Reflexión personal para la Navidad 2012

Reflexión personal para la Navidad 2012, Parroquia de Santos Pedro y Pablo, Ciudad de Sorsogon

          Kasubanggi, sa Misa kan Matangang Banggi, Misa Concelebrada na pinangenotan kan satuyang Señor Obispo, namate ko ining cuento de Navidad, ining istorya kan Pasko asin ngonian ihihiras ko po saindo.  Sa homelia kan Obispo, sa paagi kan istorya na ini, pinaabot niya an mensaje na an Dios dahil sa Saiyang dakulaon na pagkamoot sa tawo Siya an nani-tawo.  An mensaje kan Pagkamundag kan Omboy sa Belen iyo an orog na kadakula na Pagkamoot kan Dios sa tawo.

          May saro daa na familia, sa aldaw kan Pasko, nagpepreparar magsimba.  Pig-iiba kan ina an saiyang agom pero habô kan ama ta dai man daa ki sentido ining Pasko, sa mga buâ lang daa an Pasko, pan-o man daa magin tawo an Dios.  Imposible daa asin ining bilog na celebración kan mga Cristiano sarong kahunghangan, sarong kabuahan.  Kaya dumineretso sa simbahan an ina asin an saindang mga aki.  An ama nawalat sa harong.

          Nagpapahingalo an ama sa harong, naghihiling-hiling ki television kan may mahiling siya na mga gamgam sa may ventana, mga bayong,

na bagan gusto maglaog sa harong niya.  Nagdadakul an mga ini.  Naisip niya sa pagkulit kan mga bayong maglaog na bagan talagang kaipuhan kan mga ini maglaog, kaya naisip man niya na duman na sana sinda maglaog sa tambobong niya.  Nagluwas siya sa harong niya asin duminuman sa saiyang tambobong.  Binuksan an dakula na pintoan kaini asin pinapalaog niya an mga bayong duman.  Pero maski ano an gibohon niyang paagi, an mga ini yaon pa man gihapon an paghingoha makalaog sa harong asin dai man naglalaog sa tambobong kun saen bukás na an pinto.  Sa paghingoha kan mga bayong na lumaog sa harong kan ama, an iba nagburunggo sa ventana asin an iba nagkagaradan.  Napa-isip an ama, kun siya man bayong siya an ma-uuna asin ma-guía sa mga kabayongan maglaog sa tambobong.  Mientras tanto digdi niya naisip an kasimbagan sa saiyang kahapotan kun nata nani-tawo an Dios.

          Naisip kan ama na nani-tawo an Dios para pangunahan kita asin giyahan kita sa katanosan.  Kaya niato magbalik sa Saiya, an caso kita nadidipisilan hanggang sa punto na diit-diit sana an nakakabalik Saiya.  Solución kan Dios iyo na magin tawo Siya para mas magpakilala sa tawo asin darahon ini, giyahan ini pasiring sa Saiya, siring kan sarong bayong sa mga kabayongan.  Kun may bayong lamang na nanguna asin nag-guía sa mga kabayongan wara dapat o diit sana dapat an nagkawararâ.

          Pagbalik kan ina kaiba an saindang mga kaakian sa harong nahiling niya an saiyang agom, an ama nakatukaw asin nag-iisip-isip.  Asin finalmente sabi kan ama sa ina na aram na niya kun nata nani-tawo an Dios.  Dahil sa pagkamoot Niya sa tawo, na habo niya ini magkawararâ, nani-tawo an Dios para pangunahan, giyahan an mga ini pasiring, pabalik Saiya.  An tunay na kahulugan kan Pasko iyo an Pagkamoot.

Lugod mga tugang ngonian na Pasko kan Pagkamundag ni Jesu Cristo, mas magin harani pa kita Saiya asin bag-ohon niato an satuyang compromiso sa Saiya.  Na Siya an satuyang Dios asin Siya an satuyang susunudon sa bilog niatong buhay, maski ining pagsunod na ini may kadipisilan asin may sacrificio.  Ta aram ta na an Dios Aki nani-tawo asin dai man ki ibang razon an saiyang pagnini-tawo kun di an dakulaon na pagkamoot Niya sa satuya.  Dai Siya ki ibang minamaw-ot para sa satuya kun di man para sa satuyang karahayan.  Amen.