Ascension Sunday 1 June 2014

Mothers and fathers would usually remind us with lines such as these: "Drink your milk and stay healthy, make sure you exercise regularly, and sleep early."  They would add: "Make friends and be good."  And then as good Christian parents they would also add: "Always pray that God may bless you."

Jesus in today's Gospel is about to leave and as a good parent would, he left us Christians, His disciples, some parting words.  Our health indeed is of paramount importance to us and to our mission.  It gives us good humor and strength to have a happy life and healthy living allows us to do more and achieve more.  Our moral and social life adds color to our every day living in harmony with our friends and neighbors.  Our spiritual life, when properly nurtured in conversation with God, makes us happier and healthier persons even in times of adversities and problems.

Good health, health relationships, happy spiritual lives: all these our parents wish for us, as do our God on high.  We would do well to work for these, sacrificing some things to obtain them for our good and for the good of all those who surround and care for us.  But Jesus the Second Person of the Holy Trinity before He ascends to heaven, leaves us with one more set of parting words which our parents on earth could not imagine to say and would not, even if it crosses their minds.  Jesus tells us: "I will be with you to the end of time and to the ends of the earth!"

We thank Our Lord Jesus Christ for such words because we know them to be true and are not just mere words.  Indeed He guides us till today, especially through the Holy Spirit.  This we hold in our minds and hearts as we strive to carry out the mission He gives us: "Go therefore; make me known to all men and make them my disciples as you are my disciples."  He does not only send us but also He gives us the grace so that we may fulfill the mission He has tasked us with.

Vigilia de Pascua

Vigilia de Pascua

Yaon kita digdi ngonian mga tugang sa Pagtubod, siring man ining satong mga namomot-an na mga catecumenado, an satong mga magiging pinakabag-ong mga ka-discipulos ki Cristo Jesús, para sa Vigilia de Pascua, an pag-andam, an paghalat sa pinaka-importante na pangyayari sa Buhay Cristiano, an Pagkabuhay-Liwat kan Paraligtas.  Bilog na cuarenta días kan Cuaresma, lalo na kan mga nakaagi na mga aldaw na banal kaining Semana Santa, satong giniromdom asin sinelebrar an pagsakit asin pagkagadan ni Jesucristo.  Kita nangadyie, naglimos, nag-abstinencia asin nag-ayuno.  Kita nagkumpisal, nag-estación kan Cruz asin nag-rosario.  Ngonian yaon na kita sa satong pinakahahalat na aldaw, an día de Resurrección.

          Normalmente an Santa Misa nababanga sa duwang kabtang, pero sa kadahilanan kan orog kabanalan asin orog kaimportantehon kan bangging ini, nababanga ining satong Vigilia de Pascua sa apat: an Liturgia kan Liwanag, an Liturgia kan Tataramon, an Liturgia kan Pagbonyag asin an Liturgia kan Eucaristia.  Ini man an mensaje kan mga kamamate pa lang niato na mga Babasahon: hale sa diklom yaon na an liwanag; hale sa silencio yaon na an tataramon; hale sa satong pagkagadan yaon an bag-ong buhay; asin hale sa pagkagadan ni Jesús yaon na an Saiyang Pagkabuhay-Liwat.  Kaya ngani Siya na Aki kan Dios nani-laman para kita mga nasa laman magin mga aki kan Dios asin kaya ngani ining tinapay asin ining arak na satong kinakakan asin iniinom tunay na Hawak asin Dugo kan Dios na buháy.

          Siring na kaidtong panahon kan kita binonyagan, ining satong mga catecumenado na ngonian man sana tatawagon na na mga Cristiano siring na kita man mga Cristiano sosog ki Cristo, bobôboan kan tubig sa saindang payo.  An kasalan na original napapara, an gracia kan Dios sa pagiging Aki Niya minalaog sa saindang hawak asin kalag, asin sindang tunay na mga miembro na kan Simbahan Católica, na tinogdas mismo ni Cristo ki Pedro asin sa mga Apóstoles, kasalihid kaini an satong Señor Obispo na iyo mismo an mabonyag sainda, asin katabang niya kaming mga padi nindo digdi sa parroquia, sa diócesis asin sa bilog na mundo saen man kita mapaduman.  Sinda ginugubingan kan gubing na puti, símbolo kan saindang kalinigan, tanda para sa iba manungod sa tunay na dignidad kan tawo asin kan Cristiano asin paggiromdom sa sainda mismo asin sa sato man, na an bonyag bako lang ceremonia na pagkatapos nasa mga fotografía na sana kundi sarong misión sa kalinigan asin paglinig sa mundo kun saen yaon an karigsokan asin manlaenlaen na kaatian.  Sinda tinatawan kan candela na nagliliwanag, na iyo si Cristo liwanag sato gabos contra sa diklom, guía sa satong paglakaw, asin dirección na dae nasasala pasiring sa pagbalik niato sa Harong nin Ama.  Gabos ini más papakusugon kan Pagkumpil asin Paghilig kan Espíritu Santo sa sainda, asin más papanoon kan Comunión asin Paglaog kan Hawak asin Dugo ni Cristo Jesús mismo sa saindang sadiring mga hawak asin espíritu.

