16mo domingo del Tiempo Ordinario

          Sa primerong paghimate kan binasa pa sana na Evangelio, ginono sa sinurat ni san Lucas capítulo 10, puede niato ini interpretaron sa paaging ini.  Más marhay an pinili ni María, na siya nakatukaw sa may bitis ni Jesús Kagurangnan, asin nagmamate asin naghohorop-horop sa gabos na mga tataramon kan Tataramon kan Dios.  Asin menos importante an pag-servir ni Martha, na iyo an nagin encargado kan pagpreparar kan tinapay asin arak na magigin pagkakan asin pag-inom kan mga visita siring kan sugo kan hospitalidad.  Siring man kaini an pag-interpretar kan mga dakulon na mga Cristiano Católico poon kaidtong panahon sagkod ngonian.  Boot kaya sabihon kaini na an buhay servicio menos importante que sa buhay kan pagpangadyie, siring na babayaan na niato an satong familia, trabajo asin comunidad para sa pagpangadyie sa simbahan asin capilla o sa PEA?  Boot kaya sabihon kaini na an mga padi, mga madre, asin mga laico na yaon sa mga monasterio contemplativo, nabubuhay sa pagpangadyie para sa saindang mga sadiri asin man para sa satuya gabos, más paladan que sa satuya gabos na yaon sa mundo, sa mga pamilyado, sa mga nagtatrabajo sa oma asin sa lawod, sa mga oficina, mga negocios asin sa tráfico?  Boot kaya sabihon kaini na an Liturgia kan Tataramon más importante que sa Liturgia kan Eucaristia, na an pagdangog sa mensaje kan Mensajero más importante que sa pagpreparar kan Tinapay nin Buhay na iyo man sana an Mensajero?  Nahihiling niato ngonian na an interpretación na ini, minsan legítima, bagan may kulang asin puede pa más magin claro asin perfecto.  Kaya hale sa texto kan Evangelio, magduman kita sa contexto kan Lucas 10 para más ma-apreciar niato, sa gracia kan Espíritu Santo, kun anano an más hararom asin más tumpok na interpretación kaini para sa satuya gabos.

          Poon pa kan capítulo 9 siring sa capítulo 10 yaon na si Jesús sa ika-duwang parte kan Saiyang misión: an paggibo Niya kan misión na hale sa Dios Ama, an ibalangibog an Marhay na Bareta sa bilog na rona kan Israel, sa mga Judío man o mga pagano, sa gabos, pasiring sa pinaka-poderoso na pagbalingibog Niya sa Cruz, kapanoan kan misión.  Pasiring na Siya sa Jerusalén asin nag-ontok Siya sa kadikit na panahon sa harong kan saiyang mga namomot-an na mga amigo asin amiga na sinda Lázaro, Martha asin María.  Puede niato imaginaron na paragal asin gurutom na si Jesús asin an Saiyang mga pag-iriba, asin visto que yaon na sinda harani sa Betania kun saen an harong kan saiyang mga amigo, naogma si Jesús na makakakakan Siya kan luto ninda al mismo tiempo makaka-visitar Siya sainda.  Nagkaorogma man an magkamanghod na sinda Martha asin María asin hidaling nagpreparar kan pagkakan si Martha mantang si María hidali man na tuminukaw sa may bitisan kan Kagurangnan na daing horas na sinasayang, Siya nagbabalingobog giraray manungod sa Kahadean kan Kagurangnan asin gabos ini iniinom ni María siring na napapaha sa desierto.  Puede ta gihapon imaginaron na si Martha nakangisi pa asin garo pakaraw na gusto ipasita ki Jesús an tugang niyang si María na dai nagtatabang sa pagpreparar kan tinapay asin arak, asin nakatukaw sana.  Uya an mensaje ni Jesús: dai Niya pinatindog si María, ni pinatukaw si Martha, kun di sinabi Niya na importante an pag-preparar kan la mesa pero más importante an pagdangog sa Marhay na Bareta.

          Dagdagan pa niato an paghorop-horop sa contexto kan texto na satuyang nadangog ginono sa Evangelio ni san Lucas capítulo 10 kan saro pa na si san Lucas man an may kagsurat na puedeng más makatao pa ki pag-claro asin pagpahararom sa satuyang magigin personal na mga interpretación.  Sa capítulo 6, versículos 1 hasta 6, sa mga Gibo kan mga Apóstoles, madadangog man niato an historia kun saen an 12 Apóstoles nahihiling na napapabayaan an diaconía, an pag-servir sa la mesa ta sinda ocupados sa pagbalangibog kan Marhay na Bareta, nagpangadyie sa Espirítu Santo asin naghagad sinda ki katabang sa saindang misión.  Nagpadara an Espíritu ki pitong mga diacono, an enot na mga diacono, para an mga Apóstoles maka-concentrar sa Tataramon asin sa Misa, asin an mga diacono an maka-concentrar man sa mga marahay na gibo sa espíritu asin hawak.  Orog na importante an Santa Misa pero dai man dapat pabayaan an la mesa.

          Kun siring mga tugang, hale sa texto asin contexto siring man hale sa texto na puede mag-ayudar sa paghorop-horop kan satong personal na interpretación, bahala na po an lambang saro na makakua sa mga tataramon na ini kan saiyang tataramon para sa buhay espiritual.  Ipe-presentar ko sana digdi an nagkapirang mga paghorop-horop na puedeng más makatabang pa sa satuyang mga personal na pamibi ngonian na Domingo, ika-kag-anom kan Ordinaryon Panahon.

          Parejo importante para sa sarong Cristiano Católico an pagpamibi, an oración, asin an pag-servir, an servicio, an diaconía.  Bako cuestión ki arin sa duwa an más importante, kun di duwa ining pakpak kan satong hawak asin espíritu na boot makaabot sa langit, sa Kahadean kan Mahal na Dios.  Kun pamibi sana asin daing servicio, asin kun servicio sana asin daing pamibi, bako niatong maabot an satuyang padumanan.  An orog na marahay iyo na kita magin mga tunay na discípulos ni Jesús na pirmi yaon sa may bitis Niya sa pagkakan asin pag-inom hale sa mga kamot Niya mismo.  Iyo ini an orog na ka preciosa na gracia na gikan sa pagpamibi – pagpamibi sa satuyang mga harong, sa simbahan o capilla o sa PEA man, o antes mag-trabajo, antes maglaba, antes magluto, antes mag-negocio.  Pero an pamibi orog na magigin más perfecto kun magbubunga ini kan pag-servir, kan pag-servicio sa Dios asin sa kapwa sa manlaen-laen na paagi, depende sa estación kan satong buhay: ika may agom o dai, may negocio o nag-o-oficina, yaon sa buhay contemplativo o nasa mundo.  Orog na marahay an pamibi na nagbubunga kan servicio, asin orog na marahay an servicio na más nagpapalipotok kan satuyang pamibi.  Ta bakong más banal kita kun an satuyang pagpamibi sa Simbahan nahihiling nanggayo sa satuyang buhay sa luwas kaini?  Bakong más banal kita kun hale sa gracia asin kusog na gikan sa pamibi más nagigin marhay kita na mga padre asin madre di familia, mga nag-o-oficina o nag-ne-negocio?  Bakong más banal kita na cada vez kita magsimba kita más nagrarani sa Dios hasta makaabot kita sa Saiyang mga bitis, asin después kan Santa Misa más magin atento kita sa mga pangangaipo kan satuyang mga tugang?  Amen.