Solemnidad de Cristo Rey del Universo Taon C

          Sa Domingo na ini, an ultimo na domingo kan Ordinaryong Panahon, sini-celebrar kan bilog na Simbahan an Solemnidad kan Cristo Hade.  Kan 1925 in-instituir ining Kafiestahan ni Papa Pio XI laban sa secularismo na nagpopoon pa lang kaidto mag-reinar sa mga nación, sa mga familia asin sa mga puso kan tawo.  Boot ipagiromdom kan Santo Padre na si Cristo an Hade kan bilog na universo asin bako ining mga salang idea asin mga material na bagay.  Kaidto man lalo na ngonian kun sano an secularismo laganap na sa sangkatawohan marahay-rahay na i-celebrar kan bilog na Simbahan ining Solemnidad sa paggiromdom sa gabos na si Cristo Hade niato asin daing iba.

          Sa Enot na Babasahon an pinili na nación, an mga Israelita, nakakaag sa difícil na situación.  Dakulon an saindang mga kaiwal asin dai ki guía.  Ultimo si Samuel sa mga juzgado kan Israel asin naghahagad sinda ki Yahweh ki sarong Hade.  Yaon ngonian si Hadeng David na nagsisimbolo kan pagpadaba ni Yahweh sa Israel, asin dai Niya pagpabaya sa saiyang banwaan lalo na sa mga panahon na kaipuhan ninda Siya.  Si Jesús an bag-ong David.

          Sa Ikaduwang Babasahon, may mga salang idea na naglalaganap sa joven na Simbahan kan Colosas.  May mga nagtutukdo na sa butnga kan Dios asin tawo igwa pa ki mga kapangyarihan na nag-i-influencia sa katawohan.  Kaya ngani man nagtutukdo si san Pablo na si Cristo único na Hade kan Universo asin dai nang iba.  Sakop niya an gabos, mag material man o mag espiritual man na aspecto kan realidad, an kabotan sana Niya an masusunod asin dai nang ibang kapangyarihan an makakadaog Saiya.

          Sa Evangelio Capitúlo 23 sosog ki Lucas mahihiling niato si Cristo Hade sa corona Niya gibo sa tunok, sa trono Niya gibo sa kahoy kan Cruz asin sa mga nasasakopan Niya na pig-aagiagihan sana Siya.  Ibang clase ang kahadean ni Cristo na minsan maiisip niato na si Cristo bilang Hade sarong paradoja.  An saiyang corona iyo an pagsakit na nagigin kamurawayan sa kaitaasan pagtapos kan kinaban.  An saiyang trono iyo an mga kadipisilan asin kabiyadean sa buhay.  An trono Niya na Cruz iyo an nagigin tulay hale sa daga pasiring sa langit.  An saiyang mga nasasakopan libre sa pagsunod o pagsayuma Saiya sa puso na maoongis o mamomoot Saiya.

          Sa gabos na paghorop-horop na ini, mahihiling niato mga tugang, mga kapwa Cristiano, kita gabos mga tagasunod ni Cristo, an boot na kahadean ni Cristo bakong sa pangluwas kun di sa panglaog kan tawo.  Sa saiyang puso.  Asin kabaliktaran kan mentalidad kan mundo na ini, an Saiyang kamurawayan iyo an servicio asin pagtao kan sadiri sa kapwa asin sa Dios.