          Mga tugang, kita gabos, mga dati nang Cristiano kaiba an mga magiging bag-o nang Cristiano, girimdomon niato pirmi asin dae paglingawan an mensaje kan apat na kabtang kan satong celebración ngonian na Vigilia de Pascua.  Kita bako mga aki kan diklom, bako kitang mga aki kan silencio asin kadaihan, bakong mga aki kan kagadanan, kundi kita mga aki kan liwanag, mga aki kan tataramon, asin mga aki kan Buhay na daing kasagkoran.  Kita gabos mga aki kan Dios.  Mabuhay lugod kita siring sa satong identidad asin dignidad.  Amén.

Ika-walong Domingo kan Ordinaryong Panahon

          Sa Evangelio sosog ki san Mateo, nadangog niato sa paagi kan mga imágenes na mga magayonon asin madonongon na an Kagurangnan tunay na Kaggibo asin Kagtao.  Siya an Kaglalang asin padaba Niya an gabos na mga linalang, lalo an an mga tawo.  Siya sarong Ina na dai magpapabaya sa Saiyang mga aki na magutom.  Siya sarong Ama na dai magpapabaya sa Saiyang mga aki na daing gubing.  Más lalo pa ining mga imágenes nagin mga mayaman sa pagdagdag niato sa sainda kan iba pang mga imágenes na ipinapahiling sato kan Enot na Babasahon sosog ki Isaias.  An Diyos sarong ina na dai makakalingaw sa saiyang aki.  Minsan an ina makalingaw, an Dios nunca magpapabaya sa sato.  Awit kan Salmo, an Dios an satong masarig na gapo, paalawan asin baluarte.  Dagdag pa kan Ika-duwang Babasahon ginono sa Enot na Surat ni san Pablo sa mga taga-Corinto na an Dios hukom na justo asin manso, nasa justicia asin maheherakon al mismo tiempo.

          Gabos an mga ini tunay na mga imágenes na magayonon asin madonongon.  Pinapano an satong pagtubod nin paglaom sa Kagurangnan Dios minsan sa mga situaciones nin kadikloman asin katikapohan.  Pinapano kan mga ini an satong pagtubod ki pagkamoot sa Kaggibo asin Kagtao kan gabos maski sa mga panahon kan desesperación asin soledad.  Marhay sana na pag-preparar ini, ta sa miércoles man sana na madatong iyo na an poon kan Cuaresma.  Sa maabot na Miércoles de Ceniza, sa pag-cruz sato kan abo asin sa mga tataramon na “Ika abo asin sa abo mabalik” asin pa “Magsolsol asin magtubod sa Marhay na Bareta”, maglalaog an bilog na Cristiandad, an gabos na mga Católico Cristiano sa periodo ki pagpamibi, pag-ayuno asin paglimos.  Preparación ini gabos sa Semana Santa kun saen gigiromdomon asin isasabuhay giraray niato an pagsakit, pagkagadan, asin pagkabuhay-liwat kan Dios na nanitawo para sato.  Gabos ini aram niato símbolo asin pakisumaro ni Jesucristo mismo sa satong mga sadiring pagsakit asin pagkagadan.

          Tunay na consolación an mensaje na itinatao kan mga Babasahon ngonian na Ika-walong Domingo kan Ordinaryong Panahon.  Para sa mga nagsasakit, na sinda makatalingkas sa kasakitan o al menos mamatean na dai sinda nagsosolo asin an Dios yaon sa kataed ninda.  Para man sa sato gabos, sa ordinaryong pagbuhay sa ibabaw kan daga, ta aram niato sa paagi kan kasiguraduhan na gikan sa pagtubod sa Dios na may sentido an gabos asin may dirección an satong buhay.  An satong mga buhay nasa kamot kan Dios asin dai Niya kita pababayaan mapariwara ki haloy ta Siya mismo an maghahanap sato kun kita nawawara sa agihan na tama.

