15th Sunday in Ordinary Time

An parabola kan parasabwag pwedeng ma-i-aplicar sa satong mision apostolica.  Minsan kita nagsasabwag ki Marhay na Bareta asin daing resulta.  Minsan igwa man maski diit.  Pero minsan dakul talaga an nagigin efecto kan satong mga tataramon, lalong lalo na kan satong buhay asin ejemplo.

A veces para bagan warang resulta an satong paghinguha.  Parejo kan historia kan sarong san Pierre Chanel, apostol asin martir.  Siya nagbalangibog kan Marhay na Bareta sa tataramon asin sa gibo sa sarong isla sa Asia Pacifico.  Bilog na buhay niya wara lamang nag-convertir.  Hanggang sa siya ginadan kan saro sa mga habitantes duman.  Pagkagadan niya saka lamang nagbunga an saiyang mga pagsabwag.  Mala baga ngonian an bilog na isla kan Futuna Catolico Cristiano na.  Minsan para wara lamang resulta an satong mga paghingoha sabwag sana ki sabwag ta dae ta aram na yaon na palan an efecto sa laog kan puso kan tawo.  An tataramon kan Dios siring sa uran, dae minabalik Saiya na daing efecto.

Ining parabola puede man ma-i-aplicar sa satong mga sadiri.  A veces an Tataramon para bagang daeng efecto sato.  Kun minsan may diit man.  Pero nangyayari na minsan sa mga panahon na dae niato inaasahan dakulon asin dakulaon na palan an efecto Kaini sato asin kita na palan nagbag-ong buhay na.

Kagurangnan, minsan bagan daeng bunga, taw-e kami ki paciencia asin perseverancia na magsabwag sana ki magsabwag!  Amen.

Solemnity of Sts. Peter and Paul, Apostles: A Reflection on the Key

Kan ginibo kan Dios an mundo, ginibo niya an daga, an tubig, an liwanag, an mga puno, an mga hayop asin an gabos na yaon sa mundo para sa tawo, para ki Adan asin ki Eva.  Sinda nag-eerok sa paraiso, harong na itinao ni Yahweh sa Saiyang mga orog na namomot-an.  Sa dakulaon na tragedia kan pagkakasala, sinda pinalayas kan angel hale sa paraiso pasiring sa mundo, mundo na kinaipuhan nindang pagtangisan asin pagti-osan, consecuencia kan kasal-an.  Paulit-ulit minaw-ot kan Kagurangnan na sinda bumalik sa paraiso, talingkas sa kasal-an, pero an tawo mas humihinarayo Saiya.  Pinadara kan Ama an mga profeta, an mga banal, an mga juzgado para sinda paggiromdomon na an tawo ginibo para sa paraiso bako para sa mundo.  Dahil sa kasalan an paraiso padagos na nakakandado asin an susi padagos na nawawara.

Sa kapinonan kan panahon, pinadara kan Ama an Saiyang Aki.  Si Jesucristo Paraligtas iyo an nagpara kan enot na kasalan ni Adan asin ni Eva.  Tinao Niya an Saiyang Buhay para kita gabos na mga nagadan sa kasalan mabuhay liwat sa gracia.  An Saiyang pagpapako sa Cruz iyo an nagin kabayadan, an simbag sa consecuencia kan kasal-an kan tawo.  An Cruz iyo ngonian an naging susi para an paraiso mabuksan asin an tawo makabalik hale sa mundo pasiring giraray sa paraiso.

Sa pagsakat sa langit ni Cristo Jesus, an Ama asin Siya nagpadara kan Espiritu Santo bilang guia asin kusog kan Simbahan.  Ini tinogdas man sana ni Cristo Kagurangnan sa gapo na iyo si Pedro asin si Pablo asin an mga Apostoles.  Sinda isinobol ni Jesus sa gracia kan Espiritu na ibalangibog an Marhay na Bareta: na kita talingkas na sa kasal-an asin bukas na an paraiso para sa gabos na maw-ot asin maghihingohang maglaog digdi.  Itinao ni Cristo an susi nin paraiso, an llave nin kaligtasan ki Pedro, sa mga Apostoles, sa Simbahan para bako lamang an kadikit an makalaog kundi sa gracia kan Dios gabos na tawo makalaog sa buhay na daing kasagkoran.

