Reflexión para la Solemnidad de Maria, Madre de Dios

Reflexión para la Solemnidad de Maria, Madre de Dios, 1 de enero 2012, Parroquia de Santos Pedro y Pablo, Ciudad de Sorsogon

          Kun may aldaw na puedeng i-considerar bilang aldaw kan mga ina, un día de las madres, iyo ining primero de enero, Solemnidad ni Maria, Ina kan Dios.

          Clarado sa gabos na an Dios dai ki ina, ta kun igwa Siya ki ina, dai Siya Dios.  An tawo sana, an mga linalang sana an may ina.  Pues, si Maria ina kan Dios ta ina siya ni Jesus, Dios asin tawo, ina siya ni Jesus tawo asin ni Jesus Dios.  Siring na dai mai-se-separar an pagka-Dios ni Jesus sa Saiyang pagka-tawo, dai man mai-se-separar an pagka-ina ni Maria ki Jesus bilang Dios, asin an pagka-ini ni Maria ki Jesus bilang tawo, al mismo tiempo.  Si Jesus sarong tawo sana, sarong Dios sana, an Saiyang pagiging Dios bakong separado sa Saiyang pagiging tawo.  Kaya baga sa Saiyang buhay sa kinaban, nagutom asin napaha Siya pero cuarenta días kinaya niya daing pagkakaon asin pag-inom.  Kaya baga naglalakaw Siya sa ibabaw kan dagat pero kaipuhan Niya magkaturog.  Kaya baga Siya nagadan pero Siya nabuhay liwat.

          An parte kan ina sa sarong familia esencial asin necesaria.  Kun dai an ina difícil an buhay familia, asin sa dakulon na caso bako ini nagigin marahay na familia.  Ini totoo sa satuya sa panahon niato, ini totoo man kaitong panahon, kan panahon ni Jesus.  Puede sa satong imaginación satong isipon na gabos na aram ni Jesus bilang tawo naaraman man niya ki San Jose lalong lalo na ki Maria.  An Saiyang mga tataramon, an Saiyang pagbado-bado, an Saiyang mga mannerisms, gabos ini puede niatong isipon hale man ki Maria.  An ina dakulon asin dakulaon an puedeng magibo sa buhay kan saiyang mga aki: sa karahayan patin man sa karatan.  An satuyang primerong gustong ipa-abot sainda iyo an satuyang dakulaon na pasasalamat.  Salamat sa mga ina, sa saindang pag-sacrificio sa sadiri, sa saindang pag-trabajo maski sa kadipisilan.  Sunod niatong boot sabihon sainda na yaon kita sa sainda, sa pag-suporta sainda sa paghingoha na maggibo ninda an saindang misión digdi sa kinaban.  Maski ano man na sacrificio asin kadipisilan aramon po nindo na yaon kami nag-aalalay sa saindo mg aina.  Asin ultimo na gusto niatong ipaabot sa sainda iyo na hingohaon pa man lugod ninda na mas pakarhayon an saindang pagiging ina, na mani-tunay sindang ina como Dios manda, na mas itao pa ninda an saindang sadiri sa saindang mga aki asin mga agom, sa saindang mga familia.

          Poco a poco, pa diit-diit, naglalaog sa satuyang sociedad an mentalidad na contra sa pagiging ina.  May nagsasabi na an ina daa saro man na babaye na may mga derechos man.  Kaya dapat man magiging libre ini sa mga convenciones na nagkukulong sa saiya sa panahon ngonian.  Dapat daw mas may horas siya para sa saiyang sadiri, sa pagpagayon,  shopping, asin sa saiyang mga amiga.  Dapat daw mas may horas siya sa saiyang sadiring career asin bako lang nakakulong sa harong, simbahan asin cucina.  Dapat daw may decisión siya sa sadiri niyang hawak asin laman, libre mag aki o dai, libre na i-abort an aki basta iyo an saiyang decisión.  Gabos ini iyo an mga pigsisiyak kan mga feministas, na bagan namamate man niato ngonian hale mismo sa mga ngimot kan pira sa mga babaeng congresistas asin senadores kan Republica de Filipinas.

          Tama na dapat man may horas an satong mga ina para sa saindang mga sadiri, asin an mga ama sinda man maghihingoha na ini mangyari.  Tama na dapat man may career an babae lalong lalo na kun dai man makaka-apekto sa pagpadakula asin sa disiplina asin educación kan mga aki asin dai main ini makaka-apekto sa bilog na buhay kan mag-agom asin kan bilog na familia.  Dapat man na may decisión    an babae sa sadiri niyang hawak, hasta bako boot sabihon kaini na puede na an paggadan kan inocente.

          Makaheherak an mga kababayihan na nagkaroloko kan mga salang katukdoan kan feminismo extremo.  En vez na sinda mas maging maogma mas nagin mamundo sinda asin miserable an buhay.  Dai ninda makuakua an pighahanap ninda ta ini siring palan sa sarong balde kan bulawan sa tungod kan hablondawani.  Ini saro palan na mirage.  Saro palan na panloloko sa kababaihan.  May mga babae akong nakilala na dahil sa idea kaining feminismo extremo nunca nagka-familia asin nunca nagka-aki.  Asin an may mga aki man, nagin makaheherak an saindang buhay familia, an agom asin an mga aki, ta gabos sinda napabayaan niya.  Pejor sa gabos, mga babae asin mga ina na tunay na miserable sa buhay ta sadiri nindang aki ginadan ninda sa saindang tulak.  Kun iyo ini an freedom for women, kun iyo ini an mga rights of women, herak man kan satuyang mga ina, mga tugang na babae, mga tita asin mga pinsan na babae.

          Maogman aldaw kan mga ina ngonian na Solemnidad ni Maria, Ina ni Jesus.  Sa intercesión ni Maria lugod an satong mga ina maging mga ina sosog ki Maria, Ina ni Jesus asin Ina niato gabos.  Amen.

Reflexión personal para el Domingo Fiesta de la Sagrada Familia

Reflexión personal para el Domingo Fiesta de la Sagrada Familia

An familia sa Filipinas ngonian binobomba ki manlaen-laen na ataque asin nagpopoon na ining maguba.  Dai mahaloy, kun dai maghiro an gabos na mga miembro kaini, asin kun dai kita maghiro gabos, mawawara na an familia asin disastre asin caos an kakaluwasan sa bilog na mundo.

Ngonian na kafiestahan kan Sagrada Familia, sinda Jose, Maria asin Jesus, itinatao kan Simbahan Catolica bilang ejemplo asin guía sa gabos na familia ining tolong tawong ini na nabuhay sa kabanalan, sa pagkaminootan sa cada saro asin sa pagsunod sa kabotan kan Dios.  Sarong ama, asin ina, asin aki na nabuhay sosog sa kabotan kan Mahal na Dios.

An caso toda la familia asin gabos na kaiba sa institución na ini tunay na ina-ataque asin pigraraot kan sociedad.  An familia bako nang pigcoconsiderar kan iba bilang sagrada kun di ini profanada.  Bako nang familia sagrada kun di familia profanada, the family is desecrated.

An ama hinahale sa grupo kan familia.  An lalaki daa inutil, pejor, an lalaki daa ulang-uláng sana asin nakakaulang pa sa karahayan kan bilog na familia.  Sinda daa babaero, parainom asin parasugal.  Kaya mas marahay daa na an mga babae magpabados na sana asin magsolo na sa pagsuporta kan saiyang aki.

An ina man ngonian hinahale sa familia.  Sa familia daa kan duwang ama (na dai man puede pagtawagon na familia) puede man mag-adoptar ki aki, dahil an importante daa an material na pangangaipo kan aki asin emocional asin intelectual na pangangaipo kaini na puede man itao kan duwang ama.

An aki hinahale naman sa familia.  Sa Filipinas ngani ngonian na igwa na ki Republic Act 10354, hinihiling na sa bilog na Filipinas an contraception bilang sarong bagay na marhay asin sarong solucion daa sa kapobrehan.  Solucion iyo an pagbawas o pag-iwas na magkaaki ta kun kekwentahon mo, talaga namang ribo-ribo an gastos kun may aki.  An aki ngonian sa Filipinas problema, an solucion dai magka-aki.  An aki ngonian sa Filipinas sakit, na dapat bulongon kan medicina na iyo an contraception.  An aki ngonian sa Filipinas complicacion na kaipuhan haleon sa buhay.  Dai mahaloy sa Filipinas magkaka-igwa naman ki abortion asin gabos ini iyo an pigsisiyak kan Senor Presidente asin kan satuyang mga congresistas asin senadores bilang matuwid na daan, ini daa an tamang daan.

Dakulon pa man giraray asin iyo pa man giraray an mayoría, an mga ama asin mga ina asin mga aki na naghihingoha sa saindang mga buhay personal asin sa saindang mga familia na maging banal.  An mayoría naghihingoha pa man giraray na magin sagrada an familia.