          Salamat Kagurangnan ta bako Mo lang kami ginibo, bako Mo lang kami tinaw-an nin buhay, kundi padagos Mo kaming hinuhurma pasiring sa Saimong magayon asin madonong na deseño asin padagos Mo kaming inaalalayan sa buhay na ini pasiring sa Buhay na daing kasagkoran na Ika mismo an nagpeprepara samo.  Amén.

***************************************************************

          Saro sa mga helang kan panahon niato ngonian iyo an paghandal.  An pag-worry.  Mag-aki man o mag may edad na, helang niato an pag-isip na may kulba sa kadakul na bagay.  Dakulon na sa sato na mga aki pa an may mga alta presión na, o aki pa may mga línea na sa pamayhon.  Ngonian lugod na dakulon na an mga bagay na hale sa ciencia asin tecnología na nakakapa-facil kan buhay, ngonian man kita nagpapas-an kan mga paghandal.  Kadaklan man kan mga causa asin mga laman kan satong mga iniisip iyo an mga material na bagay, kundi man pirmi cuarta an sa isip.  Kulang an sueldo?  Saen makua panghulog sa coche sa maabot na bulan?  An pambayad sa curriente, tubig asin sa harong?  Dahil sa kita may mga buhay na sadiri asin may mga responsabilidad man sa satong mga namomot-an sa buhay, iniisip niato na dapat man sana arog kaini, asin irresponsable an tawo na daing pakiaram asin dai nahahandal.  Mga aki sana an dai nahahandal kaya ngonian na mga adulto na kita dapat lang na pas-anon niato an pag-isip na may kulba bilang satong obligación, satong kahirasan sa buhay.  Pero arog ba talaga kaini dapat pirmi, oras-oras, aroaldaw?  O siguro minsan kaipuhan man kita magtonong asin ipasa-Dios gabos asin magin kitang ulit mga aki na maghihingoha pero aram niato na gabos naka-depender man sana sa Ama Kagurangnan.

          Himateon niato an mga Babasahon asin giromdomon niato an mga imágenes na ibinugtak kan Dios sa satong mga isip kanina sana sa paagi kan satong mga talinga.  Sabi ni Isaias an Dios ina na dai nunca makakalingaw sa sato saiyang mga aki.  Awit kan Salmo na an Dios masarig na gapo, satong paalawan, asin baluarte na makosog.  Dagdag ni san Pablo na an Dios marhay asin maheherakon na hukom.  Asin cada saro sa mga imágenes na ini rinorokyaw giraray sato kan Evangelio ni san Mateo: hanapon niato an kahadean kan Kagurangnan, asin ini gabos itatao man sana sato.  Kun an mga gamgam sa langit asin an mga lirio sa daga dai nahahandal kun sinda igwa ki kakanon o gugubingon, kita pa kaya na más pa an halaga sa mga Mata kan Dios, na nanitawo asin nagadan para sato, kita pa kaya mahandal?  Kun an mga doot asin an mga hayop dai nahahandal, an mga aki pa kaya kan Dios mahandal sa maabot?  Cuidado kita, ta dai man sinasabi kan Tataramon kan Dios na kita dapat magin mga irresponsable asin magin mga pabaya na sa satong buhay asin sa mga obligaciones sa satong mga namomot-an, kundi tinuturuan kita ngonian na an paghandal, minsan parang natural sa sato, sa katotoohan inútil.  Tunay lamang na kadonongan an magin activo asin magin responsable sa paghingoha aroaldaw pero pag-rendir cuenta, pag-naggibo na niato an gabos na satong magigibo, sa abot kan satong mga kakayahan, gabos nasa Kamot na kan Kagurangnan.  An control yaon na sa Saiya.

          Kagurangnan, maglaog ka sa samong isip asin puso ngonian asin pakusuga kami na magin mga responsable sa samong mga obligaciones pero padonongon mo kami sa kaseguraduhan na pagkatapos kan samong paghingoha yaon man sa Saimo giraray an Ultima Palabra.  Tabangi kaming magpaubaya sa Saimo.  Amén.