An satong solemnidad ngonian na Domingo sarong pagpamangno sato, pagpagiromdom sato, pagsadol sato na bukas na an paraiso, salamat sa Cruz ni Cristo, asin yaon sa Simbahan ni Pedro asin ni Pablo an susi para kita makalaog diyan sa paagi na segurado asin daing duda.  Magin man lugod maimbod kitang mga miembro kan Simbahan Catolica asin magtalubo sa laog kaini sa pagtubod, paglaom asin pagkamoot sa Dios asin sa kapwa.  Binubuksan kan susi na ini an paraiso cada vez na kita magkumpisal kan satong kasalan sa Dios sa paagi kan Simbahan.  Binubuksan kan susi na ini an buhay na daing kasagkoran cada vez na maimbod kita nag-ko-komunyon asin isinasalaman sa satong buhay an mga Tataramon ni Dios.  Binubuksan kan susi na ini an dalan pabalik sa Ama cada vez nagigin maimbod kita sa mga Katogonan kan Dios asin kan Simbahan.  Amen.

Corpus et Sanguis Christi (Inspiration from St Ignatius of Antioch)

Ngonian na Domingo sineselebrar kan Simbahan digdi sa Pilipinas an Solemnidad del Cuerpo y Sangre del Nuestro Senor Jesucristo, an Solemnidad kan Hawak asin Dugo ni Cristo.  An doctrina na ini haloy nang yaon sa mga katukdoan kan Simbahan ta ini hale mismo sa mga tataramon kan Kaguran Jesucristo, capitulo seis kan evangelio ni Juan.  Pero bilang kafiestahan kan bilog na Simbahan si papa Urbano cuarto kan 1264 an nag-instituir kaini asin poon kaidto sagkod ngonian yaon na ini sa bilog na Simbahan Catolica.  Digdi ngani sa Bicol, sa Sorsogon, tradicion iyo an procesion kan Santisimo Sacramento asin an pag-alay sa Kagurangnan kan mga frutas kan trabajo asin kan daga sa Simbahan asin an mga ini man ihinihiras kan cada parroquia kun saen an mga ini kaipuhan.

Para sa Domingo na ini sabay-sabay po niatong paghorophoropan an mga katukdoan kan sarong Padre de la Iglesia na si san Ignacio kan Antioquia manungod sa Eucaristia.  Ining santo asin martir na obispo nagadan sa Roma, kinakan kan mga leon, durante kan pag-perseguir sa Simbahan Catolica kan Imperador Romano na si Decio.

Katukdoan ni san Ignacio na an Tinapay asin Arak na kinakakan asin iniinom durante la Santa Mesa bako sanang siring sa hawak asin dugo, kun di tunay na Hawak asin Dugo ni Cristo Jesus, ikaduwang Persona kan Santisima Trinidad na nani-laman.  Siring na an trigo inaani, prinepreparar asin binabayo para an dakul magin sarong masa sana iyo man kita gabos na mga Cristiano Catolico, dakul pero sarong Simbahan sana.  Siring na an ubas inaani, prinepreparar asin tinutungtungan para makua an duga kaini asin an dakul nagigin saro sana, kitang mga Cristiano mga discipulos ni Cristo minsan manlaenlaen an hinalean asin an mga naging historia sa buhay, saro sanang Simbahan.  Siring na an mga pedazo kan trigo binabayo, iyo man sa satong buhay o kita mismo, na sa mga momento kan kadipisilan asin kabiyadean namamatean niato ining pagbayo kan satong buhay.  Garo baga an satong sadiring tul-ang an binabayo.  Siring na an mga pedazo kan ubas tinutungtungan para makua an duga, iyo man baga an satong namatean sa mga horas kan problema, kahelangan, mga momento na para bagang dai na kitang pag-asa, para bagang pinaparagamo man kan leon an satong mga tul-ang siring na an mga tul-ang ni san Ignacio pinaragamo kan mga leon sa Roma.

Mga mensaje man sato kan Kagurangnan ngonian na Corpus Christi ining mga duwang puntong hale sa mga consideraciones kani-kanina lang:

1) Saro lang an Simbahan minsan kita gabos na mga miembro kaini iba-iba an hinalean, kinakadakulaan asin nagigin historia kan buhay.  Kaya kita gabos bakong iba saro sa saro.  Tunay na kita sarong comunidad, sarong familia, magturugang sa sarong katogangan sa sarong Dios Ama sa langit.  Tama lang na magtinarabangtabangan kita lalo na sa mga nasa manlaenlaen na situacion na dificil.

