Sa
Banal na Sacramento kan Pagkumpisal, pagluhod ta sa kumpisalan, nagpopoon kita sa ngaran kan Ama, kan Aki, asin kan
Espiritu Santo. Sa ngaran kan Ama,
ta iyo an Dios Ama n satuyang nakukulugan cada vez na kita magkasala. Siring sa sinabi sa Evangelio, sabi kan
lagalag na aki, “Ama ko, nagkasala ako sa Dios asin saimo.” Maski na an kasalan ginibo niato tumang sa
satuyang mga kamanghod o tumang sana sa satuyang sadiri asin parang dai ibang
naaapektohan o dai ngani naaraman kan iba, an kasalan pirmi kasalan sa Dios.
Entonces
sinasabi niato sa padi, habang kita nakaluhod sa kumpisalan, Padre, bendicioni ako ta ako nagkasala. An iba naghahapot, anano kay benebendisyonan
pa, nagkasala na ngani? Kaipuhan an
bendición kan Kagurangnan ta gracia baga an pagbakle asin pagsolsol. Namate niato sa Evangelio kun pan-o an
lagalag na aki tinawan kaining gracia asin an matua na aki dai saiya ining
gracia. Sabi kan Evangelio, “Naanggot an
matuang aki asin habong lumaog sa harong.”
Pira an midbid niato na tinawan kaining gracia asin en seguida sinda
naghagad ki kapatawaran sa kumpisal.
Pira man an midbid niato na yaon na, hararomon na sa pagkakasala pero di
pa ninda mahiling na yaon sinda sa kumunoy, dai pa sinda nagbabakle asin
nagsosolsol. Pasalamat kita sa Dios sa
kumpisal ta kita tinatawan niya kaining gracia kan pagbakle asin pagsolsol.
Sinasabi
niato sa padi sa kumpisal, an urhi ko na
pagkumpisal iyo kan nakaagi na… Asin
sasabihon niato digdi an ultimo niato na pagkumpisal. Makakatabang ini sa padi sa paghorop-horop
kun ano an mga silot atchan na puede niyang maitao sa satuya na nagkukumpisal
para mas matabangan kita sa paghingoha sa karahayan asin sa paglikay sa
kasalan. Iba man an mga silot sa mga
pirmi nagkukumpisal, iba man an mga silot sa mga primera vez pa lang
nagkukumpisal o haloy na an ultimo na saiyang pagkumpisal. Iba man baga an nagin pagtrato kan ama sa
Evangelio sa lagalag na aki, iba man an nagin pagtrato niya sa matua na aki.
Sa
puntong ini sinasabi na niato sa padi an gabos niatong mga kasalan. Nakaka-cierto kita gabos na an gabos na
satuyang sasabihon sa padi sa laog kan kumpisal dai niya ini isasabi sa iba, ni
sa pahapyaw na paagi, ta nag-re-reynar sa banal na sacramento na ini an segreto
sacramental asin kun ini saiyang balgahon an padi ma-e-excomunicar latae sententiae, ginibo pa lang niya
iyan excomunicado na siya. Nakaka-cierto
kita entonces na gabos niato na sasabihon, sinasabi niato ini directamente sa
Kagurangnan, asin an padi instrumento sana kan Dios. Dai kita masopog na sabihon gabos asin sa
detalle an satuyang mga kasalan ta dai man kita mapapatawad asin dai man kita
matatabangan kun an mga ini babawasan niato, o itatago, siring na dai kita
matatabangan kan medico kan hawak kun bako niato sinasabi sa doctor an gabos
niatong mga kabiyadean sa hawak. Marhay
na bagay na antes kita magluhod sa kumpisalan kita naka-gibo kan examen kan
consciencia, siring kan namate niato sa lagalag na aki sa Evangelio, “Kan
makapag-isip-isip siya.” An iba pag
nag-e-examen kan consciencia ginagamit an Sampolong Tugon bilang guia, an iba
man an mga Beatitudes ni Jesu
Cristo. Maski sa anong paagi puede niato
ining gibohon basta gibohon niato ini ki marhay. An sarong marhay na examen kan consciencia
nagreresulta sa sarong marhay na pakipag-olian sa Dios sa kumpisal. An iba pag nagkukumpisal inuuna an
pinakamagabat niyang kasalan, asin an iba man ini saindang inuurhi. Maski ano pa man an orden kan satuyang
pagkumpisal an importante sabihon niato gabos asin sa detalle. Ano daw ini ano na supog, nawawara pag kita
naggigibo kan sala, asin nagbabalik pagkatapos niatong magkasala asin pag kita
na mabalik sa Kagurangnan. An sopog
hinahale kan demonio sa acto kan kasalan, binabalik ini niya sa acto kan
pagkumpisal.
Pagkatapos
niato isabi sa Dios an gabos niatong mga kasalan, dai tulos kita maghale. Ta yaon na an silot na sasabihon sa satuya
kan padi. Kaya baga marhay na bagay na
magkumpisal kita sa mismong padi regularmente.