Ika-anom na Domingo kan Ordinaryong Panahon (Taon A)

Ika-anom na Domingo kan Ordinaryong Panahon (Taon A)                 

Sabi kan Libro ni Sirac sa Enot na Babasahon: an tataramon kan Mahal na Dios regalo Niya sa satuya gabos.  Dagdag man ni san Pablo sa saiyang primerong Surat sa mga taga-Corinto sa Ikaduwang Babasahon: sa paagi kan kadonongan kan Kagurangnan Dios, ginigiyahan Niya kita sa karahayan asin rinarayo Niya kita sa karatan.  Masasabing nagkapira sa mga pinakadakula sa Saiyang mga regalo gikan sa Saiyang kadonongan iyo an Saiyang mga Tugon sato.  Orog nanggayo an mga Sampolong Togon kan Dios sa mga Judío, na iyo man an Sampolong Togon sato na mga Cristiano Católico.  Maski an mga dai nagtutubod dai minaduda na napapano nin kadonongan ining mga Togon asin tunay na regalo para sa sociedad kan mga tawo, para sa familia asin para sa lambang tawo.

          Nabanggit ni san Mateo sa Evangelio ngonian na ika-anom na Domingo kan Ordinaryong Panahon tolo sa Sampolong Togon ni Moisés.  Dai ka maggadan; dai ka magdurog sa bakong mong agom; asin dai ka magputik manungod sa saimong tugang.  Minsan ngani iniisip kan iba na negativo ining mga patanid asin nagbabawal, an tunay asin totoo iyo na ini positivo sa saindang mensaje asin agyat sa cada saro.  Dai maggadan boot sabihon respecto kan buhay.  Dai ka magdurog sa bakong mong agom boot sabihon respecto kan buhay familia.  Dai ka magputik manungod sa saimong tugang boot sabihon respecto kan buhay privado kan satong kataning.  Bako sana ini mga pagbabawal kundi agyat para sa más marhay na buhay sa sociedad, familia asin cada persona.  Aram niato an desastre na gikan sa paggadan kan sarong inocente asin an kadakul na mga consequencia kaini, orog nanggayo an paggadan sa inocente sa laog kan tulak kan ina.  An paggadan kan sarong aki sa poponan kan saiyang sadiring ina nagkukurahaw ki justicia sa daga asin sa langit.  Aram niato an desastre na gikan sa pagdurog sa bakong sadiring agom, kun papano rinoronot kaini an relación kan mag-inagoman asin kan mga magurang asin saindang mga kaakian.  An pagdorog sa bakong sadiring agom guminagadan sa buhay familia, na iyo an célula kan sociedad, kaya ginagadan kaini an sociedad mismo.  Aram niato an desastre na gikan sa pagsaksi ki putik manungod sa kapwa niato, kun papano ginagadan kaini an tawo sa saiyang dignidad asin reputación na nahuhusgahan na minsan sa kawaraan niya oportunidad na depensahan an sadiri, asin kun papano nagka-causa ini ki kolog asin dagok na nag-aagrangay ki justicia contra sa buwaon asin paralibak.  An pagsaksi ki putik manungod sa kapwa iyo an paggadan sa kapwa, maski na daing dugo na naibulos.

          Mamibi kita sa Domingo na ini, sa Santa Misa na ini, na magpasalamat sa pagtanggap kan mga regalo kan Tataramon kan Mahal na Dios, asin na magdanay sa pagmate kan kadonongan kan Kagurangnan Dios.  Minsan an pagsunod sa Saiyang mga Togon nangangaipo kan satong sacrificio, perseverancia asin pagtindog giraray cada vez matumba, aram niato na an pagsunod sa Dios iyo sana an makakatao sato ki katoninongan, kaogmahan asin kapanoan sa satong mga kakulangan.  Amén.

Solemnidad de Cristo Rey del Universo Taon C

          Sa Domingo na ini, an ultimo na domingo kan Ordinaryong Panahon, sini-celebrar kan bilog na Simbahan an Solemnidad kan Cristo Hade.  Kan 1925 in-instituir ining Kafiestahan ni Papa Pio XI laban sa secularismo na nagpopoon pa lang kaidto mag-reinar sa mga nación, sa mga familia asin sa mga puso kan tawo.  Boot ipagiromdom kan Santo Padre na si Cristo an Hade kan bilog na universo asin bako ining mga salang idea asin mga material na bagay.  Kaidto man lalo na ngonian kun sano an secularismo laganap na sa sangkatawohan marahay-rahay na i-celebrar kan bilog na Simbahan ining Solemnidad sa paggiromdom sa gabos na si Cristo Hade niato asin daing iba.