Kun iisipon an solucion sa mga problemang ini na satuyang pigsarosaro facil man sana, asin yaon man sana sa cada miembro kan familia.  An ama magpaka-ama, gibohon an kabaligtaran kan mga sinabi niato kanina, an ina magpaka-ina, iyo man digdi, gibohon an kabaligtaran kan mga sinabi niato kasubag-o.  Kun gigibohon ta sana an satuyang trabajo asin parte sa buhay, dakulon na mga problema an satuyang masosolucionan.

Magpamibi kita lalo na ngonian sa especial na aldaw na ini sa mga familia, sa intercesión kan Sagrada Familia, na tunay na maging sagrada an cada familia, lalo na an satong mga familia, an mga familia Cristiana.

Reflexión personal para la Navidad 2012

Reflexión personal para la Navidad 2012, Parroquia de Santos Pedro y Pablo, Ciudad de Sorsogon

          Kasubanggi, sa Misa kan Matangang Banggi, Misa Concelebrada na pinangenotan kan satuyang Señor Obispo, namate ko ining cuento de Navidad, ining istorya kan Pasko asin ngonian ihihiras ko po saindo.  Sa homelia kan Obispo, sa paagi kan istorya na ini, pinaabot niya an mensaje na an Dios dahil sa Saiyang dakulaon na pagkamoot sa tawo Siya an nani-tawo.  An mensaje kan Pagkamundag kan Omboy sa Belen iyo an orog na kadakula na Pagkamoot kan Dios sa tawo.

          May saro daa na familia, sa aldaw kan Pasko, nagpepreparar magsimba.  Pig-iiba kan ina an saiyang agom pero habô kan ama ta dai man daa ki sentido ining Pasko, sa mga buâ lang daa an Pasko, pan-o man daa magin tawo an Dios.  Imposible daa asin ining bilog na celebración kan mga Cristiano sarong kahunghangan, sarong kabuahan.  Kaya dumineretso sa simbahan an ina asin an saindang mga aki.  An ama nawalat sa harong.

          Nagpapahingalo an ama sa harong, naghihiling-hiling ki television kan may mahiling siya na mga gamgam sa may ventana, mga bayong,

na bagan gusto maglaog sa harong niya.  Nagdadakul an mga ini.  Naisip niya sa pagkulit kan mga bayong maglaog na bagan talagang kaipuhan kan mga ini maglaog, kaya naisip man niya na duman na sana sinda maglaog sa tambobong niya.  Nagluwas siya sa harong niya asin duminuman sa saiyang tambobong.  Binuksan an dakula na pintoan kaini asin pinapalaog niya an mga bayong duman.  Pero maski ano an gibohon niyang paagi, an mga ini yaon pa man gihapon an paghingoha makalaog sa harong asin dai man naglalaog sa tambobong kun saen bukás na an pinto.  Sa paghingoha kan mga bayong na lumaog sa harong kan ama, an iba nagburunggo sa ventana asin an iba nagkagaradan.  Napa-isip an ama, kun siya man bayong siya an ma-uuna asin ma-guía sa mga kabayongan maglaog sa tambobong.  Mientras tanto digdi niya naisip an kasimbagan sa saiyang kahapotan kun nata nani-tawo an Dios.

          Naisip kan ama na nani-tawo an Dios para pangunahan kita asin giyahan kita sa katanosan.  Kaya niato magbalik sa Saiya, an caso kita nadidipisilan hanggang sa punto na diit-diit sana an nakakabalik Saiya.  Solución kan Dios iyo na magin tawo Siya para mas magpakilala sa tawo asin darahon ini, giyahan ini pasiring sa Saiya, siring kan sarong bayong sa mga kabayongan.  Kun may bayong lamang na nanguna asin nag-guía sa mga kabayongan wara dapat o diit sana dapat an nagkawararâ.

          Pagbalik kan ina kaiba an saindang mga kaakian sa harong nahiling niya an saiyang agom, an ama nakatukaw asin nag-iisip-isip.  Asin finalmente sabi kan ama sa ina na aram na niya kun nata nani-tawo an Dios.  Dahil sa pagkamoot Niya sa tawo, na habo niya ini magkawararâ, nani-tawo an Dios para pangunahan, giyahan an mga ini pasiring, pabalik Saiya.  An tunay na kahulugan kan Pasko iyo an Pagkamoot.

Lugod mga tugang ngonian na Pasko kan Pagkamundag ni Jesu Cristo, mas magin harani pa kita Saiya asin bag-ohon niato an satuyang compromiso sa Saiya.  Na Siya an satuyang Dios asin Siya an satuyang susunudon sa bilog niatong buhay, maski ining pagsunod na ini may kadipisilan asin may sacrificio.  Ta aram ta na an Dios Aki nani-tawo asin dai man ki ibang razon an saiyang pagnini-tawo kun di an dakulaon na pagkamoot Niya sa satuya.  Dai Siya ki ibang minamaw-ot para sa satuya kun di man para sa satuyang karahayan.  Amen.

Reflexión personal para el nono día del Misa de Aguinaldo

Reflexión personal para el nono día del Misa de Aguinaldo, 24 de diciembre de 2012, Parroquia de Santos Pedro y Pablo, Ciudad de Sorsogon

          Sa evangelio ngunyan na ika-siyam asin ultimo día kan satong Simbang Gabi, nadangog nyato an kilalá asin aro-aldaw pinapamibi kan Simbahan na cantico, iyo an Benedictus.  Ini iyo an pangadyi nin pag-omaw sa Dios ni Zacarias agom ni Isabel ama ni Juan.  Pinapamibi ini sa breviario cada aga, aroaldaw.

          Duwang parte ining cantico na kilalá sa pangaran na Benedictus.  An enot na parte nagtataram kan paghalat kan mga Judío kan saindang tagapagligtas.  Ining tagapagligtas ngunyan sa pamibi ni Zacarías bako na sana para sa poder kan mundo kun di para sa poder espiritual.  An tagapagligtas bako lang magdadara sa satuya sa kahadean material kun di sa kahadean sa kalangitan.  Iyo na ngani si Cristo an Mesías, an paraligtas kan mundo hale sa kasalan paduman sa kamurawayan kan kalangitan.  An ika-duwang parte tinataraman ni Zacarías si Juan saiyang aki, ta ini an magiging tagapag-preparar, kun baga, kan lalakawan kan Mesías, para i-predicar an pagpatawad kan mga kasalan.  Si Juan an magigin precursor kan Tagapaligtas kan mundo na iyo an saiyang pinsan si Jesus, naghahale kan kasalan kan kinaban, satong tunay na Tagapagligtas.

          Si Zacarías, parejo kan saiyang agom na si Isabel, sarong tawong matanos.  Siya sarong padi, nagseserbi sa Templo.  Sa pagpahiling sa kaniya kan ángel Gabriel para ibalangibog sa kaniya an pagkamundag ni Juan asin ibareta saiya an plano kan Dios, siya nagduda.  Ini saro nang tawo na may makusog na pagtubod, pero sa momentong idto siya nagduda.  Sa isip-isip niya na imposible na sinda ni Isabel magka-aki pa ta sinda gurang na.  Sa ultimo siya man giraray naniwala sa Dios asin suminunod man giraray sa plano kan Dios.  Kaya ngani sa saiyang pagkangula, nakataram na ulit siya.

          May veces na kita man na harani sa Simbahan asin nagsisimba cada Domingo kita man nahuhulog sa incredulidad, sa dai pagtubod sa Dios, sa pagduda sa Saiya.  Lalong lalo na pag halimbawa an plano niya dai nyato naiintiendihan o sa paghuna nyato imposible sa ciencia na iyo an satuyang batayan ngunyan na mga aldaw sa gabos na bagay.  Nalilingawan ta na gabos posible sa Dios.  Nalilingawan ta na an Saiyang mga paagi bako man parejo kan satuyang mga paagi, ta Siya Dios kita tawo.  Nalilingawan ta na maski halangkawon an naaabot kan satuyang intelecto, may limite kita asin hanggang sa cierto punto lang kita nakakaabot, dakulon an dai nyato na-iintiendihan.  Lugod tatao kita magsabi Amen sa Dios maski di nyato gabos na-iintiendihan.  Lugod tatao kita isabahala gabos Saiya, sa plano Niya.  Lugod tatao kita mag-cooperar asin mag-participar sa gusto Niyang mangyari ta aram nyato na Siya man an bahala sa gabos.

