Year C Fourth Sunday of Easter Good Shepherd's Sunday

          Ngonian na ika-upat na Domingo kan Pasko kan Pagkabuhay-liwat ni Jesus satong Tagapagligtas, iyo man an inaapod na Good Shepherd’s Sunday ta sa nabasa niatong Evangelio sosog ki Juan, capitulo 10, sinasabi mismo ni Jesus na siya an Marhay na Pastor.  Ini an satuyang paghorop-horopan mga tugang, si Cristo Marhay na Pastor asin kita Saiyang Carnero, sosog man sa nadangog niato sa Salmo 100.  Pero bako lang kita sinasadol ni Jesus na magin mga marhay na carnero, kita man inaapod Niya na magin mga pastor.  Siring na Siya an Marhay na Pastor, kita man magin mga marhay na pastor sa laog kan satong familia, sa trabajo, asin kaiba an satong mga namomot-an asin mga pag-iriba sa buhay.

          Ano an contexto kan texto na nadangog niato?  Ano an kaimportansyahan kan mga carnero asin kan mga pastor?  Kaitong panahon sagkod ngonian, sa Judea siring man sa mga lugar na parejo an clima, an mga carnero importantehunon sa pagbuhay kan tawo.  An carne kan carnero nagtatao ki sustento sa buhay bilang kakanon. An barahibo kaini iyo an pigkakaros asin ginigibo na lana, na ginigibo man tela sa pagpreparar kan mga gubing.  Dahil sa importancia kan mga carnero an mga pastor na nag-aataman sainda halangkaw man an importancia.  Pero ini sarong mapagal na trabajo asin kinahahaboan.  Sinda babád sa saldang asin sa urán, sa hagkot asin sa init, sa mga lobo asin mga nagsasamantala sa mga carnero.  Nagpapa-anak sa mga carnero, nagpapahirahay sa saindang helang, naghahanap sa mga nawawara.  Veinte cuatro horas yaon siya.  Itinatao kan marhay na pastor an saiyang buhay para sa saiyang mga carnero.  Pati parong niya parejo na kan mga carnero.  Kaya man an mga ini kilala na siya sa voces asin parong pa sana niya.

          Nadangog niato sa Salmo 100 na inaapod kita ngonian ni Jesus bilang Saiyang mga carnero.  Siya an satong Marhay na Pastor.  Kaya ngani baga sa pintura asin escultura kan Arte Cristiana dakulon an mahihiling niato na mga obra maestra na nagpapahiling ki Jesus joven asin may carnero sa Saiyang abaga.  Pirmi yaon sa kataed niato aldaw banggi, urán saldang, hagkot init, peligro o tranquilidad.  Siya an nag-aasikaso sa mga may helang, sa mga nawawara, sa mga nasa peligro.  Hasta Saiyang buhay itinatao niya sa sato.  Iyo baga an boot sabihon man kan Cruz.  Si Jesus, an Marhay na Pastor, dai nagdulag, kun di itinao an saiyang buhay.  An Pastor nagin man carnero, si Jesus nagin man sacrificio, siring sa sarong carnero na sinakripisyo para sa kaayadan kan gabos Niyang namomot-an.  Kaya baga si Jesus ipinako sa Cruz.  Sa ikatolong aldaw Siya nabuhay liwat asin inagaw kita sa kagadanan asin karat-an.

          Sa satuyang mga Cristiano Catolico, taga-sunod ni Cristo Jesus, magayonon ini na ejemplo.  Siring na si Jesus Marhay na Pastor, ako daw marhay na pastor, kita daw mga marhay na pastor sosog sa Saiyang ejemplo?

Ako daw sa sakuyang harong bilang magurang, ako daw sarong marhay na pastor sa sakuyang mga nasasakupan?  Ginigibo ko daw an gabos para sa tunay na karahayan kan sakong mga namomot-an bako lang sa materiál kun di lalong lalo na sa espiritual na aspecto?  Ako daw tinatawan ko sinda ki sakong horas asin panahon para mas makilala ko sinda asin sinda mas makilala ako para sa mas marhay na confianza asin dialogo na aram ko mga ingrediente na importantehunon sa marhay na urupudan?

Ako daw na magboboto ngonian na elección naghihiling sa sarong candidato na puede niatong kilalanon bilang sarong marhay na pastor?  Sarong pastor na maglilingkod, dai magpapalingkod.  Sarong pastor na itatao an horas asin talento para sa karahayan kan gabos, dai maghahab-as kan cuarta kan caván kan katawohan asin magsasamantala asin magpapa-pobre sa mga pobre na ngani na mga kapwa niya tawo.  Sarong pastor na matao kan saiyang buhay para sa kadaklan, sarong pastor na maghihingoha na magrahay an buhay, asin inaasahan siya na magigin instrumento sa progreso, bakong sa regreso kan kagabsan.

Ako daw, kun saen man ako na estación sa buhay, sa familia, sa trabajo, o sa mga pag-iriba ko, ako daw saro na marhay na pastor na nagdadara sainda sa karahayan, o nakisabay man ako sa karatan, sa pag-ulok maski aram ko na sala na, ta ginigibo man kan gabos, asin iyo na an naka-ugalean?  O ako kaya an nagpapadarâ sa karatan, ta sabi daw if you cannot beat them daa, join them; nagpapabakal asin isinusuko ko daw na arog lang kaiyan an sakong mga principio asin convicciones sa buhay; na pagmapagal na asin an sadiri ko na an nakataya, minaatras na ako sa laban?  Ako daw tatao manindugan, sosog sa sakong identidad bilang Cristiano Catolico, na an tama tama, asin an sala sala, maski ano pa an ginigibo kan kadaklan, maski an pa an sinasabi kan kagabsan?

Kagurangnan, mapagal sa sakuya magin marhay na carnero Mo, lalo na mapagal para sakuya an magin marhay na pastor Mo, siring asin sosog sa ejemplo Mo.  Tawi ako ki gracia asin kusog na maghinguha na magin marhay na discípulo Mo bilang carnero asin bilang pastor.  Maghihingoha ako Kagurangnan pero sa sakuyang kaluyahan soroga ako, an sakong mga pagkukulang panoan Mo, asin sa sakong pagkatumba irahay Mo ako.  Amen.