          Sa Enot na Babasahon an pinili na nación, an mga Israelita, nakakaag sa difícil na situación.  Dakulon an saindang mga kaiwal asin dai ki guía.  Ultimo si Samuel sa mga juzgado kan Israel asin naghahagad sinda ki Yahweh ki sarong Hade.  Yaon ngonian si Hadeng David na nagsisimbolo kan pagpadaba ni Yahweh sa Israel, asin dai Niya pagpabaya sa saiyang banwaan lalo na sa mga panahon na kaipuhan ninda Siya.  Si Jesús an bag-ong David.

          Sa Ikaduwang Babasahon, may mga salang idea na naglalaganap sa joven na Simbahan kan Colosas.  May mga nagtutukdo na sa butnga kan Dios asin tawo igwa pa ki mga kapangyarihan na nag-i-influencia sa katawohan.  Kaya ngani man nagtutukdo si san Pablo na si Cristo único na Hade kan Universo asin dai nang iba.  Sakop niya an gabos, mag material man o mag espiritual man na aspecto kan realidad, an kabotan sana Niya an masusunod asin dai nang ibang kapangyarihan an makakadaog Saiya.

          Sa Evangelio Capitúlo 23 sosog ki Lucas mahihiling niato si Cristo Hade sa corona Niya gibo sa tunok, sa trono Niya gibo sa kahoy kan Cruz asin sa mga nasasakopan Niya na pig-aagiagihan sana Siya.  Ibang clase ang kahadean ni Cristo na minsan maiisip niato na si Cristo bilang Hade sarong paradoja.  An saiyang corona iyo an pagsakit na nagigin kamurawayan sa kaitaasan pagtapos kan kinaban.  An saiyang trono iyo an mga kadipisilan asin kabiyadean sa buhay.  An trono Niya na Cruz iyo an nagigin tulay hale sa daga pasiring sa langit.  An saiyang mga nasasakopan libre sa pagsunod o pagsayuma Saiya sa puso na maoongis o mamomoot Saiya.

          Sa gabos na paghorop-horop na ini, mahihiling niato mga tugang, mga kapwa Cristiano, kita gabos mga tagasunod ni Cristo, an boot na kahadean ni Cristo bakong sa pangluwas kun di sa panglaog kan tawo.  Sa saiyang puso.  Asin kabaliktaran kan mentalidad kan mundo na ini, an Saiyang kamurawayan iyo an servicio asin pagtao kan sadiri sa kapwa asin sa Dios.

Solemnity of Christ the King Year C

          The Title of King in Christ is somewhat paradoxical.  Para in Greek can mean against, while doxa also in Greek can mean belief.  Christ as King may be seen as somewhat contrary to popular belief.  What do you imagine a king would be?  Well, we may imagine a king in his glory, seated on his throne and smug in his power encompassing all he sees and all he imagines to be under his aegis.  Christ as King strikes us with a very different image.  His crown is the thorns, His throne is the Cross and His face turns to all who pass by.

          In Luke Chapter 23 of Today’s Gospel, on Jesus’ Cross was put an inscription, in Latin INRI, Iesus Nazarenus Rex Iudaeorum declaring Jesus Nazarene King of Jews.  Jesus the King is a striking image alongside Pilate, Herod and Caesar.  In 1925 when the Universal Church proclaimed the last Sunday of the Liturgical Year as a Solemnity of Christ the King the immediate interpretation, still valid till today, is of a strong social and political statement to the rulers, dictators and tyrants of the day.  Hitler in Germany would rise in power and Mussolini in Italy would achieve the same.  From ancient times till today, Christ as King offers a powerful contrast.  Christ is no king like Herod or Caesar, nothing like Hitler or Mussolini.  The Christians all but shouted to these people: you are not our king!  Jesus is our King!

          Jesus is our King and our crown is of thorns, our throne is of the cross and our people are those who pass by.  Our glory is of suffering, our throne is of shame and our people are free to come and go.  Our conquest is service, our boast is giving all and our people the suffering, the forgotten and the untouchables.  Jesus is our King, my King, and it is He who reigns over our lives, over my life, and not these socio-economic-political institutions.  Not these material things.  Not gold, glory or glamour.  Jesus is our King and we may be also of this world but our souls belong to the Kingdom.  We believe and understand that we are more than the mundane and we may have houses on this world but our homes are beyond this world.  Our aim is not down but up.  Our ambitions are grand to the highest standard and not just grandiose.