          Kagurangnan, parejo ni Zacarias, inoomaw nyamo Ika ta ika an samuyang Paraligtas.  Ligtasan kami asin daraha kami sa kalangitan.  Ma-cooperar asin ma-participar kami sa mga plano Mo maski ngani dai mi gabos na-iintiendihan ta aram mi na Ika Dios, samuyang Ama, asin dai Ka man ki kagustuhan para samo na dai man para sa samuyang karahayan.  Amen.

Reflexion personal para el cuarto domingo del Adviento

Reflexion personal para el cuarto domingo del Adviento, 23 de diciembre 2012, Parroquia de santos Pedro y Pablo, Ciudad de Sorsogon

            Si Maria kan naaraman na siya bados, naaraman man niya na an saiyang pinsan na si Isabel bados man, seis meses na.  Hidaling nagsungko si Maria ki Isabel, maski na ngani ini harayo sa kaniya asin an viaje difícil.  Nagsungko si Maria ki Isabel ta aram ni Maria na kakaipuhanon in Isabel an saiyang servicio, babae sa babae, bados sa bados, ina sa ina.  Ining pagsungko naging ocasión para omawon ni Isabel an Dios Aki sa tulak kan orog kapalad na ina Niya, asin para omawon man an Ina kan Dios na magigin Ina man kan universo entero.

            Orog na marahay ining tataramon na ini: pagsungko.  Marahay-rahay ining idea na ini ta ma-iaaplicar niato sa kadakul na bagay sa satuyang buhay asin makukuahan niatong ki kadakul na adal sa satuyang buhay personal asin espiritual.

            Kun satuyang iisipon an Encarnación, ining pagiging tawo, pagninilaman kan Dios Aki, sarong pagbisita kan Dios sa tawo.  An tataramon na ginamit sa enot na capitulo kan evangelio ni Juan, sa Griego kan pagninilaman kan Dios Aki, iyo an pagtugdok kan Dios ki tolda sa kinaban.  Siya naging saro, naging parejo niato, fuera kasalan sabi ni San Pablo.  An Aki kan Ama Dios kaya kilala na kita antes pa kita namundag sa kinaban, sa satuyang mga magurang, pero Siya bako niato Siyang kilala.  Sa pagsungko Niya sa satuya, nakilala niato an Dios, nagpakilala Siya sa satuya.  An Dios nagin omboy, nagin aki, nagin carpentero, nagin paratukdo, nagin amigo, nagin prisionero, nagin condenado, nagin crucifijo.

            An Simbahan, an Diocesis man, sarong pagsungko.  Pagsungko kan Obispo sa saiyang mga parroquia asin mga capilla.  Panahon pa ni San Carlos Borromeo, nagin clarado sa Simbahan na an Pastor dapat yaon sa saiyang mga carnero, nagbabalangibog kan Marhay na Bareta asin nagtatao kan mga Gracia kan mga Sacramento.  An Diócesis kan Sorsogon puedeng sabihon na sarong diócesis, sarong Simbahan, ta an Pastor kaini yaon asin nagsusungko sa cada miembro kan saiyang comunidad.

            An Parroquia, igual, saro man ining pagsungko.  Pagsungko kan Cura párroco sa saiyang mga capilla, sa gabos na miembro kan saiyang nasasakupan na parroquia, en modo especial an mga may helang, an mga pobre, an mga nangangaipo, an mga prisionero, an mga gurang, an mga kadaihon kan comunidad.  Siya nagsusungko sa mga harong sa pagpalaganap kan tataramon kan Dios asin sa pag-distribuir kan mga Sacramentos orog na an Pagkumpisal, Pag-ulyo asin Pagmisa.

            Kita man sa satuyang buhay personal asin sa satuyang pakiki-upod sa satuyang kapwa, marahay-rahay an satuyang pagsungko sa satuyang mga namomot-an.  Asin bako lang sa satuyang namomot-an, kun di man pati na sa mga nangangaipo kan pagkamoot.  Kontrahon ta an mentalidad kan sociedad ngunyan, para bagang gusto kan sociedad ngunyan na cada tawo mabuhay como isla.  Wara daw paki-araraman.  Bahala ako sa buhay ko.  Bahala ka man sa buhay mo.  Wala raw basagan ng trip.  Bako ining maka-Cristiano na mentalidad, bako ini an ejemplo na itinatao ni Maria sa satuyang evangelio ngunyan na ika-upat na Domingo kan Adviento.  Magluwas kita sa satuyang mga sadiri asin maglaog kita sa mga buhay kan iba.  Buksan ta an satuyang mga sadiri asin palaogon ta an iba sa satuyang buhay.  Totoo, it’s a risk, take the risk.  Mga aki bisitahon nindo an saindong mga magurang, alalahanin niyo ang inyong mga magulang na nag-alala sa inyo noong wala pa kayong maalala.  Bisitahon niato an satuyang mga amigo asin amigo na aram niatong nagsosolo ngunyan na Pasko ta dai an saindang mga namomot-an sa buhay, o sinda extranjero asin extranjera kaya harayo sinda saindang familia asin dai sinda ki cuarta mag-uli sainda.  Bisitahon niato an mga lolo asin lola sa Home for the Aged, maski sarong biscuit asin sarong cartón ki gatas grabe na an ugma ninda.  Bisitahon niato an mga nasa prisionero, especialmente itong mga nalimotan na asin década na yaon sa prisión.

            Finalmente, an pag-visita sa Santissimo Sacramento saro bagang marahay-rahay na devoción kan sarong Cristiano Católico.  Naniniwala kita na an yaon sa Santissimo iyo an Hawak ni Cristo.  Lugod ibalik niato sa satuyang mga busy schedule ining marahay-rahay na gawe.  An Dios yaon, naghahalat lang satuya.  Amen.

Reflexión personal para el séptimo día de Misa de Aguinaldo

Reflexión personal para el séptimo día de Misa de Aguinaldo

Año C, 22 de diciembre 2012, Parroquia de Santos Pedro y Pablo, Ciudad de Sorsogon

            Sa enot na babasahon, ginono sa Enot na Libro ni Samuel Capitulo Uno, nadangog ta an sarong parte kan istorya kan buhay ni Ana.  Sa satuyang paghorophorop sa ika-pitong aldaw na ini kan Simbang Gabi, tugoti po nindo akong tutukan ta ining personaje na ini kan Lumang Tipan.  Mahihiling niato kun paano nakaka-umagid an saiyang historia personal sa istorya ni Maria, asin an saiyang buhay puede magin guía para sa satuya gabos sa satuyang buhay espiritual bilang mga Cristiano.

            Siisay si Ana kan Libro ni Samuel?  An pangaran na Ana gikan sa tataramon na Hebreo na Hannah na boot sabihon gracia o favor.  Ini puedeng boot sabihon “an Kagurangnan tinawan ako nin gracia, tinawan Niya ako nin favor”.  Sa enot bagan bako ini totoo ta si Ana, agom ni Elkana, daing aki.  Siya nagkurahaw sa Kagurangnan sa langit para siya mataw-an kan aki.  Ini an saiyang pinakamamaw-ot.  Saro man sa kadahilanan kaini iyo na kan saiyang panahon an sarong babaeng bawas bako hinihiling ki marhay, asin kasosopgan sa babae dai magin ina.  Dinangog siya kan Kagurangnan asin tinawan siya nin sarong aking lalaki si Samuel.  An gracia, ining favor na gikan sa Kagurangnan, binalik ni Ana sa Kagurangnan bilang tanda kan saiyang pagpasalamat asin pag-utob man sa saiyang sinumpaan.

            Anong makukua ta na aarogan ki Ana?  Primero, parejo ni Isabel kan evangelio kahapon, puedeng ta arogan ki Ana an saiyang pagkamaimbod sa Kagurangnan, minsan ngani bagan siya pinapabayaan.  Maski na ngani sa kaenot-enotan dai siyang aki, yaon pa man giraray siya sa paghagad ki tabang asin gracia sa Kagurangnan.  Maski na ngani bagan wara man saiya nagdadangog, daing untok siya sa pagkurahaw sa Kagurangnan.  Ulit-ulit an saiyang paghagad, makulit siya sa Kagurangnan.  May veces na kita madalion mawaraan ki pagtubod asin paglaom sa Kagurangnan.  Diit lang na dificultad, diit lang na sacrificio, diit lang na pagka-urhi kan simbag kan Kagurangnan sa satuyang hinahagad, pinangluluyahan na kita ki boot asin minatalikod na kita Saiya.  Nagtatanong tayo kung natutulog ba ang Dios.  Lugod parejo ni Ana, derecho sana kita sa satuyang buhay.  Sa satuyang pagpangadyi.  Sa satuyang paghagad.  An Kagurangnan yaon, nagdadangog sa satuya asin aram na ngani Niya an satuyang hahagadon antes pa kita maghagad.  An Kagurangnan Ama, namomot-an kita ki orog pa sa iba Niyang mga nilalang, orog niyang namomot-an an tawo que sa mga hayop asin mga halaman, nunca Niya kita pababayaan.  Diit sana na paciencia, diit sana na pagsacrificio asin mahihiling ta na an satong minamaw-ot.  Kun an satuyang hinahagad para sa satuyang karahayan, itatao ini kan Kagurangnan sa saiyang horas asin sa paagi na Siya an nakakaaram.

