Ika-anom na Domingo kan Ordinaryong Panahon (Taon A)

Ika-anom na Domingo kan Ordinaryong Panahon (Taon A)                 

Sabi kan Libro ni Sirac sa Enot na Babasahon: an tataramon kan Mahal na Dios regalo Niya sa satuya gabos.  Dagdag man ni san Pablo sa saiyang primerong Surat sa mga taga-Corinto sa Ikaduwang Babasahon: sa paagi kan kadonongan kan Kagurangnan Dios, ginigiyahan Niya kita sa karahayan asin rinarayo Niya kita sa karatan.  Masasabing nagkapira sa mga pinakadakula sa Saiyang mga regalo gikan sa Saiyang kadonongan iyo an Saiyang mga Tugon sato.  Orog nanggayo an mga Sampolong Togon kan Dios sa mga Judío, na iyo man an Sampolong Togon sato na mga Cristiano Católico.  Maski an mga dai nagtutubod dai minaduda na napapano nin kadonongan ining mga Togon asin tunay na regalo para sa sociedad kan mga tawo, para sa familia asin para sa lambang tawo.

          Nabanggit ni san Mateo sa Evangelio ngonian na ika-anom na Domingo kan Ordinaryong Panahon tolo sa Sampolong Togon ni Moisés.  Dai ka maggadan; dai ka magdurog sa bakong mong agom; asin dai ka magputik manungod sa saimong tugang.  Minsan ngani iniisip kan iba na negativo ining mga patanid asin nagbabawal, an tunay asin totoo iyo na ini positivo sa saindang mensaje asin agyat sa cada saro.  Dai maggadan boot sabihon respecto kan buhay.  Dai ka magdurog sa bakong mong agom boot sabihon respecto kan buhay familia.  Dai ka magputik manungod sa saimong tugang boot sabihon respecto kan buhay privado kan satong kataning.  Bako sana ini mga pagbabawal kundi agyat para sa más marhay na buhay sa sociedad, familia asin cada persona.  Aram niato an desastre na gikan sa paggadan kan sarong inocente asin an kadakul na mga consequencia kaini, orog nanggayo an paggadan sa inocente sa laog kan tulak kan ina.  An paggadan kan sarong aki sa poponan kan saiyang sadiring ina nagkukurahaw ki justicia sa daga asin sa langit.  Aram niato an desastre na gikan sa pagdurog sa bakong sadiring agom, kun papano rinoronot kaini an relación kan mag-inagoman asin kan mga magurang asin saindang mga kaakian.  An pagdorog sa bakong sadiring agom guminagadan sa buhay familia, na iyo an célula kan sociedad, kaya ginagadan kaini an sociedad mismo.  Aram niato an desastre na gikan sa pagsaksi ki putik manungod sa kapwa niato, kun papano ginagadan kaini an tawo sa saiyang dignidad asin reputación na nahuhusgahan na minsan sa kawaraan niya oportunidad na depensahan an sadiri, asin kun papano nagka-causa ini ki kolog asin dagok na nag-aagrangay ki justicia contra sa buwaon asin paralibak.  An pagsaksi ki putik manungod sa kapwa iyo an paggadan sa kapwa, maski na daing dugo na naibulos.

          Mamibi kita sa Domingo na ini, sa Santa Misa na ini, na magpasalamat sa pagtanggap kan mga regalo kan Tataramon kan Mahal na Dios, asin na magdanay sa pagmate kan kadonongan kan Kagurangnan Dios.  Minsan an pagsunod sa Saiyang mga Togon nangangaipo kan satong sacrificio, perseverancia asin pagtindog giraray cada vez matumba, aram niato na an pagsunod sa Dios iyo sana an makakatao sato ki katoninongan, kaogmahan asin kapanoan sa satong mga kakulangan.  Amén.