Kan ginibo kan Dios an mundo, ginibo niya an daga, an tubig, an liwanag, an mga puno, an mga hayop asin an gabos na yaon sa mundo para sa tawo, para ki Adan asin ki Eva. Sinda nag-eerok sa paraiso, harong na itinao ni Yahweh sa Saiyang mga orog na namomot-an. Sa dakulaon na tragedia kan pagkakasala, sinda pinalayas kan angel hale sa paraiso pasiring sa mundo, mundo na kinaipuhan nindang pagtangisan asin pagti-osan, consecuencia kan kasal-an. Paulit-ulit minaw-ot kan Kagurangnan na sinda bumalik sa paraiso, talingkas sa kasal-an, pero an tawo mas humihinarayo Saiya. Pinadara kan Ama an mga profeta, an mga banal, an mga juzgado para sinda paggiromdomon na an tawo ginibo para sa paraiso bako para sa mundo. Dahil sa kasalan an paraiso padagos na nakakandado asin an susi padagos na nawawara.
Sa kapinonan kan panahon, pinadara kan Ama an Saiyang Aki. Si Jesucristo Paraligtas iyo an nagpara kan enot na kasalan ni Adan asin ni Eva. Tinao Niya an Saiyang Buhay para kita gabos na mga nagadan sa kasalan mabuhay liwat sa gracia. An Saiyang pagpapako sa Cruz iyo an nagin kabayadan, an simbag sa consecuencia kan kasal-an kan tawo. An Cruz iyo ngonian an naging susi para an paraiso mabuksan asin an tawo makabalik hale sa mundo pasiring giraray sa paraiso.
Sa pagsakat sa langit ni Cristo Jesus, an Ama asin Siya nagpadara kan Espiritu Santo bilang guia asin kusog kan Simbahan. Ini tinogdas man sana ni Cristo Kagurangnan sa gapo na iyo si Pedro asin si Pablo asin an mga Apostoles. Sinda isinobol ni Jesus sa gracia kan Espiritu na ibalangibog an Marhay na Bareta: na kita talingkas na sa kasal-an asin bukas na an paraiso para sa gabos na maw-ot asin maghihingohang maglaog digdi. Itinao ni Cristo an susi nin paraiso, an llave nin kaligtasan ki Pedro, sa mga Apostoles, sa Simbahan para bako lamang an kadikit an makalaog kundi sa gracia kan Dios gabos na tawo makalaog sa buhay na daing kasagkoran.
An satong solemnidad ngonian na Domingo sarong pagpamangno sato, pagpagiromdom sato, pagsadol sato na bukas na an paraiso, salamat sa Cruz ni Cristo, asin yaon sa Simbahan ni Pedro asin ni Pablo an susi para kita makalaog diyan sa paagi na segurado asin daing duda. Magin man lugod maimbod kitang mga miembro kan Simbahan Catolica asin magtalubo sa laog kaini sa pagtubod, paglaom asin pagkamoot sa Dios asin sa kapwa. Binubuksan kan susi na ini an paraiso cada vez na kita magkumpisal kan satong kasalan sa Dios sa paagi kan Simbahan. Binubuksan kan susi na ini an buhay na daing kasagkoran cada vez na maimbod kita nag-ko-komunyon asin isinasalaman sa satong buhay an mga Tataramon ni Dios. Binubuksan kan susi na ini an dalan pabalik sa Ama cada vez nagigin maimbod kita sa mga Katogonan kan Dios asin kan Simbahan. Amen.
Walang komento:
Mag-post ng isang Komento