Fiesta de Santo Niño Año C 20 Enero 2013 Parroquia de Santos Pedro y Pablo Ciudad de Sorsogon

Fiesta de Santo Niño Año C 20 Enero 2013 Parroquia de Santos Pedro y Pablo Ciudad de Sorsogon

Isaias 9:1-6  Mayo nin paagi para sainda tanganing makadulag sa panahon na ini nin kasakitan.  An daga kan mga tribu ni Zabulon asin ni Neftali, na kaidto daga nin kasosopgan, iyo an magdadara nin kaomawan sa rehiyon na ini, magpoon sa Dagat nin Mediteraneo pasiring sa sirangan, sa daga sa ibaong kan Salog nin Jordan, asin maski sa Galilea mismo, na pinag-eerokan kan mga dayuhan.

            2 Nakahiling nin dakulang liwanag an mga tawong nalakaw sa kadikloman.

                        An mga nag-erok sa daga nin mahibog na kadikloman, naliliwanagan na ngunyan.

            3 Tinawan mo sinda nin dakulang kaogmahan, KAGURANGNAN; pinaogma mo sinda.

                        Naoogma sinda sa saimong ginibo, siring na naoogma an mga tawo kun sinda nag-aani

                                    o kun sinda naghihiras kan mga sinamsam.

            4 Huli ta saimong binaria n sakal na nakakapagabat sainda

asin an sugkod na ipinapako sa saindang mga abaga.

                        Dinaog mo an nasyon na nag-api asin nandaya kan saimong banwaan,

siring na dinaog mo kaidto an hukbo nin Midian.

            5 An mga sapatos kan minasalakay na hukbo asin an gabos nindang nadugoan na gubing

susuloon siring sa igatong.

            6 Huli ta sarong aki an namundag sato!

                        Sarong aking lalaki an itinao sato!

                        Siya an satong magigin pamayo.

            Aapodon siyang, “Makangangalas na Parahatol,” “Makakamhan na Dios,” “Amang daing kataposan,” “Prinsipe nin Katoninongan.”

Salmo 98:1.2-3.3-4.5-6           Mag-awit nin bagong awit sa Kinaban,

            huli ta guminibo siya nin mga ngangalasan!

Sa sadiri niyang kapangyarihan asin banal na kosog

            nakamtan niya an kapangganahan.

2 Ipinahayag nin KAGURANGNAN an saiyang kapangganahan;

            ipinahiling niya sa mga nasyon an saiyang kapangyarihan sa pagligtas.

3 Naromdoman niya an danay niyang pagkamoot

            asin pagkamaimbod sa harong ni Israel.

Nahiling kan gabos na poro kan daga an kapangganahn kan satuyang Dios.

4 Gabos na daga maogmang magkurahaw sa KAGURANGNAN;

            omawon siya sa mga awit asin sa mga kurahaw nin kaogmahan!

5 Mag-awit nin mga pag-omaw sa KAGURANGNAN!

            Musika tugtogon sa arpa!

6 Patanogon an mga trompeta asin an mga hamodyong;

            maogmang magkurahaw sa KAGURANGNAN na satuyang hade.

Efeso 1:3-6.15-18  3 Magpasalamat kita sa Dios na Ama ni Jesu-Cristo na satong Kagurangnan!  Huli ta benedisyonan niya kita diyan ki Cristo, kan gabos na bendisyon na espiritwal sa kalangitan.  4 Bago lalangon an kinaban, pinili niya kita diya ki Cristo tanganing magin kitang banal saka mayong digta sa atubangan niya.

            Huli sa pagkamoot, 5 itinalaga kita nin Dios na magin mga aki niya huli ki Jesu-Cristo; sadiri niyang kabotan iyan saka katuyohan.  6 Omawon ta an Dios dahel kan saiyang nagsusupay na biyaya na itinao niya sato bilang regalo na yaon sa namomotan niyang Aki!

            15 Huli kaini, kan madangog ko an dapit sa saindong pagtubod ki Jesus na Kagurangnan, dangan an saindong pagkamoot sa gabos na banal, 16 dai ako nag-ontok nin pagpasalamat sa Dios para saindo.  Ginigiromdom ko kamo sa sakong mga pamibi; 17 hinahagad ko sa Dios ni Jesu-Cristo na satong Kagurangnan, an mamurawayon na Ama, na itao saindo an espíritu nin kadonongan, tanganing masabotan nindo nin orog an kapahayagan dapit sa Dios.  18 Hinahagad ko na maliwanagan an isip nindo tanganing manodan nindo kun ano an paglaom na inapodan niya saindo, kun ano an nagsusupay na biyaya na ipianuga niya sa saiyang mga banal.

Lukas 2:41-52  41 Taon-taon, minaduman sa Jerusalem an mga magurang ni Jesus para sa Pyesta nin Paskwa.  42 Kan doseng taon na si Jesus, nagduman sinda siring sa dating ginigibo ninda.  43 Pakatapos kan pyesta, nagbaklay sinda papuli, alagan nagpawalat si Jesus sa Jerusalem na dai aram kan saiyang mga magurang.  44 Sa paghon na kaiba si Jesus kan grupo, nagpadagos sinda sa pagbaklay sa bilog na aldaw.  Dangan hinanap ninda siya duman sa saindang mga kadugo asin mga kamidbid.  45 Kan dai ninda siya nakua, nagbalik sinda sa Jerusalem sa paghanap saiya.  46 Kan ikatolong aldaw, nakua ninda siya sa laog kan Templo, nagtutukaw kaiba kan mga paratukdo.  Naghihinanyog siya saka naghahapot sainda.  47 An gabos na nakadangog saiya nagngalas kan saiyang pakasabot asin mga simbag.  48 Nagngalas man an saiyang mga magurang kan mahiling siya, kaya tinaraman siya kan saiyang ina, “Aki, tadaw ta siringa n ginibo mo samo?  Hadit na ako asin an saimong ama sa pagparahanap saimo.”

            49 Sinabihan niya sinda, “Tadaw ta hinahanap nindo ako?  Dai nindo aram na kaipuhan nasa harong ako kan sakong Ama?”  50 Alagad dai ninda nasabotan an sinabi niya sainda.

            51 Uminiba sainda si Jesus sa Nazaret asin nagin makinuyog-kuyog siya sainda.  An gabos na ini rinimpos kan saiyang in asa puso niya.  52 Nagtalubo si Jesus asin nagdagdag an saiyang kadonongan.  Nawilihan siya nin Dios asin kan mga tawo.