Vigilia de Pascua
Yaon kita digdi ngonian mga tugang sa Pagtubod, siring man ining
satong mga namomot-an na mga catecumenado, an satong mga magiging pinakabag-ong
mga ka-discipulos ki Cristo Jesús, para sa Vigilia de Pascua, an pag-andam, an
paghalat sa pinaka-importante na pangyayari sa Buhay Cristiano, an
Pagkabuhay-Liwat kan Paraligtas. Bilog
na cuarenta días kan Cuaresma, lalo na kan mga nakaagi na mga aldaw na banal
kaining Semana Santa, satong giniromdom asin sinelebrar an pagsakit asin
pagkagadan ni Jesucristo. Kita
nangadyie, naglimos, nag-abstinencia asin nag-ayuno. Kita nagkumpisal, nag-estación kan Cruz asin
nag-rosario. Ngonian yaon na kita sa
satong pinakahahalat na aldaw, an día de Resurrección.
Normalmente an Santa Misa nababanga sa duwang kabtang, pero
sa kadahilanan kan orog kabanalan asin orog kaimportantehon kan bangging ini,
nababanga ining satong Vigilia de Pascua sa apat: an Liturgia kan Liwanag, an
Liturgia kan Tataramon, an Liturgia kan Pagbonyag asin an Liturgia kan
Eucaristia. Ini man an mensaje kan mga
kamamate pa lang niato na mga Babasahon: hale sa diklom yaon na an liwanag;
hale sa silencio yaon na an tataramon; hale sa satong pagkagadan yaon an
bag-ong buhay; asin hale sa pagkagadan ni Jesús yaon na an Saiyang
Pagkabuhay-Liwat. Kaya ngani Siya na Aki
kan Dios nani-laman para kita mga nasa laman magin mga aki kan Dios asin kaya
ngani ining tinapay asin ining arak na satong kinakakan asin iniinom tunay na
Hawak asin Dugo kan Dios na buháy.
Siring na kaidtong panahon kan kita binonyagan, ining
satong mga catecumenado na ngonian man sana tatawagon na na mga Cristiano siring
na kita man mga Cristiano sosog ki Cristo, bobôboan kan tubig sa saindang
payo. An kasalan na original napapara, an
gracia kan Dios sa pagiging Aki Niya minalaog sa saindang hawak asin kalag,
asin sindang tunay na mga miembro na kan Simbahan Católica, na tinogdas mismo
ni Cristo ki Pedro asin sa mga Apóstoles, kasalihid kaini an satong Señor Obispo
na iyo mismo an mabonyag sainda, asin katabang niya kaming mga padi nindo digdi
sa parroquia, sa diócesis asin sa bilog na mundo saen man kita mapaduman. Sinda ginugubingan kan gubing na puti,
símbolo kan saindang kalinigan, tanda para sa iba manungod sa tunay na dignidad
kan tawo asin kan Cristiano asin paggiromdom sa sainda mismo asin sa sato man,
na an bonyag bako lang ceremonia na pagkatapos nasa mga fotografía na sana
kundi sarong misión sa kalinigan asin paglinig sa mundo kun saen yaon an
karigsokan asin manlaenlaen na kaatian.
Sinda tinatawan kan candela na nagliliwanag, na iyo si Cristo liwanag
sato gabos contra sa diklom, guía sa satong paglakaw, asin dirección na dae
nasasala pasiring sa pagbalik niato sa Harong nin Ama. Gabos ini más papakusugon kan Pagkumpil asin
Paghilig kan Espíritu Santo sa sainda, asin más papanoon kan Comunión asin
Paglaog kan Hawak asin Dugo ni Cristo Jesús mismo sa saindang sadiring mga
hawak asin espíritu.
Mga tugang, kita gabos, mga dati nang Cristiano kaiba an
mga magiging bag-o nang Cristiano, girimdomon niato pirmi asin dae paglingawan
an mensaje kan apat na kabtang kan satong celebración ngonian na Vigilia de
Pascua. Kita bako mga aki kan diklom,
bako kitang mga aki kan silencio asin kadaihan, bakong mga aki kan kagadanan,
kundi kita mga aki kan liwanag, mga aki kan tataramon, asin mga aki kan Buhay
na daing kasagkoran. Kita gabos mga aki
kan Dios. Mabuhay lugod kita siring sa
satong identidad asin dignidad. Amén.