Mas nakikilala kita asin mas matatabangan kita na pakarhayon an satong
kakusugan asin labanan an satong kaluyahan ta precisamente mas kilala na
kita. Sabi ta baga haleon na yan na
sopog na yan. Iyo man baga an marhay na
practica sa medicina, marhay kun pabalik-balik kita sa mismong doctor kan
satuyang pagkaaki asin pagdakula ta siya na an nakakakilala kan historia kan
satuyang mga kakusugan asin mga kahelangan.
Entonces
masabi an padi na kita bilang penance
mamibi kita kan sarong pangadyion, magibo kita kan sarong devocion, o kan
sarong sacrificio. Ini ba kabayaran para
sa satong mga kasalan? Bako, ta an tawo
na nagkasala dai makakabayad para sa saiyang kasalan kun di an Dios man giraray. Kaya man baga sa pagpoon kan pagkumpisal
nagpapangurus kita. An mga merito kan
cruz an nagbabayad para sa satuyang mga kasalan. An aki man baga na lagalag dai man nanggad
nagbayad para sa saiyang mga kasalan.
Parte kan dakulaon na pagkamoot asin pag-intiendi kan ama na maheherakon
an pagpara kan gabos niyang mga kasalan, dai ngani niya minate an mga razon kan
saiyang aki. Sabi kan Evangelio, “Harayo
pa, natanawan na siya kan ama niya.
Naherak nin marhay an saiyang ama, kaya nagdalagan ining nagsabat saiya,
kinugos siya saka hinadokan.”
Nagdadangadang pa lang kita sa kumpisalan pinapatawad na kita. Nagdedesisyon pa lang kita magduman sa
simbahan magkumpisal pinapatawad na kita.
Orog na kita namomotan kan Dios Ama.
Asin
ngonian madatong an pinaka-importante na parte kan Banal na Sacramento kan
Pagkumpisal. Sinasabi kan padi, an Dios
mismo sa paagi kan padi nagsasabi, “asin
pinapatawad ta ka kan saimong mga kasalan, sa ngaran kan Ama, asin kan Aki asin
kan Espiritu Santo.” Kita mapangurus
man asin masimbag, “Amen.” Gabos niatong mga kasalan pinapatawad. Maski an mga nalimutan, an mga kasalan na dai
na nagigiromdoman maski naggibo na ngani kan marhay na examen kan consciencia,
basta dai liningawan, gabos saiyang pinapatawad. Parejo kan namate niato sa Evangelio, “Dali
kamo; daraha nindo digdi an pinkamarahay na gubing asin sulotan nindo saiya;
singsingan nindo siya saka sapatosan.”
An Dios Ama binabalik kita sa satuyang original na estado, bagan dai ki
nangyari, tinatawan giraray kita ki oportunidad na magpoon, mamuhay giraray sa
karahayan harayo sa kasombikalan. An iba
naghahapot, nata man ako magkupisal sa padi, siya tawo man parejo sakuya, bako
man siya Dios, asin siya makasalan man parejo ko man. Mas marhay daa magkumpisal na sana sa irarom
kan puno kan mangga. Tunay na yaon sa
mga kapadian an dakula na agyat na magin banal aroaldaw para más maka-servi pa
sa Dios asin sa Simbahan. Tunay na tawo
lang siya asin bako Dios pero precisamente yaon siya ta an Dios mismo an
nagboot kan saiyang ifinundar an Banal na Sacramento na ini asin ginusto niya
na sabihon niato sa padi an satuyang mga kasalan, atubangon an satuyang
kasopogan, akoon an satuyang mga kasalan, asin an Dios mismo an nagdadangog,
asin Siya mismo an nagpapatawad. Sa
kumpisal may kasiguraduhan kita na kita pinatawad kan Dios, na kita pinatawad
kan Ama, ginugubingan, sinisingsingan, sinasapatosan. Sigurado kita kan kapatawadan kan kasalan sa
kumpisal. Pero dai ki kasiguraduhan sa
irarom kan mangga, ta an aram ko kun ikaw nagkumpisal sa irarom kan mangga asin
may magsimbag saimo magdalagan ka na.
Finalmente
sasabihon kan padi, pinatawad ka na kan
Kagurangnan, lakaw sa katoninongan, salamat sa Dios! Iyo man baga an satong namate sa Evangelio, “Daraha
digdi an pinatabang ogbon na baka asin bunoa!
Mag-ogma kita! Magbangkete
kita! Huli ta an aki kong ini gadan na,
alagad ngunyan nabuhay liwat; nawara, alagad nakua na. Kaya nagpoon sindang mag-ogma.” Mga tugang, ngonian man na Laetare Sunday, Domingo kan pag-ogma ta
nagdadangadang na an Pasko kan Pagkabuhay-liwat, kita man mag-ogma sa pagbakle
asin pagsolsol kan satuyang mga kasalan.
Digdi sa Cathedral cada Sabado después kan Santa Misa Anticipada, más o
menos a las seis y media, o antes an
Misa kan pagkahapon, o ngonian man na maabot na Semana Santa sa Kumpisalang
Bayan, magkumpisal kita, magbalik kita
sa Ama. Marhay man na bagay na
paulit-ulit kitang magkumpisal ta pag nadadapa baga an importante an pagtindog
giraray. Pag nalalagalag an importante
an pagbalik sa Ama sa Banal na Sacramento kan Pagkumpisal. Amen.
