Taon C Primerong Domingo nin Adviento

Jeremias 33:14-16

            14Nagtaram an KAGURANGNAN, “Maabot an panahon na ootobon ko an panuga na ginibo ko sa mga taga Israel asin mga taga Juda.  15Sa panahon na iyan, pipilion ko bilang hade an sarong matanos na kapagarakian ni David.  Gigibohon kan hade an tama saka matanos sa bilog na daga.  16Sa mga aldaw man na iyan, ililigtas an Judas aka mamumuhay na matiwasay an Jerusalem.  An syudad aapodon ‘An KAGURANGANAN Samong Kaligtasan.’

Salmo 25:4-5,8-9,10,14

            4KAGURANGNAN, tukdoan sako an

                        Saimong dalan;

            Tukdoan sako an saimong mga agihan.

            5Tukdoan mo akong maglakaw sa

Katotoohan,

            Huli ta ika an Dios nin sakong

                        Kaligtasan;

            Bilog na aldaw ika sakong linalaoman.

            8Marahay saka matanos na

                        KAGURANGNAN;

            Kaya an mga lagalag tinutukdoan

                        Niya kan dalana na dapat

                        Lakawan.

            9An mapakumbaba dinadara niya

                        Sa tamang agihan,

            Asin pinapasabot kan saiyang kabotan.

            10Pagkamoot asin kaimbodan an

                        Gabos niyang dalan,

            Para sa mga nag-ootob kan

                        Saiyang tipan saka kabotan.

            14Mga katood nin KAGURANGNAN an

                        Mga may pagkatakot saiya;

            An saiyang tipan ipinapahayag

                        Niya sainda.

1 Taga Tesalonica 3:12-4:2

3:12Gibohon logod nin Kagurangnan na magdagdag saka magsupay an saindong pagkaminootan asin an saindong pagkamoot sa gabos na tawo, siring kan samong dakulang pagkamoot saindo.  13Sa paging ini papasarigon niya an saindong mga puso na mayo nin kaninan sa kalinigan sa atubang kan satong Dios nin Ama, pagbalik kan satong Kagurangnan na si Jesus kaiba an gabos niyang banal.

            4:1Sa kataposan, mga tugang, nakikimaherak kami saindo asin sinasadol mi kamo sa ngaran ni Jesus na Kagurangnan, na mamuhay kamo nin orog pa kan pamumuhay nindo ngunyan-pamumuhay na sosog sa nanodan nindo samo-nganing mapaogma nindo an Dios.  2Aram nan indo an mga katukdoan na itinao mi saindo huli ki Jesus na Kagurangnan.

Lukas 21:25-28,34-36

            25”Magkakaigwa nin mga tanda sa aldaw, sa bulan, asin sa mga bitoon.  Sa daga, mawawaran nin paglaom an mga nasyon dahel sa kosog kan hagubohob kan dagat saka darakulang alon.  26Madidismayo an mga tawo sa takot sa paghorop-horop kun ano an maaobt sa bilog na kinaban, huli ta an mga kapangyarihan sa kalangitan matatanyog.  27Dangan mahihiling ninda an Aki nin Tawo na maabot sa sarong panganoron na may kapangyarihan asin dakulang kamurawayan.  28Kun an mga bagay na ini magpoon nang mangyari, tumindong dangan tumangad kamo, huli ta madali na an saindong kaligtasan.”

            34”Mag-ingat kamo ta tibaad malugom kamo sa karakanan, irinoman, saka sa kahaditan kan buhay na ini, asin biglang umabot saindo an Aldaw na iyan siring sa sarong siod; 35huli ta maabot iyan sag abos na tawo sa bilog na kinaban.  36Kaya magpuka kamo sa gabos na oras; danay kamong mamibi na magkaigwa kamo nin kosog tanganing makaligtas kamo sa gabos na mangyayaring iyan, dangan makaatubang kamo sa Aki nin Tawo.”