            Ano pa an satuyang makukua sa paarogan ni Ana, ina ni Samuel?  Si Ana tatao utubun an saiyang panuga sa Kagurangnan.  Tatao siya ibalik an biyaya na saiyang narecibe.  Nagsabi siya na pag nagka-aki siya, ini saiyang ibabalik sa Kagurangnan.  Nagsabi siya asin ginibo niya.  May veces na kita pag may hinahagad sa Kagurangnan kita nagpopromesa asin manlaenlaen an satuyang sinasabi sa Kagurangnan.  Minsan ngani makua ta na an satuyang minamaw-ot, limot na niato an Kagurangnan, di na kita nagsisimba, di na kita nagsusulo ki candela sa Saiya.  Marhay kita pag may kaipuhan.  Pag nakua na an gusto limot na an pagpasalamat, limot na an pagbalik sa Kagurangnan.  Naaalala lang natin ang Panginoon pag kailangan natin Siya.  Lugod an satong pagpangadyi, pagrosario, pagsimba aroaldaw, domi-domingo, bulan-bulan, may kaipuhan man kita o wara.  Saro pa na paagi kun papaano niato maibalik sa Kagurangnan an gabos na gracia asin favor na satuyang narecibe iyo an pagtao sa saiyang Simbahan asin pagtabang sa satuyang kapwa.  Tunay baga na dai man kita anoman na dai man niato narecibe hale sa Kagurangnan, kaya marhay lamang na an gabos man ibinabalik niato sa Kagurangnan sa paagi kan satuyang mga tugang digdi sa ibabaw kan dagâ.

            Mga tugang, parejo ni Ana, lugod kita magin maimbod asin dai magsuko asin magsawa sa Kagurangnan minsan ngani parang dai simbag an satuyang mga pamibi.  Asin lugod kita parejo ni Ana tatao magbalik sa Kagurangnan kun ano man an gracia na satuyang narecibe.  Amen.

Reflexión personal para el sexto día de Misa de Aguinaldo

Taon C Ika-Unum na Aldaw kan Simbang Gabi, 21 December 2012, Sts. Peter and Paul Cathedral Parish, Sorsogon City, Philippines

          Kun kan sarong aldaw, an ika-apat na aldaw kan Simbang Gabi, nadangog niato na kaiba sa protagonista, sa mga bida, kan evangelio iyo si Zacarias, ngunyan namate ta na si Isabel naman siyang agom an kaiba ni Maria bilang concentracion kan satong babasahon.

          An ngaran na Isabel Hebreo Elisheva na boot sabihon “An Dios nagsumpa/An Dios nagpromesa”.  Si Isabel sinasabing pariente ni Maria pero bakong sigurado kun sinda magpinsan o kung anong clase an saindang relación.  Nakapag-agom siya ki sarong miembro kan tribu ni Levi, sarong padi, na si Zacarias.  Sinasabi sa evangelio ni Lucas na si Isabel sarong matanos na babae asin agom.  Di man siya nabiyayaan kan aki yaon pa man giraray siya sa pagserbi sa Kagurangnan.  Sa milagro kan Dios nangidam siya asin si Juan Bautista na saiyang único hijo nagin importantehon na tagapreparar kan Mesias na iyo si Jesus saiyang pinsan.

          Si Isabel maski na ngani bako pinalad na magka-aki antes kan pangidam niya ki Juan saro man giraray na matanos na agom asin babae asin tagapagserbi man giraray kan Kagurangnan.  Saro siyang arogan sa virtud na ini.  May veces na kita, pag di niato nakukua an gusto niyato, lalo na an maw-ot na gayo kan satuyang puso, nagrerebelde kita sa Kagurangnan asin ruminarayo kita saiya.  Nag-iisip kita na dai man ki dios kasi di man nadadangog an satuyang mga minamaw-ot.  Girumdumun niato na an Dios Ama sa langit, kun para sa satuyang karahayan an satuyang hinahagad, itatao ini sa horas niya.  Sabi ngani ni Jesus: kun kita na maraot kita tatao kita taw-an an satuyang mga kaakian kan saindang pangangaipo an Dios pa kaya sa langit na iyo an pinakamarhay asin orog kitang namomot-an.  Lugod tatao kita parejo ni Isabel na magin paciencioso sa Kagurangnan kun baga, tatao maghalat, asin dai nagtutunong sa paglaom asin paghagad.

          Si Isabel harani sa Kagurangnan mala ngani kan yaon na si Maria, sa tulak niya yaon na si Jesus, tulos naaraman ini ni Isabel.  Arogan man niato siya sa virtud na ini.  Dakul na veces nag-aagi sa satuyang atubangan an Kagurangnan bako niato napapansin.  Okupaduhunun kita sa kun anano na mga bagay-bagay na si Jesus na nag-aagi ni bako niatong nakikilala.  Siya na palan itong naghahagad ki piso, siya na palan itong naghahagad ki tubig, siya na palan itong naghahagad ki gubing ta nahahagkutan.  Dai kita horas magpangadyi sa simbahan o sa silencio asin secreto kan satuyang mga cuarto.  Ni quince minutos di niato maitao sa Kagurangnan.  May lutuun, may lavada, may gagansilyuhun.  Naiintiendihan man daw kan Kagurangnan.  A veces ni pagsimba dai kita horas, naiintiendihan man daw kan Kagurangnan.  Lugod an mga marhay na mga devociones na itinukdo satuya kan satuyang mga lolo asin lola, papa asin mama girumdumun niato asin gibuhun niato.  Ipasa ta man lugod an mga ini sa satuyang man na kapag-arakian.  Lugod may horas kita sa pagpangadyi para mas makilala niato an Kagurangnan asin makilala niato na Siya na palan itong ka-oficina niato, Siya na palan itong pobre na naghahagad kakanon, Siya na palan itong kataed mo na naghahagad tabang ta wara na ipang tuition sa aki sa masunod na semester.

          Mga tugang duwang bagay lugod an makua ta ki Santa Isabel sa aldaw na ini.  Parejo niya kita man lugod magin pano nin confianza sa Kagurangnan asin sa Saiyang mga plano para sa satuya minsan ngani bagan dai man ki nangyayari.  Asin parejo niya kita man lugod magin harani sa saiya asin ugos sa Dios, na tatao niato Siya mahiling cada vez na siya mag-agi sa satuyang buhay.  Amen.

Reflexión personal para el quinto día de Misa de Aguinaldo

          Kun satuyang ikukumpara an satuyang evangelio ngunyan sa evangelio kahapon, mahihiling niato an pagka-umagid kan istorya kan pagkamundag ni Juan sa istorya kan pagkamundag ni Jesus sa evangelio ni Lucas.  An iniciativa parejo hale mismo sa Kagurangnan, enot hale Saiya.  An mga taga-recibe kan marhay na bareta parejo nabigla asin dai maaraman kun anano an boot sabihon kan baretang saindang narecibe.  Pero sa parte ultima kan duwang istorya nagkaiba an reacción ni Zacarias ki Maria, an enot nagduda, ining ultima pano kan pagtubod asin paglaom sa Dios.

          An iniciativa pirmi hale sa Kagurangnan.  May plano an Dios sa satuyang mga buhay.  An mga nakaguhit sa satuyang mga palad asin nakakaag sa satuyang destino hale mismo an mga ini sa isip asin plano kan Mahal na Dios.  Dai ki accidente, gabos nasa plano.  Kaya ngani maski anano man an nangyayari sa mundo an Cristiano dai nawawaraan nin pagtubod asin paglaom.  Aram niya na an Dios, Hade kan Universo, Siya pirmi an masusunod asin an Saiyang plano pirmi an mangyayari.  Minsan may calamidad, minsan may persecución, asin kun ano pa man na manlaenlaen na pagtios, an Cristiano naniniwala na kapot kan Dios an satuyang mga buhay sa Saiyang palad asin kita Saiyang mga aki na kapot Niya kita sa Saiyang mga kamot.  Importante dai kita magbutsan sa Saiya, lalong lalo na sa mga horas nin remalaso asin kadificilan.