          Jesus as King, although seems to express the paradox, ultimately points us to true Kingship: He is what a king is supposed to be, to aspire, to imitate in the limits of the possible; He must be our king as what a king must be to us; He must be our king for He alone gives solace to suffering, suave to shame and welcome to the unwelcomed.

#YolandaPH #Napoles

          Lunes pa lang aram na kan bilog na Pilipinas na nagdadangadang an saro sa pinakamakusog na bagyo kan taon, si Yolanda para satuya, o Haiyan sa mundo.  Asin aram na man niato na magtetestigo sa comité kan Senado si Janet Lim Napoles.  Sa bagyo naghanda na an gabos, an mga balay pinasiguro na, an mga documento asin mga libro pinatos na, an mga ventana pinako na, may flashlight na asin igwa na ki tubig asin de lata en caso maglala an situación.  Better safe tan sorry.  Naglaog na si Yolanda sa Philippine Area of Responsability, pinalaog naman sa comité kan Senado kan Republica kan Pilipinas si Janet.  Nagbabagyo na sa Pilipinas asin nagbabagyo naman sa laog kan comité.  Kun puede lang niato sabihon parejo ni Janet ki Yolanda: hindi po, wala po, hindi ko po alam.

          Sa Enot na Babasahon ngonian na ika-treinta y dos na Domingo kan Ordinaryong Panahon, sa 2 Macabeo 7, namate niato an dramático asin trágico na cuento kan sarong ina asin an pito niyang aking lalaki, kun papaano naubos sinda gabos, tinao an saindang buhay para saindang pagtubod, ta sinda may dakulaon na paglaom sa Dios.  Nagtutubod sinda na buhay na daing kasagkoran an premio para sa gabos na nabubuhay asin nagagadan sa pagtubod.

          Salamat sa Dios asin salamat ki Ina, María Santísima, prinoteheran kita laban sa bagyo digdi sa ciudad de Sorsogon asin diit an daños sa satuya, especialmente kun ikukumpara sa daños na seguramente namamatean ngonian kan satuyang mga tugang sa Samar, Leyte, Cebu, Panay asin Mindoro.  Pinapamibi niato sinda asin kun ano man na tabang an maitatao niato, gibohon niato.  Enot sa mga harani sa satuya, asin sa sainda man na más napinsala ni Yolanda.  Maski na ano pa na bagyo, maski ano pang daños kaini sa satuya, nagtutubod kita na matatapos ini asin magtitindog giraray kita kan mga harong na nagaba, matanom giraray kita kan mga pananom na nagkawarara asin may paglaom kita sa aga na daing uran asin hangin, na sa aga may aldaw.  Siring sa ina asin sa saiyang pitong mga aki sa 2 Macabeo 7 an paglaom an nagpapakusog sa satuya asin dae ini natutumba maski ano man na bagyo.  Puede ngani niato sabihon na dahil man sa mga bagyo, kitang mga Bicolano más nagrarom sa pagtubod sa Kagurangnan asin sa intercesión ni Ina.  Maski anong kusog pa kan hangin asin uran kan bagyo, an satong pagtubod más nagtitibay, nagrararom asin nagkukusog lugod asin dae ini napapalid asin nawawara.

          Saro sa satong mga principio sa justicia iyo na an acusado inocente antes siya condenado.  Bilang an Pilipinas nagsusunod sa reglas de corte, an juez an makaka-decisión kun si Janel Lim Napoles may sala, asin namimibi kita para sa justicia para sa bilog na nación.  Pero kun siya man condenada, mahihiling niato na tunay na an salang gawe dae ki premio kun di igwa ki castigo.  Crime does not pay.  Minsan sa buhay nahihiling niato na sinda pa lugod na mga maraot asin corrupto an nagyayaman asin nagrarahay an buhay asin an mga simple asin honesto an nasa dificultad asin kabiyadean.  Bilang mga nagtutubod asin naglalaom na mga Cristiano Católico aram niato na bako ini an última palabra.  Siring na kan ina asin saiyang pitong mga aki na nagtatamasa kan premio kan langit después kan saindang buhay na pano kan pagtubod asin pagkagadan na pinakusog kan paglaom, aram niato na an Dios an may urhing sinasabi asin sinasabi Niya sa satuya ngonian na an paladan an marahay asin herak sa mga tampalasan, kun bako man digdi sa kinaban, segurado sa buhay na daing kasagkoran.  Amen.