2)  Asin an mga kadipisilan kan buhay minsan iyo an nagtatao luha asin kulog sa satong buhay, iyo man an mga ini an nagigin kusog niato pag rendir cuenta tapos na o luminipas ki kadikit an mga problema.  Minsan nagpapasalamat pa kita ta an gabos na ini nangyari ta dahil sa mga ini kita mas nagin makusog asin pusog sa paglingkod sa Dios asin sa kapwa.

Ascension Sunday 1 June 2014

Mothers and fathers would usually remind us with lines such as these: "Drink your milk and stay healthy, make sure you exercise regularly, and sleep early."  They would add: "Make friends and be good."  And then as good Christian parents they would also add: "Always pray that God may bless you."

Jesus in today's Gospel is about to leave and as a good parent would, he left us Christians, His disciples, some parting words.  Our health indeed is of paramount importance to us and to our mission.  It gives us good humor and strength to have a happy life and healthy living allows us to do more and achieve more.  Our moral and social life adds color to our every day living in harmony with our friends and neighbors.  Our spiritual life, when properly nurtured in conversation with God, makes us happier and healthier persons even in times of adversities and problems.

Good health, health relationships, happy spiritual lives: all these our parents wish for us, as do our God on high.  We would do well to work for these, sacrificing some things to obtain them for our good and for the good of all those who surround and care for us.  But Jesus the Second Person of the Holy Trinity before He ascends to heaven, leaves us with one more set of parting words which our parents on earth could not imagine to say and would not, even if it crosses their minds.  Jesus tells us: "I will be with you to the end of time and to the ends of the earth!"

We thank Our Lord Jesus Christ for such words because we know them to be true and are not just mere words.  Indeed He guides us till today, especially through the Holy Spirit.  This we hold in our minds and hearts as we strive to carry out the mission He gives us: "Go therefore; make me known to all men and make them my disciples as you are my disciples."  He does not only send us but also He gives us the grace so that we may fulfill the mission He has tasked us with.

Vigilia de Pascua

Vigilia de Pascua

Yaon kita digdi ngonian mga tugang sa Pagtubod, siring man ining satong mga namomot-an na mga catecumenado, an satong mga magiging pinakabag-ong mga ka-discipulos ki Cristo Jesús, para sa Vigilia de Pascua, an pag-andam, an paghalat sa pinaka-importante na pangyayari sa Buhay Cristiano, an Pagkabuhay-Liwat kan Paraligtas.  Bilog na cuarenta días kan Cuaresma, lalo na kan mga nakaagi na mga aldaw na banal kaining Semana Santa, satong giniromdom asin sinelebrar an pagsakit asin pagkagadan ni Jesucristo.  Kita nangadyie, naglimos, nag-abstinencia asin nag-ayuno.  Kita nagkumpisal, nag-estación kan Cruz asin nag-rosario.  Ngonian yaon na kita sa satong pinakahahalat na aldaw, an día de Resurrección.

          Normalmente an Santa Misa nababanga sa duwang kabtang, pero sa kadahilanan kan orog kabanalan asin orog kaimportantehon kan bangging ini, nababanga ining satong Vigilia de Pascua sa apat: an Liturgia kan Liwanag, an Liturgia kan Tataramon, an Liturgia kan Pagbonyag asin an Liturgia kan Eucaristia.  Ini man an mensaje kan mga kamamate pa lang niato na mga Babasahon: hale sa diklom yaon na an liwanag; hale sa silencio yaon na an tataramon; hale sa satong pagkagadan yaon an bag-ong buhay; asin hale sa pagkagadan ni Jesús yaon na an Saiyang Pagkabuhay-Liwat.  Kaya ngani Siya na Aki kan Dios nani-laman para kita mga nasa laman magin mga aki kan Dios asin kaya ngani ining tinapay asin ining arak na satong kinakakan asin iniinom tunay na Hawak asin Dugo kan Dios na buháy.

