Reflexión personal para el cuarto día de Misa de Aguinaldo

Taon C 19 diciembre 2012 cuarto dia del Misa de Aguinaldo Sts. Peter and Paul Cathedral Parish

            Nabasa ta sa primerong babasahon ginono sa libro kan mga Hukom capitulo 13 kun paano namundag si Samson.  Mahihiling ta an paralelismo kaini sa pagkamundag ni Juan sa evangelio segun Lucas capitulo 1 asin mahihiling man niato an paralelismo kaining duwang mga historia kan pagkamundag (ni Samson asin Juan) sa pagkamundag ni Jesus.  Ngonian mga tugang na ika-upat na aldaw kan satong pag-Simbang Gabi, tugoti po nindo akong i-concentrar an satuyang atencion sa personaje na si Samson, Hukom asin iyo an pinakamakusog na linalang kan saiyang panahon.

            Si Samson bag-o pa siya namundag pinili na siya kan Kagurangnan para sa plano na pagligtas sa Israel, na kaidtong panahon nabibihag kan mga Filisteo.  Especial na an trato sa saiyang mga magurang asin sa saiya mismong pakamundag asin hanggang siya duminakula.  Naging primerong soldado siya kan Israel sa pakilaban kaini contra an mga Filisteo.  Nahulog man si Samson sa patibong kan mga Filisteo sa partecipacion ni Delilah, nahiling ni Samson an saiyang kasal-an, siya nagbakle, buminalik sa Dios asin sa urhing acto kan saiyang buhay winasak niya an pagano na templo kan mga Filisteo kaiba an dakulon pa na mga Filisteo.

            Pagnaiisip ta si Samson, an primerong bagay na nagdadatong sa satuyang mga isip iyo an kakosogan.  Si Samson an pinakamakosog na nilalang kan saiyang kapanahonan.  Ining kosog puede niato ma-aplicar sa satuyang presenteng mga situaciones.  Importante na kita gabos makusog an determinacion sa maski anano man na kaipuhan niatong gibohon sa buhay: sa personal na buhay, sa familia, sa escuela, sa trabajo, maski saen man.  Ugaring nahihiling niato na an kusog kan determinacion bakong suficiente ta nagkukulang asin nagluluya ini.  Namate ta na maski anano an kusog ni Samson, kusog kan hawak niya asin kusog kan determinacion niya, namate ta na nahulog man gihapon siya sa tentacion.  Sa satuyang buhay espiritual nangyayari na maski anano ka kusog kita bilang mga tawo, sa satuyang decision asin determinacion, nangyayari asin nangyayari na nahuhulog pa man giraray kita sa mga tentaciones sa buhay lalo na sa satuyang mga kaluyahan.  Ano an dapat niatong gibohon?

            Yaon pa man giraray an paghikayat niato sa gabos asin sa satuyang mga sadiri na dapat kita may sarong decision sa buhay asin makusog na determinacion na gibohon ining decision maski anano pa an mangyari.  Pero kaipuhan na dagdagan ta ining decision asin determinacion.  Dagdagan ta ini kan satong intencion.  Anong intencion?  Na kita naghihingoha bako lang para sa satuyang mga sadiri kun di man para sa satuyang familia, comunidad, asin finalmente asin pinaka-importante kita naghihingoha para sa Kagurangnan.  Para sa pagkamoot niato Saiya.  Kasi kun sa pakurusugan man lamang kan decision asin determinacion, hiling na niato na kaya ta pero kita may limite asin maabot an panahon kun saen kita mahuhulog ta sa satuyang kakusugan, kita maluya.  Tawo kita.  Pero sa gracia kan Mahal na Dios asin sa satuyang pagsa-isip asin pagsapuso na gabos ini ginigibo niato para sa satuyang mga namomot-an sa buhay, asin para sa Dios na orog na namomoot sato asin orog na satong namomot-an, pues kakayanon ta an gabos.  Sa intencion na ini kakayanon ta an gabos, asin kita magiging makusugon sa gracia kan Mahal na Dios.

            Lugod mga tugang kita gabos bako lang maging mga Samson sa kakusugan kan decision asin determinacion.  Kita man maging makusog bako lang para sa satuyang mga sadiri, kun di man para sa satuyang mga namomot-an asin para sa Dios na satong orog na namomot-an.