May mga nagduda kaito pang panahon sa katotoohan kan pagtubod na si Maria ina ni Cristo asin dahil ina siya ni Cristo siya man ina ni Cristo Dios. Entonces si Maria ina nin Dios. Dae maako kan nagkapira kun papano si Maria tawo naging ina nin Dios. Kaya pinahayag kan Simbahan kaidto pang panahon na si Maria Christotokos asin Theotokos. Sa misterio kan plano kan Dios Ama an ika-duwang Persona kan Santisima Trinidad, para iligtas an tawo sa kasalan, nagboot magin tawo para an tawo magbalik sa Dios.
Si Maria tunay na nagin ina ni Cristo, siring sa saimo asin sakong ina. Siya ngani modelo kan mga ina. Sa saiyang laman hale an laman ni Cristo. Salamat kan saiyang gatas si Cristo duminakula asin kuminusog. Gabos na aram ni Maria bilang tawo itinukdo niya sa saiyang aki: ini man mga kaaraman sa manungod sa mundo o sa espiritu, practical man o teoretical, pang-oro-aldaw o pang bilog na buhay. Dahil si Cristo bako lang tawo kun di Dios man, mas pa an Saiyang mga aram asin mas pa an Saiyang kamurawayan. Pero dakul an yaon Saiya gikan man sa Saiyang ina, hasta, puede kita mag-imaginar, an Saiyang mga favorito na mga pagkaon, mga inumon, kulay, hamot, modo kan pagtaram asin mga gawe-gawe.
Tunay na fundamental asin necesario an ina sa buhay kan cada tawo. Siring ka-importante kan presencia, pagpadaba asin ejemplo kan ama. An sarong tawo minadakula asin mina-asenso salamat bako lang sa ama pati man asin lalong-lalo na sa ina. Tunay na sa likod kan suceso kan sarong lalaki, nasa likod an sarong babae. Tinawag na paladan si Maria ta orog kapaladan si Jesus, paladan an mga ina niato ta naabot niato an satuyang mga naabot. Nagin kita ngonian dahil man sa mga ina niato.
Arog na lang kaini an pag-ataque kan demonio sa institucion kan familia, lalong lalo na sa pagka-ina asin mga ina. Luway-luway na hinahale sa mga babae an saindang pinakaorog na vocacion digdi sa ibabaw kan daga. An pagiging ina, fisicalmente o espiritualmente. Rinaraot asin pinaparaot niya an mga marhay na intencion manungod sa feminismo asin kauswagan kan kababayehan asin tinatrasformar an babae bako na bilang ina kun di bilang objecto na sana. May mga ocasion na tama lang na an babae may trabajo man, tama lang na siya may inadalan man, tama lang na naabot man niya an saiyang mga ambicion asin maw-ot sa buhay. Pero kun para mangyari an mga ini isa-sacrificio kan babae an saiyang tunay asin pinakaorog na vocacion bilang ina digdi nangyayari an tragedia kan satong panahon.
Kun wara an mga ina, wara man kita gabos. Warang kagayonan sa mundo, warang paz y orden, warang paciencia asin perseverancia, warang pagpadaba asin pag-intiendi na an sarong ina sana an tatao maghiras, warang civilizacion, wara kita gabos. Asin kun an ina maraot asin dae ginampanan an saiyang tunay na pagka-ina bakong exageracion na an gabos na marhay magkakabahid ki maraot, asin gabos na magayon mamantsahan ki pangit, asin an buhay mawawaraan nin mismong buhay.
Kaya sa Solemnidad na ini kan Pagka-Ina ni Maria, an satuyang pamibi minaduman sa gabos na mga ina. Ina niato asin mga ina kan bilog na mundo. Mga bag-ong ina na minangidam pa lang kan saindang mga aki, mga ina na solo asin binayaan kan mga agom sa manlaen-laen na razon, mga ina na kinaipuhan magbaya sa aki para mag-ataman kan aki kan iba. Mga ina na nagbaya, mga ina na binayaan, mga ina sa hospital, sa campo, sa prisohan, sa lansangan na naglilimos kilik an saindang mga aki, basa sa uran, pinapakulugan asin nababasa an pandok ki luha sin dugo. Mga ina na nagsosolo, gurang na asin may helang. Para sainda lugod si Maria Ina ni Cristo an sainda asin satong paalawan asin kusog. Amen.