          Siring na kaidtong panahon kan kita binonyagan, ining satong mga catecumenado na ngonian man sana tatawagon na na mga Cristiano siring na kita man mga Cristiano sosog ki Cristo, bobôboan kan tubig sa saindang payo.  An kasalan na original napapara, an gracia kan Dios sa pagiging Aki Niya minalaog sa saindang hawak asin kalag, asin sindang tunay na mga miembro na kan Simbahan Católica, na tinogdas mismo ni Cristo ki Pedro asin sa mga Apóstoles, kasalihid kaini an satong Señor Obispo na iyo mismo an mabonyag sainda, asin katabang niya kaming mga padi nindo digdi sa parroquia, sa diócesis asin sa bilog na mundo saen man kita mapaduman.  Sinda ginugubingan kan gubing na puti, símbolo kan saindang kalinigan, tanda para sa iba manungod sa tunay na dignidad kan tawo asin kan Cristiano asin paggiromdom sa sainda mismo asin sa sato man, na an bonyag bako lang ceremonia na pagkatapos nasa mga fotografía na sana kundi sarong misión sa kalinigan asin paglinig sa mundo kun saen yaon an karigsokan asin manlaenlaen na kaatian.  Sinda tinatawan kan candela na nagliliwanag, na iyo si Cristo liwanag sato gabos contra sa diklom, guía sa satong paglakaw, asin dirección na dae nasasala pasiring sa pagbalik niato sa Harong nin Ama.  Gabos ini más papakusugon kan Pagkumpil asin Paghilig kan Espíritu Santo sa sainda, asin más papanoon kan Comunión asin Paglaog kan Hawak asin Dugo ni Cristo Jesús mismo sa saindang sadiring mga hawak asin espíritu.

          Mga tugang, kita gabos, mga dati nang Cristiano kaiba an mga magiging bag-o nang Cristiano, girimdomon niato pirmi asin dae paglingawan an mensaje kan apat na kabtang kan satong celebración ngonian na Vigilia de Pascua.  Kita bako mga aki kan diklom, bako kitang mga aki kan silencio asin kadaihan, bakong mga aki kan kagadanan, kundi kita mga aki kan liwanag, mga aki kan tataramon, asin mga aki kan Buhay na daing kasagkoran.  Kita gabos mga aki kan Dios.  Mabuhay lugod kita siring sa satong identidad asin dignidad.  Amén.

Ika-walong Domingo kan Ordinaryong Panahon

          Sa Evangelio sosog ki san Mateo, nadangog niato sa paagi kan mga imágenes na mga magayonon asin madonongon na an Kagurangnan tunay na Kaggibo asin Kagtao.  Siya an Kaglalang asin padaba Niya an gabos na mga linalang, lalo an an mga tawo.  Siya sarong Ina na dai magpapabaya sa Saiyang mga aki na magutom.  Siya sarong Ama na dai magpapabaya sa Saiyang mga aki na daing gubing.  Más lalo pa ining mga imágenes nagin mga mayaman sa pagdagdag niato sa sainda kan iba pang mga imágenes na ipinapahiling sato kan Enot na Babasahon sosog ki Isaias.  An Diyos sarong ina na dai makakalingaw sa saiyang aki.  Minsan an ina makalingaw, an Dios nunca magpapabaya sa sato.  Awit kan Salmo, an Dios an satong masarig na gapo, paalawan asin baluarte.  Dagdag pa kan Ika-duwang Babasahon ginono sa Enot na Surat ni san Pablo sa mga taga-Corinto na an Dios hukom na justo asin manso, nasa justicia asin maheherakon al mismo tiempo.

          Gabos an mga ini tunay na mga imágenes na magayonon asin madonongon.  Pinapano an satong pagtubod nin paglaom sa Kagurangnan Dios minsan sa mga situaciones nin kadikloman asin katikapohan.  Pinapano kan mga ini an satong pagtubod ki pagkamoot sa Kaggibo asin Kagtao kan gabos maski sa mga panahon kan desesperación asin soledad.  Marhay sana na pag-preparar ini, ta sa miércoles man sana na madatong iyo na an poon kan Cuaresma.  Sa maabot na Miércoles de Ceniza, sa pag-cruz sato kan abo asin sa mga tataramon na “Ika abo asin sa abo mabalik” asin pa “Magsolsol asin magtubod sa Marhay na Bareta”, maglalaog an bilog na Cristiandad, an gabos na mga Católico Cristiano sa periodo ki pagpamibi, pag-ayuno asin paglimos.  Preparación ini gabos sa Semana Santa kun saen gigiromdomon asin isasabuhay giraray niato an pagsakit, pagkagadan, asin pagkabuhay-liwat kan Dios na nanitawo para sato.  Gabos ini aram niato símbolo asin pakisumaro ni Jesucristo mismo sa satong mga sadiring pagsakit asin pagkagadan.

