Reflexión Personal sobre la Fiesta de Santo Niño 2013

Reflexión Personal sobre la Fiesta de Santo Niño 2013:

            Saro sa mga ugali kan mga kaakian na naaapreciar kan gabos iyo an saindang pagigin simple.  Tugote po nindo akong maghorop-horop sa duwang aspecto na mga ini kan simplicidad.

Enot, pag an mga kaakian nasasala asin may nagibo na bakong marhay, minaako tulos, daing mga dahilan, naghahagad disculpa asin an buhay napadagos.  Ni dai ninda pigpaparagiromdom an pagkakasala.  Saro ini na bagay na puedeng nawawara sa buhay kan sarong adulto.  Ngonian kita na mga dakula na dai na simple kun di complicado na.  Pag kita nasasala, dakulon an satuyang mga razones asin justifications sa satuyang sadiri, hindi natin sinasadya, dai man niato talaga pigtutuyo, may sala man an iba.  Halos sabihon niato na wara na kita ki sala.  Ini nahihiling man niato sa satuyang pagkumpisal.  An mga kaakian pag nagkukumpisal sa padi, pigsasabi an kasalan, asin tapos.  Kitang mga dakula na pag nagkukumpisal, dakulon an satuyang mga dagdag asin an halipot nagin halaba, asin an simple nagin complicado.  Yaon na an satuyang supog.  Ano daw an supog ano, pag kita naggigibo pa sana kan kasalan nawawara, pag yaon na kita sa pagkumpisal sa Kagurangnan minabalik.  Magpamibi kita, Kagurangnan, magin simple man lugod ako sa gabos na bagay parejo kan mga aki.  Kun ako may pagkakasala, lugod ako simplemente maghagad ki kapatawaran, asin maghinguha na magbag-ong buhay.

            Asin pangduwa, pag an mga aki may kaipuhan simplemente minaduman sa saindang mga magurang asin minahagad.  Pag an mga aki may gusto gibohon pero di ninda kaya, simplemente minaduman sa mga dakula na para magpatabang.  Pag an mga aki natatakot sa kun ano man na saindang pigkakatakutan sa particular na edad ninda, minadalagan sa saindang mga mama asin papa sin nahagad sainda kan protección.  Kan an aki nagdakula na, naturalmente nagin independiente na asin prinoprotegeran niya ining saiyang independencia halos bilang sarong diamante.  Pero may veces na bagan ining independencia nagigin arrogancia.  May kaipuhan, di niya makuwa, di pa nanggad maghagad.  Di niya kaya, maski anong pirit, asin pirang horas, días, meses, años na sa paghingoha asin dai pa, dai pa nanggad nagpapatabang.  May kinakatakotan, dai pa nanggad minadalagan sa protector.  Simplicidad an mahiling niato kun ano an tunay na situación asin simplicidad man an mahiling niato kun ano an tunay na solución.  Magpamibi kita, Kagurangnan, magin simpe man lugod ako sa gabos na bagay parejo kan mga aki.  Ako nangangaipo, Ika sana an makakapano kaini.  Ako nangangaipo tabang, Ika sana an makaka-asistir sa sakuya.  Ako natatakot, kakapotan ko an Saimong Kamot, asin dai na ako magbubutsan.

            Mga tugang kong mga Cristiano, parasunod ki Cristo, lugod kita gabos magin man mga simpleng tawo, parejo kan mga aki, parejo ki Señor Santo Niño.  Amen.