin langkoy sa inagihan kan asno kun saen nakasakay an Hijo de David.  Katatapos pa sana ni Jesus ibalik an buhay sa saiyang amigo na si Lázaro asin an katawohan handa na si Jesus i-proclamar saindang hade sa pag contra sa mga dayuhan na mga Romano, siring man naka-decisión naman an mga fariseos asin mga kapadian na ipagadan si Jesús dahil nahihiling Siya na peligro sa nación asin sa saindang sadiring mga poder.

          An Aki ni David naglaog sa ciudad ni David sakay sa sarong asno bilang pagpano kan profecía ni Zacarias capitulo 9 versiculo 9.  An mga tawo nahihiling Siya bilang saindang tagapagligtas laban sa dayuhan kaya sadiri nindang alikboy asin an mga langkoy na yaon sana sa gilid kan inagihan ni Jesús saindang ikinaag sa agihan kan asno.  Si Jesús man maluwas sa Jerusalem sa profecía na siya magsasakit asin magagadan.  An mismong mga tawong ini iyo man o an mag-co-condenar saiya o an magtitirindog sana asin maghihiling sana mantang an Tagapagligtas hinahampak, kinukurunahan ki tunok, pinapakaraw-ayan, pinapas-an an cruz, pinapako asin ginagadan.

          Mga tugang ngonian na Domingo de Ramos iyo an poon kan Semana Santa na importantehunon sa satuyang mga Cristiano Católico ta iyo an magdadara sa satuya sa Pasko kan Pagkabuhay-liwat ni Jesús.  Kita ilinigtas Niya sa Cruz, sa saiyang pagsakit, pagkagadan, asin pagkabuhay-liwat, dinaog niya an demonio asin inagaw kita kaya ngonian sa Bonyag, Kompil asin Comunión kita mga aki nin Dios parejo niya.  Kita mga aki sa Aki, salamat sa Cruz asin sa Resurrección.  Marhay mga tugang, sa satong pagpoon kan Semana Santa, paghorop-horopan ta an mga momento na kita man nagin balimbing o natalaw parejo kan mga nag-Hosanna ki Jesús ngonian na Domingo de Ramos.  Ako daw naging maimbod na Cristiano, taga-sunod ni Cristo, poon sa kapinonan hanggang ngonian, hanggang sa katapusan, sa kamurawayan man o sa kabiyadean?  O ako daw pag nahihiling ko na dejado ako sa pagiging Cristiano minabaligtad ako kaya sa pag-Hosanna ko ki Jesús an masunod ko na kurahaw iyo an ipako Siya sa Cruz?  Ako daw pano nin coraje asin makusog an boot sa pag-proclamar kan tama asin sa pag-condenar sa sala maski ngani ini sakuyang ikapahamak o hanggang ikagadan?  O ako daw pag nahihiling ko na tagilid ako sa pagiging Cristiano minahilom na sana asin minagilid asin minahiling na sana parejo kan mga Judío na primero kuminurahaw kan Hosanna, asin pag rendir cuenta silencio na sana?  Importantehunon ini ngonian na mga hapot ta an satuyang kasimbagan kaini sa satuyang mga sadiri iyo an satuyang mga magigin criterio asin dahilan kun nata por ejemplo iboboto niato an sarong marhay na político o an sarong TRAPO na candidato; kun nata magcocontra kita sa RH LAW o maghihilom na sana kita dahil, según sa iba, total ley na iyan kan gobierno Filipino; kun nata magcocontra kita sa divorcio asin aborto na isusulong kan iba na mga congresistas asin senadores na en primero puesto satuyang binoroto, o magsusuporta kita sa mga ini dahil sa sala na opinión kan freedom daa kan consciencia; kun nata magcocontra kita sa mining asin sa geothermal power plant dahil aram niato na an mga consecuencia kaini lampas sa mga buwa na supuesto na mga ventaje, o maghihilom na sana kita ta total harayo man an mga iyan sa satuya.

          Mga tugang kong mga Cristiano Católico, lugod kitang mga nag-o-Hosanna ngonian ki Jesús sunudon niato Siya asin itao niato an satuyang buhay sa Saiya hanggang sa katapusan.  Lugod bako kitang maging mga balimbing o mga talaw.  Ta kun siring, yaon man ngonian si Jesús na Paraligtas sa satuyang atubangan, ipapako asin ipapako niato Siya ulit sa Cruz.  An balimbing o talaw na Cristiano iyo an nagboboto kan TRAPO, iyo an nagsusuporta sa RH LAW, iyo an dai makikiaram sa boto contra sa divorcio asin aborto, iyo an maghihilom na sana sa mining asin geothermal power plant, asin, pagkatapos mag-Hosanna iyo man an magsusuriyaw ipako si Jesús sa Cruz.  An pagpili nasa satuyang mga kamot.  O Hosanna o Cruz.  Amen.