          Dakul na veces an mga pasabong sa satuya kan Kagurangnan bako niato tulos nasasabotan.  Maski kaitong panahon, an saiyang mensaje sa paagi kan mga pangaturugan, kan mga ngangalasan sa ibabaw kan dagâ asin sa langit, asin kan mga profetas, gabos ini bakong facil pagtaw-an ki sentido, ki kahulugan.  A veces sa satuyang interpretación nasasala kita.  Nakulang kita o nasobra.  An espíritu kan pagpangadyi magtatao sa satuya ki kalinawan ki isip asin puso sa satuyang pag-interpretar sa mga bagay-bagay kan satuyang buhay.  An Biblia asin Catecismo dakulang mga tabang sa satuyang buhay espiritual.  An satuyang pagtubod ngunyan na mga aldaw na ini dapat man educada asin formada.  Tatao kita kan mga kadahilanan kan satuyang pagtubod.  Nata arog kaito?  Nata arog kaini?  Dapat tatao kita kan mga kasimbagan sa manlaenlaen na mga kahapotan.  Dakulaon man na tabang an satuyang pagdangog asin activo sa paghorophorop sa homilia cada Santa Misa.  Kun may bako kitang na-iintiendihan yaon an satuyang mga catequista, mga kamadrehan asin kapadian sa pagtao sa satuya ilaw minsan an mga bagay-bagay nasa dolom.  Yaon din an mga periódicos, TV, radio asin internet na nakakatabang sa satuyang pag-adal manongod sa pagtubod.  Kaipuhan niato an humildad kan isip asin puso na tatao maghapot asin maghagad ki tabang kun may veces kaipuhan.

          Pinaka-importante iyo an atitúd ni Maria asin bako ni Zacarias.  An satuyang confianza sa Dios magin man lugod masarig parejo kan confianza kan sarong aki sa saiyang ama.  Dai niato na-iintiendihan gabos, asin dai niato ma-iintiendihan gabos.  Halangkawon too an naaabot kan kadonongan kan tawo pero may limite.  Arogante an tawo na nag-iisip na kaya niyang masabutan an gabos, na kaya niyang taw-an kadahilanan an cada kahapotan, an satuyang pag-intiende may limite.  Aram ta man dai kita lolokohon kan Dios.  Lugod tatao kita magsunod.  Magsunod kita parejo kan mga aki sa saindang mga magurang.  Dai ta man mahiling gabos na hinalean kan sarong bagay asin dai ta man mahiling an gabos na padumanan kaini, parejo ni Maria kita man magsabi sa Kagurangnan: Fiat voluntas tua!  Kagurangnan mahinguha man ako, pero sa gabos bahala ka na.  Amen.

Reflexión personal para el cuarto día de Misa de Aguinaldo

Taon C 19 diciembre 2012 cuarto dia del Misa de Aguinaldo Sts. Peter and Paul Cathedral Parish

            Nabasa ta sa primerong babasahon ginono sa libro kan mga Hukom capitulo 13 kun paano namundag si Samson.  Mahihiling ta an paralelismo kaini sa pagkamundag ni Juan sa evangelio segun Lucas capitulo 1 asin mahihiling man niato an paralelismo kaining duwang mga historia kan pagkamundag (ni Samson asin Juan) sa pagkamundag ni Jesus.  Ngonian mga tugang na ika-upat na aldaw kan satong pag-Simbang Gabi, tugoti po nindo akong i-concentrar an satuyang atencion sa personaje na si Samson, Hukom asin iyo an pinakamakusog na linalang kan saiyang panahon.

            Si Samson bag-o pa siya namundag pinili na siya kan Kagurangnan para sa plano na pagligtas sa Israel, na kaidtong panahon nabibihag kan mga Filisteo.  Especial na an trato sa saiyang mga magurang asin sa saiya mismong pakamundag asin hanggang siya duminakula.  Naging primerong soldado siya kan Israel sa pakilaban kaini contra an mga Filisteo.  Nahulog man si Samson sa patibong kan mga Filisteo sa partecipacion ni Delilah, nahiling ni Samson an saiyang kasal-an, siya nagbakle, buminalik sa Dios asin sa urhing acto kan saiyang buhay winasak niya an pagano na templo kan mga Filisteo kaiba an dakulon pa na mga Filisteo.

            Pagnaiisip ta si Samson, an primerong bagay na nagdadatong sa satuyang mga isip iyo an kakosogan.  Si Samson an pinakamakosog na nilalang kan saiyang kapanahonan.  Ining kosog puede niato ma-aplicar sa satuyang presenteng mga situaciones.  Importante na kita gabos makusog an determinacion sa maski anano man na kaipuhan niatong gibohon sa buhay: sa personal na buhay, sa familia, sa escuela, sa trabajo, maski saen man.  Ugaring nahihiling niato na an kusog kan determinacion bakong suficiente ta nagkukulang asin nagluluya ini.  Namate ta na maski anano an kusog ni Samson, kusog kan hawak niya asin kusog kan determinacion niya, namate ta na nahulog man gihapon siya sa tentacion.  Sa satuyang buhay espiritual nangyayari na maski anano ka kusog kita bilang mga tawo, sa satuyang decision asin determinacion, nangyayari asin nangyayari na nahuhulog pa man giraray kita sa mga tentaciones sa buhay lalo na sa satuyang mga kaluyahan.  Ano an dapat niatong gibohon?

            Yaon pa man giraray an paghikayat niato sa gabos asin sa satuyang mga sadiri na dapat kita may sarong decision sa buhay asin makusog na determinacion na gibohon ining decision maski anano pa an mangyari.  Pero kaipuhan na dagdagan ta ining decision asin determinacion.  Dagdagan ta ini kan satong intencion.  Anong intencion?  Na kita naghihingoha bako lang para sa satuyang mga sadiri kun di man para sa satuyang familia, comunidad, asin finalmente asin pinaka-importante kita naghihingoha para sa Kagurangnan.  Para sa pagkamoot niato Saiya.  Kasi kun sa pakurusugan man lamang kan decision asin determinacion, hiling na niato na kaya ta pero kita may limite asin maabot an panahon kun saen kita mahuhulog ta sa satuyang kakusugan, kita maluya.  Tawo kita.  Pero sa gracia kan Mahal na Dios asin sa satuyang pagsa-isip asin pagsapuso na gabos ini ginigibo niato para sa satuyang mga namomot-an sa buhay, asin para sa Dios na orog na namomoot sato asin orog na satong namomot-an, pues kakayanon ta an gabos.  Sa intencion na ini kakayanon ta an gabos, asin kita magiging makusugon sa gracia kan Mahal na Dios.

            Lugod mga tugang kita gabos bako lang maging mga Samson sa kakusugan kan decision asin determinacion.  Kita man maging makusog bako lang para sa satuyang mga sadiri, kun di man para sa satuyang mga namomot-an asin para sa Dios na satong orog na namomot-an.

Reflexión personal para el tercer día de Misa de Aguinaldo

18 diciembre 2012 Parroquia de Santos Pedro y Pablo

            Si Jose na saiyang agom matanos na lalaki asin habo siyang ipasupog.  Kun kahapon na Domingo Ika-tolo kan Adviento, an personaje na itinatao sa satuya bilang arogan iyo si San Juan Bautista, ngonian na aldaw, ngonian na ika-tolong aldaw kan Simbang Gabi, bilang arogan sa satuyang pag-preparar sa pagdatong ni Jesus sa Belen asin sa satuyang mga puso asin buhay iyo si San Jose.

            Si San Jose iyo an pinili kan Dios Ama na magin agom ni Maria, na magin ama ni Jesus digdi sa daga.  Kaya baga lolô, nickname, kan mga may pangaran na Jose iyo an Pepe, P. P., padre putativo, foster father ni Jesus.  Sabi mismo sa capitulo primero kan evangelio ta na nadangog pa lamang, si Jose daa sarong matanos na lalaki.  Namot-an siya ni Maria saiyang agom asin ni Jesus saiyang aki, mala ngani nagmondo asin nagtangis si Jesus kan si Jose nagadan.  Puede ta man ikaag sa satuyang imaginación kun papaano si Jose an nagtukdo ki Jesus gabos na aram kaini sa buhay asin sa trabajo.  Tinukduan ni Jose si Jesus sa mga maray na ugali.  Sa mga virtud na dapat hingohaon makua asin sa mga vicio na dapat hingohaon likayan.  Tinukduan ni Jose si Jesus kun papaano magtrabajo, maging marhay na carpentero, magin paciencioso sa trabajo asin sa kapwa.

            Sa satuyang sociedad ngonian an mga ama, an mga lalaki, padiit-diit ini-echa fuera.  Para bagan di na kaipuhan sa buhay kan saiyang agom na babae.  Para bagan di na kaipuhan kan saiyang aki.  Pejor, an lalaki hinihiling na sarong sagabal sana, sarong karaotan sana kan familia, parainom, babaero, daing cuenta.  Mas marhay daa na wara siya sa familia.

