31st Sunday in Ordinary Time Year C

          Ngonian na Domingo, ika-treinta y uno kan Tiempo Ordinario, tunay na makakasabi kita kaiba an Salmista kan Salmo 145: Sagkod pa man sakuyang pag-oomawon an Saimong ngaran, O Dios na sakuyang Hade.  Kay nano satuyang pag-oomawon an Ngaran kan Kagurangnan?  Ta sambit pa kan Salmista: An Kagurangnan maugayon asin maheherakon, maluya sa pag-anggot, mayaman sa pagkamoot.  An Kagurangnan marahayon para sa gabos, maheherakon para sa gabos na linalang.

          Magbalik kita sa satuyang buhay, sa nakaaging mga taon, mga bulan asin mga aldaw kan satong existencia digdi sa ibabaw kan daga.  Bakong masasabi niato na dakul man an nagibohan niatong karahayan, pero sa katotoohan masasabi man niato na dakul man an nagibohan niatong karatan, minsan ngani puedeng niatong sabihon más pa an bilang kan mga maraot niatong mga nagibo que sa marahay.  Sa honestad kan satuyang puso ngonian asin sa paghiling kan satuyang mga sadiri sa aclarado na mga mata, siisay sa satuya ngonian digdi, minsan sa isip na sana, makakaatubang sa juicio kan Kagurangnan asin makasabi, uya ako Kagurangnan puede na akong magbalik sa sakuyang harong, an harong na preparado mo para sako sa langit?  Iyo ini an katotoohan: na ako, ikaw, kita mga parakasala, kita man nawawara.  Pero uya pa an más dakula na katotoohan: An Kagurangnan maugayon asin maheherakon, maluya sa pag-anggot, mayaman sa pagkamoot.

          Si Zakeo, an protagonista kan Evangelio sosog ki Lucas 19, sarong mayaman na poon kan parasingil nin buhis, puedeng sabihon na siya parakasala, mientras na an saiyang pagiging mayaman bako man nanggad indicación kan saiyang pagigin makasalan kun di an saiyang pagiging parasingil nin buhis, sarong kasalan para sa sociedad kan saiyang panahon.  Siya, sarong parakasala, nagmawot mahiling an Kagurangnan asin minsan hababa siya asin kadakul kan mga tawo na gusto man mahiling si Jesús na naglalabay nagdalagan siya sa enotan kan mga tawo dangan nagsakat siya sa sarong kahoy na sikomoro tanganing mahiling niya si Jesus.  Nagmawot siya, sa pagdalagan asin pagsakat niya.  Tulos man siya tinawag nin Kagurangnan asin duminagos Ini sa saiyang harong asin nagdara Ini kan Saiyang ugay, herak asin pagkamoot, saiya na sarong parakasala.  Kaya baga arog nalang kaidto an paggurumod-gumod kan ibang mga tawo.  Ki Zakeo asin sato sinasabi ni Jesús ngonian man sana: (A)n Aki nin Tawo nagdigdi sa paghanap asin sa pagligtas kan nawawara.

