Ika-walong Domingo kan Ordinaryong Panahon

          Sa Evangelio sosog ki san Mateo, nadangog niato sa paagi kan mga imágenes na mga magayonon asin madonongon na an Kagurangnan tunay na Kaggibo asin Kagtao.  Siya an Kaglalang asin padaba Niya an gabos na mga linalang, lalo an an mga tawo.  Siya sarong Ina na dai magpapabaya sa Saiyang mga aki na magutom.  Siya sarong Ama na dai magpapabaya sa Saiyang mga aki na daing gubing.  Más lalo pa ining mga imágenes nagin mga mayaman sa pagdagdag niato sa sainda kan iba pang mga imágenes na ipinapahiling sato kan Enot na Babasahon sosog ki Isaias.  An Diyos sarong ina na dai makakalingaw sa saiyang aki.  Minsan an ina makalingaw, an Dios nunca magpapabaya sa sato.  Awit kan Salmo, an Dios an satong masarig na gapo, paalawan asin baluarte.  Dagdag pa kan Ika-duwang Babasahon ginono sa Enot na Surat ni san Pablo sa mga taga-Corinto na an Dios hukom na justo asin manso, nasa justicia asin maheherakon al mismo tiempo.

          Gabos an mga ini tunay na mga imágenes na magayonon asin madonongon.  Pinapano an satong pagtubod nin paglaom sa Kagurangnan Dios minsan sa mga situaciones nin kadikloman asin katikapohan.  Pinapano kan mga ini an satong pagtubod ki pagkamoot sa Kaggibo asin Kagtao kan gabos maski sa mga panahon kan desesperación asin soledad.  Marhay sana na pag-preparar ini, ta sa miércoles man sana na madatong iyo na an poon kan Cuaresma.  Sa maabot na Miércoles de Ceniza, sa pag-cruz sato kan abo asin sa mga tataramon na “Ika abo asin sa abo mabalik” asin pa “Magsolsol asin magtubod sa Marhay na Bareta”, maglalaog an bilog na Cristiandad, an gabos na mga Católico Cristiano sa periodo ki pagpamibi, pag-ayuno asin paglimos.  Preparación ini gabos sa Semana Santa kun saen gigiromdomon asin isasabuhay giraray niato an pagsakit, pagkagadan, asin pagkabuhay-liwat kan Dios na nanitawo para sato.  Gabos ini aram niato símbolo asin pakisumaro ni Jesucristo mismo sa satong mga sadiring pagsakit asin pagkagadan.

          Tunay na consolación an mensaje na itinatao kan mga Babasahon ngonian na Ika-walong Domingo kan Ordinaryong Panahon.  Para sa mga nagsasakit, na sinda makatalingkas sa kasakitan o al menos mamatean na dai sinda nagsosolo asin an Dios yaon sa kataed ninda.  Para man sa sato gabos, sa ordinaryong pagbuhay sa ibabaw kan daga, ta aram niato sa paagi kan kasiguraduhan na gikan sa pagtubod sa Dios na may sentido an gabos asin may dirección an satong buhay.  An satong mga buhay nasa kamot kan Dios asin dai Niya kita pababayaan mapariwara ki haloy ta Siya mismo an maghahanap sato kun kita nawawara sa agihan na tama.

          Salamat Kagurangnan ta bako Mo lang kami ginibo, bako Mo lang kami tinaw-an nin buhay, kundi padagos Mo kaming hinuhurma pasiring sa Saimong magayon asin madonong na deseño asin padagos Mo kaming inaalalayan sa buhay na ini pasiring sa Buhay na daing kasagkoran na Ika mismo an nagpeprepara samo.  Amén.

***************************************************************

          Saro sa mga helang kan panahon niato ngonian iyo an paghandal.  An pag-worry.  Mag-aki man o mag may edad na, helang niato an pag-isip na may kulba sa kadakul na bagay.  Dakulon na sa sato na mga aki pa an may mga alta presión na, o aki pa may mga línea na sa pamayhon.  Ngonian lugod na dakulon na an mga bagay na hale sa ciencia asin tecnología na nakakapa-facil kan buhay, ngonian man kita nagpapas-an kan mga paghandal.  Kadaklan man kan mga causa asin mga laman kan satong mga iniisip iyo an mga material na bagay, kundi man pirmi cuarta an sa isip.  Kulang an sueldo?  Saen makua panghulog sa coche sa maabot na bulan?  An pambayad sa curriente, tubig asin sa harong?  Dahil sa kita may mga buhay na sadiri asin may mga responsabilidad man sa satong mga namomot-an sa buhay, iniisip niato na dapat man sana arog kaini, asin irresponsable an tawo na daing pakiaram asin dai nahahandal.  Mga aki sana an dai nahahandal kaya ngonian na mga adulto na kita dapat lang na pas-anon niato an pag-isip na may kulba bilang satong obligación, satong kahirasan sa buhay.  Pero arog ba talaga kaini dapat pirmi, oras-oras, aroaldaw?  O siguro minsan kaipuhan man kita magtonong asin ipasa-Dios gabos asin magin kitang ulit mga aki na maghihingoha pero aram niato na gabos naka-depender man sana sa Ama Kagurangnan.

          Himateon niato an mga Babasahon asin giromdomon niato an mga imágenes na ibinugtak kan Dios sa satong mga isip kanina sana sa paagi kan satong mga talinga.  Sabi ni Isaias an Dios ina na dai nunca makakalingaw sa sato saiyang mga aki.  Awit kan Salmo na an Dios masarig na gapo, satong paalawan, asin baluarte na makosog.  Dagdag ni san Pablo na an Dios marhay asin maheherakon na hukom.  Asin cada saro sa mga imágenes na ini rinorokyaw giraray sato kan Evangelio ni san Mateo: hanapon niato an kahadean kan Kagurangnan, asin ini gabos itatao man sana sato.  Kun an mga gamgam sa langit asin an mga lirio sa daga dai nahahandal kun sinda igwa ki kakanon o gugubingon, kita pa kaya na más pa an halaga sa mga Mata kan Dios, na nanitawo asin nagadan para sato, kita pa kaya mahandal?  Kun an mga doot asin an mga hayop dai nahahandal, an mga aki pa kaya kan Dios mahandal sa maabot?  Cuidado kita, ta dai man sinasabi kan Tataramon kan Dios na kita dapat magin mga irresponsable asin magin mga pabaya na sa satong buhay asin sa mga obligaciones sa satong mga namomot-an, kundi tinuturuan kita ngonian na an paghandal, minsan parang natural sa sato, sa katotoohan inútil.  Tunay lamang na kadonongan an magin activo asin magin responsable sa paghingoha aroaldaw pero pag-rendir cuenta, pag-naggibo na niato an gabos na satong magigibo, sa abot kan satong mga kakayahan, gabos nasa Kamot na kan Kagurangnan.  An control yaon na sa Saiya.

          Kagurangnan, maglaog ka sa samong isip asin puso ngonian asin pakusuga kami na magin mga responsable sa samong mga obligaciones pero padonongon mo kami sa kaseguraduhan na pagkatapos kan samong paghingoha yaon man sa Saimo giraray an Ultima Palabra.  Tabangi kaming magpaubaya sa Saimo.  Amén.