          Tunay na consolación an mensaje na itinatao kan mga Babasahon ngonian na Ika-walong Domingo kan Ordinaryong Panahon.  Para sa mga nagsasakit, na sinda makatalingkas sa kasakitan o al menos mamatean na dai sinda nagsosolo asin an Dios yaon sa kataed ninda.  Para man sa sato gabos, sa ordinaryong pagbuhay sa ibabaw kan daga, ta aram niato sa paagi kan kasiguraduhan na gikan sa pagtubod sa Dios na may sentido an gabos asin may dirección an satong buhay.  An satong mga buhay nasa kamot kan Dios asin dai Niya kita pababayaan mapariwara ki haloy ta Siya mismo an maghahanap sato kun kita nawawara sa agihan na tama.

          Salamat Kagurangnan ta bako Mo lang kami ginibo, bako Mo lang kami tinaw-an nin buhay, kundi padagos Mo kaming hinuhurma pasiring sa Saimong magayon asin madonong na deseño asin padagos Mo kaming inaalalayan sa buhay na ini pasiring sa Buhay na daing kasagkoran na Ika mismo an nagpeprepara samo.  Amén.

***************************************************************

          Saro sa mga helang kan panahon niato ngonian iyo an paghandal.  An pag-worry.  Mag-aki man o mag may edad na, helang niato an pag-isip na may kulba sa kadakul na bagay.  Dakulon na sa sato na mga aki pa an may mga alta presión na, o aki pa may mga línea na sa pamayhon.  Ngonian lugod na dakulon na an mga bagay na hale sa ciencia asin tecnología na nakakapa-facil kan buhay, ngonian man kita nagpapas-an kan mga paghandal.  Kadaklan man kan mga causa asin mga laman kan satong mga iniisip iyo an mga material na bagay, kundi man pirmi cuarta an sa isip.  Kulang an sueldo?  Saen makua panghulog sa coche sa maabot na bulan?  An pambayad sa curriente, tubig asin sa harong?  Dahil sa kita may mga buhay na sadiri asin may mga responsabilidad man sa satong mga namomot-an sa buhay, iniisip niato na dapat man sana arog kaini, asin irresponsable an tawo na daing pakiaram asin dai nahahandal.  Mga aki sana an dai nahahandal kaya ngonian na mga adulto na kita dapat lang na pas-anon niato an pag-isip na may kulba bilang satong obligación, satong kahirasan sa buhay.  Pero arog ba talaga kaini dapat pirmi, oras-oras, aroaldaw?  O siguro minsan kaipuhan man kita magtonong asin ipasa-Dios gabos asin magin kitang ulit mga aki na maghihingoha pero aram niato na gabos naka-depender man sana sa Ama Kagurangnan.

          Himateon niato an mga Babasahon asin giromdomon niato an mga imágenes na ibinugtak kan Dios sa satong mga isip kanina sana sa paagi kan satong mga talinga.  Sabi ni Isaias an Dios ina na dai nunca makakalingaw sa sato saiyang mga aki.  Awit kan Salmo na an Dios masarig na gapo, satong paalawan, asin baluarte na makosog.  Dagdag ni san Pablo na an Dios marhay asin maheherakon na hukom.  Asin cada saro sa mga imágenes na ini rinorokyaw giraray sato kan Evangelio ni san Mateo: hanapon niato an kahadean kan Kagurangnan, asin ini gabos itatao man sana sato.  Kun an mga gamgam sa langit asin an mga lirio sa daga dai nahahandal kun sinda igwa ki kakanon o gugubingon, kita pa kaya na más pa an halaga sa mga Mata kan Dios, na nanitawo asin nagadan para sato, kita pa kaya mahandal?  Kun an mga doot asin an mga hayop dai nahahandal, an mga aki pa kaya kan Dios mahandal sa maabot?  Cuidado kita, ta dai man sinasabi kan Tataramon kan Dios na kita dapat magin mga irresponsable asin magin mga pabaya na sa satong buhay asin sa mga obligaciones sa satong mga namomot-an, kundi tinuturuan kita ngonian na an paghandal, minsan parang natural sa sato, sa katotoohan inútil.  Tunay lamang na kadonongan an magin activo asin magin responsable sa paghingoha aroaldaw pero pag-rendir cuenta, pag-naggibo na niato an gabos na satong magigibo, sa abot kan satong mga kakayahan, gabos nasa Kamot na kan Kagurangnan.  An control yaon na sa Saiya.