Ini man talaga kaiba kan plano kan demonio.  Gusto niya raoton an familia kaya saro sa paagi iyo an pagraot sa institución kan paternidad.  Sa pagraot kan familia kaiba sa plano an pagraot sa ama, sa harigi kan familia.  Tumbahon mo an harigi, rompag an harong.  Pero kita na mga lalaki, mag-aki man, soltero, asin kamo na mga ama, lalong lalo na an mga Cristianong ama, dai matugot kaini.  Dai kita matugot na raoton an familia.

An mga lalaki, kita mas marhay pa ki sa gabos na sinasabi kan sociedad ta ngonian.  May mga iba talaga na nagpabaya na, pero an mayoría yaon pa man gihapon sa paghingoha sa kaayadan.  Mas dakul pa man gihapon an mga lalaki na mapagmahal sa saindang mga agom asin mga aki.  Mas dakul pa man gihapon an mga lalaki na trabajoso asin paciencioso sa buhay, sa trabajo asin sa kapwa.  Mas dakul pa man gihapon an mga lalaki na tatao mabuhay para sa iba, para sa familia, tatao itao an buhay para sa kapwa, lalong lalo na para sa tawo na kinaag kan Dios kataning ninda.

Tinutukduan kita ni San Jose na magin mga matanos na lalaki.  Magin matanos sa pagsunod sa plano kan Kagurangnan.  Maghihingoha kita sa satuyang mga ambiciones asin planos pero an ambicion asin plano man gihapon kan Dios an masusunod.  Tatao kita mag let go and let God.  Tatao kita maaraman an plano kan Dios sa satuyang buhay sa pagpangadyi aro-aldaw, opo, kita man mga lalaki.  An pagpangadyi bako lang para sa babae, an pag-rosario bako lang sa babae, an pagsimba bako lang sa babae.  Sa tawo yan, sa babae asin sa lalaki.

Tinutukduan kita ni San Jose magin matanos na mga lalaki, magin mga lalaki pano kan virtud asin laban sa vicio.  Marhay na bagay an satuyang pag-relax kun minsan sa pag-inom, sa pag-sigarilyo, sa pagsugal, pero kun ini na-sobra an pag-inom nagigin causa sa pagkaraot kan familia, an pag-sigarilyo na-resulta sa pagkaraot kan sadiri, an pagsugal nakaraot kan gabos na satuyang finondar.  Mas marhay na iwasan ta an mga ini, bako lang para sa satuyang mga familia, kun di man para sa satuyang mga sadiri.  Clarado pero na nunca marhay mag-droga: kasalan an paggamit kan droga, maski anong tipo kan droga, ta an mga ini nakakapahale, maski pa sa dikit na panahon, kan satuyang sentido, kan satuyang razón, na nagka-causa kan paggibo kan iba kan mga bagay na nunca ninda gigibohon kun bako sinda naka-droga.

Finalmente tinutukduan kita na mga lalaki ni San Jose na magin mga lalaki trabajoso asin paciencioso.  Kita an mga nagdadara ki pagkaon sa kaonan kan harong na linuluto kan mga ina kan familia.  Cada lalaki maghingoha na mag-trabajo, maski anong trabajo yan, basta legal asin sa karahayan, marhay yan asin nagtatao sa satuya ki dignidad.  Sa satuyang trabajo gibohon ta an gabos para magin marhay an resulta kan satuyang trabajo, marhay na calidad, nakaka-contribuir sa humanidad, servicio sa comunidad asin sa bilog na kinaban.  Maski may diyo na pagsakit, dificultad, mag bagay-bagay na bako niatong naooyonan, diretso lang kita sa paghingoha ta aram ta na salamat man sa satuyang trabajo nagigin mas magayon ining mundo na satuyang inierokan asin inierokan kan satuyang mga namomot-an sa buhay.

Sa mga lalaki digdi presente, aki pa man o soltero na o may familia na o gurang na, si San Jose lugod an satuyang arogan: si San Jose matanos na lalaki, kita man lugod magin mga matanos na lalaki.  Amen.

Taon C Ika-Duwang Domingo kan Adviento

Taon C Ika-Duwang Domingo kan Adviento

Mga Babasahon: Bar 5:1-9 / Ps 126:1-2.2-3.4-5.6 / Phil 1:4-6.8-11 / Lk 3:1-6

December 9-15 iyo an Youth Ministry Awareness Week.  The Church in the Philippines is enjoined to be aware of the ministry among young people.  Through the leadership of the Regional Youth Coordinating Councils and the diocesan youth ministry offices, the local Churches engage in a weeklong program promoting the importance and relevance of youth ministry.  There is a prayer which may be said after communion in this week’s Sunday Mass.  This week culminates with National Youth Day on 16 December.  Ining informacion ginono sa Ordo 2013.

Baruc 5:1-9

            Jerusalem, hubaa an sulot mong gubing nin kamondoan asin kasakitan, dangan sulotan an mayo nin kasagkoran na gayon kan kamurawayan nin Dios.  2Sulotan an alikboy nin katanosan nin Dios.  Bugtakan sa saimong payo an korona kan kamurawayan nin Dios na Mayo nin Kasagkoran.  3Ipapahiling nin Dios an saimong kagayonan sa lambang nasyon sa daga.  4Sagkod lamang na masabi siya saimo: “An saimong katiwasayan naghahale sa saimong katanosan, asin an saimong kagayonan naghahale sa saimong kaimbodan sako.”

            5Mabagangon ka, Jerusalem, magtindog ka sa alitoktok kan bukid.  Hilinga kun saen tintipon kan An Banal an saimong mga aki na hale sa sirangan saka hale sa solnopan.  Nag-oorogma sinda huli ta nagiromdoman sinda nin Dios.  6Jerusalem, kinurua saimo kan mga kaiwal an saimong mga aki asin nagraralakaw sinda mantang dinadara sinda sa harayo; alagad ibabalik sinda saimo nin Dios na lunad sa kaurawayan, na garong nakatukaw sa trono nin hade.  7Nagboot an Dios na pahababaon an lambang halangkaw na bukid asin an daing sagkod na mga bulod; nagboot siya na tambakan an mga kapantayan saka patagon an daga, tanganing ligtas na makapuli an banwaan nin Israel sa kamurawayan nin Dios.  8Sa pagboot nin Dios, matunga an mga kadlagan nin mahahamot na mga kahoy tanganing lindongan an banwaan nin Israel.  9An Dios iyo an mangengenot sa pagpuli kan Israel.  Mabalik sinda na nag-oogma nin marahay, na pinangengenotan kan saiyang pagkaherak asin katanosan, asin napapalibotan kan liwanag nin saiyang mamuraway na presensya.

Salmo 126:1-6

            Kan ibalik nin

                        KAGURANGNAN an

                                    kayamanan nin Sion,

            nakabaing kita sa mga

                        nangatorogan!

            2Dangan napano kita nin

                        kaogmahan,

            nag-awit sa kagayagayahan.

            Dangan nagsabi an ibang nasyon

                                    manongod sato,

                        “Dakulang mga bagay an ginibo

                                    sainda nin KAGURANGNAN.”

            3Dakulang mga bagay an ginibo

niya para sato,

            kaya kita maogma!

            4Tawe kami giraray nin kauswagan,

                                    KAGURANGNAN,

                        siring na an uran nagtatao nin

                                    tubig sa mamarang mga salog.

            5An mga minasabwag na

                                    nagluluha,

                        mag-ani logod na maogma.

            6An mga naghihibi mantang

                                    minaluwas dara an mga banhi

                                    na isasabwag,

                        mabalik na nag-aawit sa

                                    kaogmahan,

                        dara an saindang inani.

An Surat ni Pablo sa mga TAGA FILIPOS 1:4-6,8-11

...  4Kun ipinapamibi ko kamo, maogma an pagpamibi ko, 5juli sa pagtaban nindo sako sa pagpahayag kan Marahay na Bareta poon pa kan enot na aldaw sagkod ngunyan.  6Kaya bilog an paniwala ko na an Dios na nagpoon kan marahay na gibong ini saindo, mapadagos kaiyan sagkod na matapos iyan sa Aldaw ni Jesu-Cristo.  …  8Saksi ko an Dios na an paghidaw ko saindo arog kadakula kan pagkamoot saindo nin Cristo Jesus.

            9Ipinapamibi ko na orog pang magtalubo an saindong pagkamoot, sagkod an saindong pakanood saka pakasabot, 10tanganing mapili nindo an pinakamarahay.  Dangan magigin malinig kamo asin mayo nin sala pag-abot kan Aldaw ni Cristo.  11Mapapano an buhay nindo kan bunga nin katanosan na minaabot huli ki Jesu-Cristo, sa kamurawayan asin sa kaomawan nin Dios.

