Diocesan Earth Day 22 April 2012

            An Santo Papa Blessed John Paul II nagsurat kan primero de enero, 1990, entitulado Peace with God the Creator, Peace with all of Creation.  Sa kaniya paghorop-horop pinapagirumdum kita gabos na intiro hale sa Dios.  Ginibo kan Dios an gabos na marhay, ginibo kitang kawohan na marahayon.  Nangyari pero na nagkasala an mga unang tawo asin nag rebelde sinda sa Dios kaya sinda pinalayas sa paraiso.  An pag rebelde ninda dakulon an naging consequencia, hanggang ngonian yaon sa gabos an helang, kadalian sa pagkahulog sa tentación asin pati an kinab-an nadamay.  Kun kaidto marhay an bagay-bagay asin an gabos-gabos pagkatapos kan kasal-an naging mailap an mga kahayupan, naging mapagal an pagtanom asin pag-ani, naging gahaman asin hagas an tawo.

            Nahihiling kan gabos kun pan-o sa panahon ta ngonyan, dakulon na taon na an nakalipas, ining kasal-an dakulon an binunga na negativo.  Mala ngani an pag-rebelde kan tawo sa Dios iyo man an satuyang pag-rebelde sa kaniya diseño sa kalikasan.  Kun kaidto sa paraiso marhay an gabos, ngonyan sa satuyang mga bongto asin ciudades mahihiling ta an pagkaraot asin pagkawasak kan ginibo kan mahal na Dios.  Sa mga bag-ong tecnologia ngonyan na panahon mas lalo nagngangana an pagkaraot kan satuyang kinab-an.  Mas na re-realizar ta ngonyan na di kita puede magpadagos sa arog kaining sistema.  Kaipuhan ta bag-ohon an satong pagkinabang sa kinab-an o maabot an panahon, bako mahaloy, dai na kita ki maiistaran digdi sa daga.

            Kaya ngonyan na Earth Day, sa bilog na diocesis kan Sorsogon, satuyang paghorop-horopan an satuyang responsabilidad sa kapiligiran.  Hilingon ta kun pan-o kita namumuhay sa pang-uru-adlaw.  An satuyang estilo de vida nag-re-respeto daw sa satuyang kinab-an?  Nagtatapok kita ki basura sa marhay na paagi?  Bako kitang nagsasayang kan mga bagay-bagay asin curriente?  Tinutukdoan ta daw an satuyang mga kabataan sa maray na pag-respeto kan kinab-an asin kita daw maray na paarog sainda?  Nagtatanom daw kita ki puno para sa mga maabot pa na generación?

            Puede kita maghapot kun may magigibo man kaya an satuyang paghingoha kun an kadaklanan bako man nagrerespeto sa kalikasan.  An simbag ta, iyo, dakula.  Ta kun cada saro satuya ngunyan digdi ma-realizar na tunay na “ako ang simula”, an saro magiging sarong docena, magiging sarong barangay, magiging sarong bongto, ciudad, provincial, region, bansa asin an mundo.  An dakula napoon sa sadit.  Kun pun-an ta ngonyan digdi sa satuya ining mga simpleng programa para sa “sagip kalikasan” dai mahaloy kita man gihapon an matamasa kan ventaje kan malinig na kapaligiran.  Mas maray an satuyang mga kaagahan, mas maaliwalas sa kaisipan, mas healthy sa satuya asin sa satuyang kaakian.

            Hilingon ta an experiencia ngungyan kan satuyang mga kababayan sa Tagbilaran, Bohol lalong lalo na sa Puerto Princesa, Palawan.  Sira naghinguha magka-ciudad asin isla na malinig asin magaya-gaya.  Nagpuun man sinda sa sadit na mga proyecto pero ngunyan nagbunga na an mga paghinguha.  Ventaje financial an malinig na kapaligiran ta mas nadakul an turista, mas nakusog an turismo.  Turismo ay trabajo.  Puede man pagkakitaan an pag-respeto sa kalikasan.