          Kagurangnan, maglaog ka sa samong isip asin puso ngonian asin pakusuga kami na magin mga responsable sa samong mga obligaciones pero padonongon mo kami sa kaseguraduhan na pagkatapos kan samong paghingoha yaon man sa Saimo giraray an Ultima Palabra.  Tabangi kaming magpaubaya sa Saimo.  Amén.

Ika-anom na Domingo kan Ordinaryong Panahon (Taon A)

Ika-anom na Domingo kan Ordinaryong Panahon (Taon A)                 

Sabi kan Libro ni Sirac sa Enot na Babasahon: an tataramon kan Mahal na Dios regalo Niya sa satuya gabos.  Dagdag man ni san Pablo sa saiyang primerong Surat sa mga taga-Corinto sa Ikaduwang Babasahon: sa paagi kan kadonongan kan Kagurangnan Dios, ginigiyahan Niya kita sa karahayan asin rinarayo Niya kita sa karatan.  Masasabing nagkapira sa mga pinakadakula sa Saiyang mga regalo gikan sa Saiyang kadonongan iyo an Saiyang mga Tugon sato.  Orog nanggayo an mga Sampolong Togon kan Dios sa mga Judío, na iyo man an Sampolong Togon sato na mga Cristiano Católico.  Maski an mga dai nagtutubod dai minaduda na napapano nin kadonongan ining mga Togon asin tunay na regalo para sa sociedad kan mga tawo, para sa familia asin para sa lambang tawo.

          Nabanggit ni san Mateo sa Evangelio ngonian na ika-anom na Domingo kan Ordinaryong Panahon tolo sa Sampolong Togon ni Moisés.  Dai ka maggadan; dai ka magdurog sa bakong mong agom; asin dai ka magputik manungod sa saimong tugang.  Minsan ngani iniisip kan iba na negativo ining mga patanid asin nagbabawal, an tunay asin totoo iyo na ini positivo sa saindang mensaje asin agyat sa cada saro.  Dai maggadan boot sabihon respecto kan buhay.  Dai ka magdurog sa bakong mong agom boot sabihon respecto kan buhay familia.  Dai ka magputik manungod sa saimong tugang boot sabihon respecto kan buhay privado kan satong kataning.  Bako sana ini mga pagbabawal kundi agyat para sa más marhay na buhay sa sociedad, familia asin cada persona.  Aram niato an desastre na gikan sa paggadan kan sarong inocente asin an kadakul na mga consequencia kaini, orog nanggayo an paggadan sa inocente sa laog kan tulak kan ina.  An paggadan kan sarong aki sa poponan kan saiyang sadiring ina nagkukurahaw ki justicia sa daga asin sa langit.  Aram niato an desastre na gikan sa pagdurog sa bakong sadiring agom, kun papano rinoronot kaini an relación kan mag-inagoman asin kan mga magurang asin saindang mga kaakian.  An pagdorog sa bakong sadiring agom guminagadan sa buhay familia, na iyo an célula kan sociedad, kaya ginagadan kaini an sociedad mismo.  Aram niato an desastre na gikan sa pagsaksi ki putik manungod sa kapwa niato, kun papano ginagadan kaini an tawo sa saiyang dignidad asin reputación na nahuhusgahan na minsan sa kawaraan niya oportunidad na depensahan an sadiri, asin kun papano nagka-causa ini ki kolog asin dagok na nag-aagrangay ki justicia contra sa buwaon asin paralibak.  An pagsaksi ki putik manungod sa kapwa iyo an paggadan sa kapwa, maski na daing dugo na naibulos.

          Mamibi kita sa Domingo na ini, sa Santa Misa na ini, na magpasalamat sa pagtanggap kan mga regalo kan Tataramon kan Mahal na Dios, asin na magdanay sa pagmate kan kadonongan kan Kagurangnan Dios.  Minsan an pagsunod sa Saiyang mga Togon nangangaipo kan satong sacrificio, perseverancia asin pagtindog giraray cada vez matumba, aram niato na an pagsunod sa Dios iyo sana an makakatao sato ki katoninongan, kaogmahan asin kapanoan sa satong mga kakulangan.  Amén.