Lukas 3:1-6

            Ikakinseng taon na kan paghahadi ni Tiberio Cesar; si Poncio Pilato gobernador sa Judea, si Herodes an namamayo kan Galilea asin si Felipe an kagsakop kan teritoryo nin Iturea saka Traconite, asin si Lisania naman kan Abilinia.  2Si Anas asin si Caifas iyo man an mga halangkaw na padi.  Kan panahon na iyan, si Juan na aki ni Zacarias yaon sa kalangtadan.  Uminabot ki Juan an tataramon nin Dios, 3kaya linibot niya an bilog na teritoryo kan Jordan saka naghulit, “Magbakle na kamo saka magpabunyag, asin papatawadon kamo nin Dios kan mga kasalan nindo.”  4Siring sa nasusurat sa libro ni Propeta Isaias,

            “Igwang nagkukurahaw sa

                        kalangtadan:

            ‘Andama an dalan para

                        sa Kagurangnan;

            tanosa an dalan na saiyang

                        lalakawan!

            5Tambonan an gabos na kababaan,

                        pantayon an gabos na kabubuldan

                                    asin kabukidan

            An mga tinampong tiko-tiko,

                        tanoson;

            an mga dalan na bakong sarama,

                        saramahon.

            6Mahihiling kan gabos na tawo

                        an paraligtas nin Dios!’”

PERSONAL NA MGA REFLECCIONES:

            Nadangog ta sa Evangelio segun san Lucas: Uminabot ki Juan an tataramon nin Dios, kaya linibot niya an bilog na teritoryo kan Jordan saka naghulit, “Magbakle na kamo saka magpabunyag, asin papatawadon kamo nin Dios kan mga kasalan nindo.”  Bayae po nindo mga tugang na sa aldaw na ini, ika-Duwang Domingo kan Adviento, sa satong pagpreparar kan pagdatong kan Omboy digdi sa kinaban asin sa satuyang mga puso, iyo ini an satuyang paghorop-horopan.

            An realidad kan kasalan halos kasing haloy na kan presencia kan tawo sa kinaban.  An dai pagsunod kan tawo sa kabotan kan Dios mababasa ta sa enot na libro pa sana kan Banal na Kasuratan.  Libro cada libro mababasa ta an mga consequencia kan pagsinutil kan tawo.  Yaon an kasalan asin nahihiling ta asin nadadangog niato an mga karaotan kaini.

            Sa historia universal, siring man sa historia nacional patin sa historia local, nahihiling ta man asin daing duda na kaiba kan mga gibo na ngangalasan asin pano kan kamurawayan kan tawo yaon man an mga gibong maraot, marigsok asin pano nin alo kan iba.  An tawo nakakagibo kan marahay siring man nin mga maraot, an tawo nalalampasan pa an mga anghel, an tawo nahuhulog pa que sa mga demonio.  Clarado an presencia kan gracia asin kasalan.

            Ano daw ta ngonian sa panahon niato, ining mga bagay na clarado sa gabos asin tanggap kan gabos, ibinubugtak sa duda asin para sa dakul nawawara na ngani sa pag-iisip.  Sa panahon ta ngonian nawawara na an sentido kan kasalan.  Poon sa pag-iisip na gabos man ma-iintiendihan kan Kagurangnan kaya puede man yan, hanggang sa ok lang yan ta bako man yan kasalan.  Sa paagi kaining pag-iisip na ini tunay na dakulon an mga tawo, lalo na an mga kabataan, an nahuhulog sa mga patibong na di ngani ninda namamangnohan.  Puede niatong isipon na marhay talaga ining plano ini kan demonio, ta efectivo.  Ipinapaniwala niya da wara man siya, wara man tentacion, wara man kasalan, kaya sige lang kita.  Namangno ka diri ka na nagmangno.

            Kinukurahaw ngonian ni San Juan sa satuya gabos: may demonio! may tentacion! may kasalan! magbakle!  Hilingon ta ngonian na aldaw mga tugang an satuyang pang-uru-aldaw na buhay asin tutukan ta ining mga momentos kun saen nahuhulog na palan kita sa patibong dai niato narereparo.  Busision niato an satuyang mga gibo asin hilingon niato kun tugma ba an gabos na ini sa kabotan kan Mahal na Dios?  Tugma ba por ejemplo sa Sampolong Tugon kan Dios?  Hinihingoha ba niato an tama asin linilikayan an sala maski may pagsakit asin pag-sacrificio, o nahuhulog na man kita sa mentalidad nin diit man sana, puede na yan, ok lang yan?

            Una vez mga tugang na ma-realizar ta na nasasala kita, dangogon ta ining kurahaw ni San Juan, asin magbakle kita pabalik sa Kagurangnan.  Patawada ako Kagurangnan sambiton ta Saiya.  Ini an una asin pinaka-importante na dapat niatong gibohon, mahiling an satuyang pagkakasala asin maghagad ki kapatawaran, mabukasan an puso.

            An Kagurangnan pinapadali sa satuya an gabos kaya an kapatawaran puede niato makua sa dakul na paagi.  Sa pagpangadyi, sa pangurus, sa paggibo kan marahay asin sa pag-suportar kan mga kahorasaan, gabos ini nagpapara kan satong mga kasalan na hababaw sana.  Lo mismo, pinapatawad asin pinapara an satong mga kasalan sa pagsimba asin pag-comunion maski ngani may mga hababaw kitang mga kasalan.  Ibang situacion na kun halimbawa an satong kasalan magabat na.  Bako lang venial kun di mortal sin na.  Kaipuhan ta nang magduman sa Kagurangnan sa confesionario, magluhod sa atubang Niya sa atubang kan padi, asin sabihon sa Dios sa padi an gabos asin cada saro na kasalan na naginibuhan.  Sabihon ta Padre, bendicioni ako ta ako nagkasala.  Sabihon ta An ultimo ko na pagkumpisal iyo kan nakaagi na semana, o bulan, o taon.  Ngonian sabihon na niato an gabos niatong mga naginibuhan laban sa satong sadiri, kapwa asin contra sa Dios.  Pagkatapos kaini kita maghahalat kan silot kan padi asin kan pangadyion na satuyang sasambiton.  Nunca maghale antes kan absolucion na iyo an pinakaimportante na parte kan pagkumpisal.  Salamat sa absolucion an Dios pinapatawad an satong mga kasalan.

            Lugod sa Adviento na ini, pag-andam niato sa pagdigdi kan Aki kan Dios, satong Tugang sa Saiyang pagkanitawo, satuyang andamon an dalan para sa Kagurangnan; tanoson an dalan na saiyang lalakawan! Tambonan an gabos na kababaan, pantayon an gabos na kabubuldan asin kabukidan. An mga tinampong tiko-tiko, tanoson; an mga dalan na bakong sarama, saramahon.  Dinaog na ni Jesus an kasalan sa Cruz, mabakle kita, magbalik kita pasiring Saiya.

Reflexion Personal para sa Primerong Domingo kan Adviento Taon C

Yaon na an Adviento, upat na mga Domingo ki preparacion para sa maabot na Pagkamundag kan Kagurangnan Jesu Cristo sa Belen, an Pasko.  Ngonian na Adviento 2012 boot ko pong tutukan an satuyang pagtubod, an base kan satuyang paglaom asin pagkamoot sa Dios na nani-Tawo, bilang pagtugon sa invitacion kan Santo Padre ngonian na Taon ki Pagtubod.  Upat ini na Domingo kun saen puede niatong paghorop-horopan asin pag-adalan an upat na mga base kan satuyang tinutubudan.  An Minatubod.  An mga Sacramento kan Banal na Simbahan Catolica.  An Sampolong Tugon kan Dios.  Asin an satuyang mga Pangadyion lalong lalo na an Ama Niamo.

            Satuyang observacion na ining mga base kan satuyang tinutubudan nalilimutan na asin dai na aram kan mga Catolico.  Minsan ngani kita mismo na yaon sa Harong na ini kan Dios, may mga bagay man kitang nalilingawan na.  An mga kaakian aram ini sa saindang elementaria.  Pagdatong ninda ki segundaria lingaw na.  Lalo na pag colegio na, an mga natuom kaitong panahon, mga na-intiendihan na, asin naisabuhay na kuta na, nagkawarara na naman.  Ano kaya an saindang maituturo sa saindang sadiring mga kaakian pagdatong kan panahon na sinda mag-aragom na, asin mag-araki naman sinda?  Pag an mga ini yaon na sa interview ta kakasalon na, siring baga sa mga wara nanggad nangyaring educacion asin formacion sainda kan sinda mga aki pa, daing sorpresa kun sa saindang sadiring mga harong asin familia dikit sana o halos wara sindang naitutukdo sa saindang mga kaakian manungod sa mga base kan satuyang pagtubod.

            Kayo mga tugang balik kita sa base kan satuyang catecismo: Minatubod, Pitong Sacramento, Sampolong Togon, asin an mga Pangadyion, lalong lalo na an Ama Niamo.

