Year B Ordinary Time 26th Sunday

Year B Ordinary Time 26^th Sunday

MGA BILANG 11:25-29

25Dangan naghilig sa panganoron an KAGURANGNAN asin kinaolay si Moises.  Kinua nin KAGURANGNAN an ibang espiritu na itinao niya ki Moises asin itinao sa setentang mga lider.  Kan maghilig sainda an espiritu, nagpoon sindang magpropesiya siring sa mga propeta, alagad dai iyan nahaloy.

26Kan oras na iyan nawalat sa kampo si Eldad saka si Medad, duwang lalaki na kairiba man sa setenta.  Alagad minsan dai sinda nagduman sa Tabernakulo naghilig man sainda an espiritu asin nagpropesiya sinda duman sa kampo.  27Nagdalagan an sarong lalaki tanganing ipaisi ki Moises an ginigibo ni Eldad saka ni Medad.

28Huli kaini, nagsabi si Josue na aki nin Nun, asin katabang ni Moises magpoon kan siya hoben pa, “Kagurangnan kong Moises, paontokon mo sinda!”

29Nagsimbag si Moises, “Nagmamakulog ka daw sako? Tawan logod nin KAGURANGNAN kan saiyang espiritu an gabos na tawo asin gibohon na propeta sin dabos!”

SALMO 18:8,10,12-14

8Matanos gabos an mga togon nin KAGURANGNAN, sa puso nagtatao nin kaogmahan.  An mga pagboot kan KAGURANGNAN dalisay, minatao nin liwanag sa isip.

10 Orog pang inamawot ki sa bulawang, ki sa purong bulawan; orog na mahamis ki sa dugos, asin sa mga tago nin anira.

12Alagad siisay an nakakasabot kan sadiring mga kasalan?  Linigi ako sa mga hilom na karatan!

13Ligtasan man ako sa mga tuyong kasalan; hare pagtugot na maghade sako an mga iyan.  Dangan ako magigin dalisay asin ligtas sa karatan nin kasalan.

14An mga itinaram nin sakong ngoso asin an kaisipan kan sakong puso maako mo logod, O KAGURANGNAN, sakuyang pailihan, asin sakuyang paratubos!

SANTIAGO 5:1-6

1Hinanyoga nindo ako, mga mayaman!  Magtangis saka maghaya kamo sa mga kasakitan na madatong saindo!  2Lapa na an saindong mga kayamanan, nginotngot na an saindong mga gubing.  3Tinakla an saindong bulawan saka palta; an taklang iyan iyo an magiging saksi tumang saindo, saka garo kalayong matunaw kan saindong hawak.  Nagparapayaman kamo sa mga huring aldaw na ini.  4Dai nindo binayadan an mga nagtatrabaho sa saindong mga oma.  Dangoga nindo an saindang mga reklamo!  An mga kinurahaw ninda nadangod nin Dios, an Kagurangnan nin mga hukbo.  5An saindong buhay digdi sa daga gabos san sa luho danga kaogmahan.  Nagpataba kamo para sa aldaw kan pagbuno.  6Kinondenar nindo saka ginadan an mga tawong mayong sala, asin dai sinda minatumang saindo.

MARKOS 9:38-43,45,47-48

38Nagsabi saiya si Juan, “Maestro, nakahiling kami nin tawong nagpapaluwas nin mga demonyo sa ngaran mo.  Sinaway mi siya huli ta mayo siya sa pag-iriba ta.”

39”Dai nindo siya pagsawayon,” an sabi nin Jesus, “huli ta dai nin siisay man na minagibo nin milagro sa ngaran ko na magpapakaraot sako.  40Huli ta an siisay man na bakong tumang sato, kampi sato.  41Sa katotoohan sinasabihan ko kamo, an siisay man na magpainom saindo nin tubig huli ta kamo sadiri ko, dai mawawaraan nin balos.”

42”An siisay man na magin dahelan kan pagkasala kan saro sa mga saradit na ini na minatubod sako, mas marahay pang tagulnodan an ligo niya nin gapon gilingan dangan iapon sa dagat.  43Kun an saro mong kamot magin dahelan kan pagkakasala mo, putola iyan!  Mas marahay pa saimong lumaog sa lanit na saro sana an kamot ki kan may duwang kamot alagad ihulog sa impyerno, sa kalayo na mayong kataposan.

45Kun an saro mong bitis magin dahelan kan pagkakasala mo, putola iyan!  Mas marahay pa saimong lumaog ka sa langit na saro sana an bitis, ki kan may duwang bitis alagad ihulog sa impyerno.  47Kun an saro mong mata magin dahelan kan pagkakasala mo, hulwata iyan!  Mas marahay pang lumaog ka sa Kahadean nin Dios na may saro sanang mata, ki kan may duwang mata alagad ihulog sa impyerno.  48Duman ‘an mga ulod sa saindang hawak dai nanggad nagagadan asin an kalayo dai nanggad nasisigbo.’

REFLECCIONES PERSONALES:

            An saimong gibo an efecto, an untali, bako sana saimo kun di man sa iba.

Nadangog ta sa versiculo 42 kan Evangelio ni Marcos capitulo 9 na: An siisay man na magin dahelan kan pagkasala kan saro sa mga saradit na ini na minatubod sako, mas marahay pang tagulnodan an ligo niya nin gapon gilingan dangan iapon sa dagat.  Sabi kan mga banal na paratukdo na sinda San Beda asin San Gregorio: ini daa na saradit na ini na minatubod ki Jesu Cristo, iyo an mga tugang ta sa pagtubod na hababaw pa sana an ugat kan pagtubod, na sa diit sana na kabiyadean sa buhay o paghuring-huring kan ibang tawo, nawawara na an pagtubod.