          Ngonian mga tugang na mga Cristiano, mga discípulos kita ni Cristo, enot sa gabos pinaka-importante sa proceso kan pagbakle an pagkilala kan tunay niatong situación.  An tawo na an pag-isip mayo siyang helang dai nanggad minarani sa médico, siring na an tawo na dai pa nagsosolsol dai nanggad maluhod sa pagkumpisal sa Dios.  An gracia kan pagbakle saro man na gracia na hinahagad sa Kagurangnan kaya ngani namimibi kita antes pa magpoon an Liturgia kan Tataramon sa Santa Misa: Kyrie, eleison.  Christe, eleison.  Kyrie, eleison.  Kagurangnan, kaheraki kami.  Cristo, kaheraki kami.  Kagurangnan, kaheraki kami.  Pangaduwa, una vez na nahiling na niato ki claro an satong tunay na situación, importante na may gibohon kita manongod sa situación na ini, asin ini man gracia kan Mahal na Dios.  Pirang veces niato nahihiling an satong problema pero para bagang mayo kitang magibohan manungod sa problemang iyan?  Pirang veces niato nadangog an mga historia kan mga tawong nalulong sa vicio asin aram na ninda na yaon sinda nalulunod na pero para bagang mayo sindang maginibohan?  Bako lang kita minsan nahuhulog sa kasalan, kun di kita man a veces nagiging esclavos kan vicio.  Nakagapos kita asin dai kita makatindog giraray.  Nakahigot an satong mga tiil asin mga pakpak asin lain kita makalupad pasiring sa Kaitaasan.  Siring na si Zakeo nagdalagan asin nagsakat kita man magdalagan harayo sa kasalan asin magsakat hale sa ati kan kasalan pasiring sa nagtatao ki kapatawaran.  Sabi sa Kadonongan 11: Luway-luway na saimong tinatanos an mga nagkakasala, saimong pinagigiromdom asin pinatatanidan kan mga bagay na saindang pinagkasalaan, tanganing maglikay sinda sa karatan asin maglaom saimo, Kagurangnan.  Kaya sa gracia asin sa satuya man na decisión kaipuhan niato makatalingkas asin gibohon an gabos na esfuerzo.  Una vez yaon na an pagpatawad, na bakong sinasayuma kan Kagurangnan sa kiisay man na naghahagad ki kapatawaran sa udok sa boot kaya baga gabos na kasalan napapatawad asin mayong kasalan na dai napapara kan herak asin pagkamoot kan Dios, kaipuhan man, asin pangtolo, kaipuhan an satuyang decisión na i-reformar an satuyang buhay poon ngonian sagkod pa man, na daing takot na mahulog giraray, na daing takot magpoon giraray aroaldaw kun nanggad nahulog giraray, na daing takot ta nunca kita nagsosolo.  Sa pagtalikod ni Zakeo sa maraot na gawe, sabi niya: Kagurangnan, itatao k osa mga dukha an kabanga kan mga rogaring ko, asin kun may nadaya ako, duwang doble an ibabayad ko saiya.  Ako, ikaw, kita, ngonian na Domingo, kita na nahihiling na niato an satuyang tunay na estado, kita na naghahagad kan kapatawaran, ano an satong decisión asin resolución?  Dai na ako magbubuwa asin pirmi ko na sasabihon an totoo.  Más pa dyan más magigin maingat na ako sa pagtaram ko sa iba, kun ini makakatabang asin makakapaharani sainda sa kapwa asin sa Dios.  Dai na ako mahabas asin pirmi ko na itatao sa cada isad an saiya.  Más pa dyan más magigin maugay ako sa sakuyang rogaring asin magtatao sa mga nangangaipo hasta sa may matada na puedeng ipanao.  Ejemplo lang ini kan mga bagay na puede niato maggibo asin más pa sa mga iyan an kaya niato, sa gracia kan Mahal na Dios na naglalaog sa satuyang mga puso ngonian siring sa paglaog Niya sa satuyang hawak atchan sa Banal na Comunión.

          Tunay na an gabos na ini bakong madali asin puede niatong sabihon saro sa mga pinaka-difícil na mga gawe.  Kaya ngani puede niato ngonian intiendihon sa paagi na ini an sabi ni san Pablo sa 2 Tesalonica 1: Ini an dahelan kun tadaw ta danay mi kamong ipinapamibi, tanganing gibohon nin Dios na magin maninigo kamo sa saiyang pag-apod.  Papangyarihon lugod nin Dios an gabos nindong marahay na mawot sa paagi kan saiyang kapangyarihan, asin mahaman an mg trabaho na ginigibo nindo huli sa pagtubod.  Sa siring na paagi, an gngaran kan satong Kagurangnan na Jesús papamurawayon saindo, asin kamo sa saiya, huli sa biyaya nin satuyang Dios asin ni Jesucristo na satong Kagurangnan.  Amen.