            Nagtutubod ako sa Dios.  An satuyang sinasamba an Dios, bako mga dios-diosan.  Saro sanang Dios, an pinakamakapangyarihan sa gabos.

Amang makakamhan, Kaglalang kan langit asin daga,  Bako sana Siya Dios sa satuya, Siya Dios Ama langit, na namomoot sa satuya asin kita inaantabayan.  Siya an satuyang Kaglalang asin sa Saiya kita mabalik.  Siya man an satong kaantabay sa buhay na ini, kun ano an satuyang kaipuhan minadalagan kita sa Dios ta Siya satong Ama.

Asin ki Jesu-Cristo, Aking bogtong niya,  An Dios Ama may Dios Aki kaya Siya Ama asin Ini Aki.

Kagurangnan ta,  An Dios Ama Kagurangnan, an Dios Aki Kagurangnan ta man.  Bako lang Siya tawo kundi Dios na nani-tawo.  Kaya baga kan si Jesus nabubuhay pa sa ibabaw kan daga gabos na mga bagay bilang tawo ginibo niya maliban sa kasalan asin may mga bagay Siyang nagibo na di niato kaya gibohon dahil Siya Dios man.

Ipinangidam huli kan Espiritu Santo,  An pagkamundag ni Jesus, Dios na nani-tawo, hale mismo sa Dios, sa Espiritu Santo, ika-tolong Persona kan Santissima Trinidad, kaiba an Ama asin an Aki.  Si san Jose, satuyang ama sa Simbahan, ika-duwang ama sin Jesus, saiyang padrasto, si Jesus inampon ni san Jose.  An tunay na Ama ni Jesus iyo an Dios Ama sa langit.  Si san Jose ama nin Jesus sa daga, asin sa saiya si Jesus nagin sarong aking masinunod.

Namundag ki Virgen Maria,  Dios si Jesus pero Siya tawo man, an Saiyang hawak, an Saiyang laman hale mismo sa sarong tawo, si Maria.  Siya sarong mabinion na babaye na namundag na warang kasal-an, nabuhay asin namatay na daing digta, totalmente sarong tawong dedicada sa Dios.

Pinasakitan kan panahon ni Poncio Pilato,  Itinao nin Dios Aki si Jesu Cristo an Saiyang buhay sa satuya gabos, ini totoong nangyari, nasa kasaysayan kan mundo, sa panahon kan gobernador Romano na si Poncio Pilato si Jesus pinasakitan, ginadan asin linubong.

Ipinako sa cruz, nagadan, asin ilinubong,  An Tagapagligtas kan mundo ipinako sa cruz, pinakamaraot na padusa kan mga Romano kaitong panahon sa mga bakong Romano.  Si Jesus nagadan, tunay na nawaraan kan buhay sa ibabaw kan daga, saksi an saiyang Ina asin si san Juan saiyang padangat na disipulos.  Si Jesus ilinubong.  Sa gabos Siya nagin tawo sa pagkamundag, sa pagdakula, sa pagtrabaho, sa pag-ogma, sa pag-ulok, sa pagmoot, sa pagsakit, sa pagkagadan, asin sa paglubong.  An Dios na nani-tawo aram an gabos niatong situaciones asin an bilog niatong situación.  Dai kita makakasabi na dai kita naiintiendihan kan satuyang Dios.

Huminilig sa mga gadan,  Tunay na siya nagadan, tunay na nawaraan ki buhay, asin duminuman Siya asin kinua gabos na mga nagadan hale ki Adan asin Eva hanggan sa panahon Niya, asin an mga matanos kinua Niya pasiring sa langit.  Kita gabos mapa-langit salamat Saiya, iyo iyan kun kita matanos namuhay sa kinab-an sa pagsunod Saiya.

Kan ikatolong aldaw nabuhay-liwat hale sa mga gadan,  Siya man nagadan, Siya nabuhay-liwat hale sa mga gadan.  Primera vez na may nabuhay hale sa mga gadan, asin ini sarong tawo na sarong Dios man sana.  Saksi kaini an mga minasunod: an Saiyang Ina, si Maria Magdalena, an Saiyang mga disipulos.  Tunay na nabuhay-liwat si Jesus, bako ining invento kan mga apóstoles asin kan Simbahan.  Kun Siya nabuhay-liwat kita man mabubuhay-liwat hale sa mga gadan.  Iyo ini an satuyang pagtubod asin paglaom.

Suminakat sa kalangitan, nagtutukaw sa too kan Dios Amang makakamhan,  Buminalik na an Dios Aki sa kataed kan Dios Ama.  Tapos na an Saiyang misión, kita nailigtas na sa kasalan.  Ipinepreparar na Niya an satuyang eerokan sa langit.  Tinatabangan Niya kita gabos na sumakat sa langit.

Hale duman mabalik sa paghukom sa mga buhay asin mga gadan.  Dai ta aram kun kinano pero an sigurado may katapusan an kinaban asin si Jesu Cristo maghuhukom sa Satuya.  Siya an Dios nin pagkaherak pero an pagkaherak kaiba kan justicia.  Dai kita pipiriton kan Dios na mamot-an Siya, an pagkamoot libreng itinatao asin riniresibe, nunca ipinipirit.  Una vez na ipirit an pagkamoot, dai na iyang pagkamoot kundi piriritan na sana.  An pagkamoot itinatao o dai, riniresibe o dai.  Daing butnga, o yaon o dai.

Nagtutubod ako sa Epiritu Santo,  Sa satuyang pangurus sinasabi niato “Sa Ngaran nin Ama, nin Aki asin nin Espiritu Santo”.  Siya an Ikatolong Persona sa Saro sanang Dios.  Ipinadara Siya kan Ama asin Aki sa bilog na mundo, sa bilog na Simbahan, para gabay asin guía kan gabos para sa paglakbay asin paghingoha niato gabos pasiring sa Dios sa langit.  Siya an satuyang kosog sa paggibo kan tama asin kosog sa paglikay sa sala.

Sa banal na Simbahan na católico,  Kan si Jesus huminale asin duminuman sa langit, bako Niya kitang pinabayaan.  Iminukna Niya an Simbahan bilang tabang sa gabos para kita mailigtas bako saro saro kundi bilang sarong comunidad.  An Simbahan Catolica tabang sa gabos paduman sa Dios, sarong hikot pasiring sa parasira, sarong barko pasiring sa satuyang padumanan.  Servicio sa gabos para makamit an kalangitan.

Sa paropakinabang nin mga santos,  Kitang mga Cristiano Catolico may magayunon na paniniwala na iyo an paropakinabang nin mga santos.  Pag render cuenta aram ta na an satuyang paghingoha sa kaayadan asin paghingoha sa paglikay sa karatan bako lang satuya an efecto kundi untali man ini sa iba.  Kun kita marahay mas nagiging marahay man an iba, kun kita maraot mas nagiging maraot man an iba.  An satuyang hiro digdi sa kinaban afectado man an mga nasa Purgatorio, an karahayan kan mga nasa langit afectado kita gabos sa kinaban asin sa Purgatorio, an pagsakit kan mga nasa Purgatorio natatabangan man kitang mga nasa kinaban.

Sa pagpatawad nin mga kasâlan,  An punto bako pirang veces nagkasala, an punto, habang buhay pa, puedeng puede an tawo bumalik sa Dios.  Habang buhay pa puede pa ma-salvar ta si Jesus naghahalat sa satuya.  Habang buhay pa may pag-asa pa.

Sa pagkabuhay-liwat nin laman,  Iniingatan ta an satuyang hawak ngunian, an satuyang laman, dai ta ini linuluhuan, pinuputol, dai niato pinapatay an satuyang sadiri, ta nagtutubod kita na kun anano an yaon na laman sa satuya iyo man an satuyang magiging laman sa langit, naging perfecto, pero iyo na iyan.  Kun ano an itinao satuya kan Kagurangnan dai na Niya yan binabawi.  Dinadagdagan Niya, mas pinapakarhay Niya, pero dai na Niya binabawi an Saiyang mga regalo sa satuya.  Una vez itinao na, itinao na iyan.

Sa buhay na daing kasagkoran.  Natural kitang gabos nagmamaw-ot sa buhay na daing kasagkoran, kaya iyo iyan an itinatao kan Dios na namomot-an kita asin itinatawo sa satuya gabos niatong mga orog na minamaw-ot.  Sa buhay na daing kasagkoran na iyan kaiba niato an Dios, na iyo an tunay niatong kaogmahan.

Amen.  Ining tataramon na ini boot sabihon “gabos na sinabi ko tinutubudan ko”.

Matindog po an gabos asin sarabay niatong pangadyion asin sambiton ki maluway sana asin udok sa boot an satuyang Pagtubod.