            Tunay na ibaiba an nivel kan satuyang buhay espiritual, an iba halangkawon na sa atubangan kan Kagurangnan, an iba hababa pa sana.  An iba mga banal na, an iba man nagpopoon pa sana sa oroaldaw na paghingoha na magin banal.

            Kita na yaon ngonyan digdi nagsasamba sa Kagurangnan, nagdadangog sa Saiyang mga Tataramon nin buhay, asin nagpapabasog kan Saiyang Hawak sa Eucaristia, kita naghihiringoha na magin mga banal, magin mga marhay sa satuyang buhay.  Sa satuyang paghingoha asin ejemplo dakul an satuyang magigibo sa paghikayat sa satuyang mga tugang na arogon kita asin magsunod sa dalan kan katanosan.  Pero al mismo tiempo, dakulaon man an posibilidad na kita mismo an makatao escandalo sa satuyang mga tugang.  Kun kita na mga Cristiano Catolico mga bakong marhay na influencia sa iba, madidismaya an mga sadit niatong mga tugang asin en vez na magsunod sa satuya sa pagsunod sa Kagurangnan magluluya an saindang pagtubod asin mas lalo sindang maghaharayo.

            Entonces, dakulaon an halaga kan satuyang mga gibo sa pangoroaldaw na buhay, ta kaya ta, sa satuyang pagpahiling kan satong buhay, magtao kan Buhay na daing kasagkoran sa iba, o kabaliktaran kaini, magtao ki Kamatayan.  Sa satuyang paghingoha na maging banal aroaldaw puedeng sabihon na nakasalalay an kaligtasan kan mga nakapalibot satuya.  Kaya lugod cuidado kita sa mga gigibohon ta ta an untali kaiyan bako sana sa satuya kun di man sa iba pa, lalong lalo na sa mga kaugos ta sa buhay.

           

            Nadangog ta man sa mga versiculo 43, 45 asin 47 kan Evangelio ni Marcos giraray sa capitulo 9 na: Kun an saro mong kamot magin dahelan kan pagkakasala mo, putola iyan!  Mas marahay pa saimong lumaog sa lanit na saro sana an kamot ki kan may duwang kamot alagad ihulog sa impyerno, sa kalayo na mayong kataposan.  Kun an saro mong bitis magin dahelan kan pagkakasala mo, putola iyan!  Mas marahay pa saimong lumaog ka sa langit na saro sana an bitis, ki kan may duwang bitis alagad ihulog sa impyerno.  Kun an saro mong mata magin dahelan kan pagkakasala mo, hulwata iyan!  Mas marahay pang lumaog ka sa Kahadean nin Dios na may saro sanang mata, ki kan may duwang mata alagad ihulog sa impyerno.  Manongod man sa mga banal na paratukdo na si San Crisostomo asin giraray ki San Beda na ining saro mong kamot o ining saro mong bitis o ining sarong mong mata iyo an satuyang mga amigo asin kaugos sa buhay digdi sa ibabaw nin daga.  Tunay man nanggad na sinda an nagiging satuyang mga katabang sa buhay na ini, kaya sinda nagigin arog sa mga kamot, bitis o mata niato.

            Pues, tinotokdoan kita na dahel pinakaimportante sa satuyang buhay an satuyang pagtubod, asin pinakaimportante na mission ta digdi sa kinaban an paghingoha aroaldaw na magin banal para sa futuro makaiba niato sa langit an Dios na Banal, kaipuhan na haleon ta sa buhay ta gabos na mga influencia na bakong marhay, asin nakakaparayo sa satuya sa Kagurangnan, arog kan mga kaugos na maraot an influencia sa satuya.

            May mga amigo kita na sa karahayan kita dinadara.  Pasalamat kita sa Kagurangnan ta pinadara Niya sinda sato, siring sa mga angel de la guardia.  Sa tabang ninda kita napaparayo sa kasalan asin naiinspirar maggibo ki marhay asin maglikay sa sala.  An mga ini tunay na nagigin mga kamot, bitis asin mata niato.  An caso may mga amigo man kita na nahihiling ta sa satuyang observacion na bako kita nadadara sa karahayan kun di sa maraot lugod.  Nararaot an satuyang mga marhay na kaugalean, nararawrawan an satuyang pagtubod, asin nadadara kita sa mga marigsok na mga gibo.  Tinotokdoan kita ngonyan ni Jesu Cristo na kaipuhan na haleon ta sinda sa satuyang buhay.  Maski nano pa man sinda kaugos sa satuya, kaipuhan na desisyonan ta na mas importante sa satuya an Dios sa langit ke sa mga amigo sa daga.

            Siring man saro man ini na makusog na pagpagiromdom sa satuya na lugod kita man maging marhay asin tunay na amigo sa iba.  Sa pagpadara niato sa karahayan sa sainda, asin sa pagtabang sainda na likayan an kasalan.

            Lugod sa paglapigot niato maging banal sa aroaldaw niatong pamumuhay hare tang paglingawan asin pirmi niatong giromdomon na tunay na an satong mga gibo an efecto, an untali, bako sana satuya kun di man sa iba.

NATIONAL SEAFARERS’ DAY

            Ngonyan man na ika-26 na Domingo kan Ordinaryong Panahon, iyo man an National Seafarers’ Day.  En modo especial isabay niato sa satuyang pamibi sindang mga kamaranwa ta na nagsisirve sa manlaenlaen na varco asin mga crucera sa ibaibang parte kan kinaban.  Ligtas man lugod sinda sa kapahamakan, fisical man, emocional, asin espiritual.  Asin lugod an saindang mga nawalat na familia iyo an saindang maging kusog asin inspiracion sa danay na paglapigot maski na ngani dificil asin daghang veces mamundo an buhay sa dagat.