Taon B Solemnidad de Cristo Rey del Universo (Cristo Hade kan Kinaban) Domingo, 25 Noviembre 2012, Sts. Peter and Paul Cathedral Parish, Sorsogon City

Daniel 7:13-14

            13Sa bisyon na ini sa pagkabanggi, nahiling ko an sarong garo tawo.  Nagrarani siya sako, napapatos nin panganoron, asin nagduman siya sa danay na buhay, dangan ipinamidbid sa saiya.  14Tinawan siya nin awtoridad, onra saka kapangyarihan na maghade, tanganing paglingkodan siya kan mga tawo sa gabos na nasyon, rasa asin lengwahe.  Magdadanay an saiyang awtoridad, asin mayo nin kataposan an saiyang kahadean.

Salmo 93:1-2,5

            1Hade an KAGURANGNAN.

                        Siya nagugubingan nin

                                    Kamahalan asin kosog.

            Masarig an namumugtakan kan

                                    Kinaban

                        Asin dai matatanyog.

            2An saimong trono, KAGURANGNAN,

                                    Masarig poon pa kaidto;

                        Ika nabubuhay na mayong

                                    Kapinonan asin mayong

                                    Kataposan.

            5An saimong mga togon mayo nin

                                    Kataposan, KAGURANGNAN,

                        Asin totoong banal an saimong

Templo,

                        Sa panahon na daing kataposan.

Kapahayagan 1:5-8

           

… 5asin hale ki Jesu Cristo, an maimod na saksi, na iyo an enot na binuhay liwat, saka iyo man an kagsakop kan mga hade sa kinaban.

            Namomotan kita ni Cristo.  Sa paagi kan saiyang dugo, kinalda niya kita sa satong mga kasalan.  6Ginibo niya kitang kahadean nin mga padi na maglilingkod sa saiyang Dios asin Ama.  Ki Jesu-Cristo an kamurawayan saka an kapangyarihan sagkod pa man!  Amen.

            7Hilinga!  Nagdadatong si Cristo na nasa panganoron!  Mahihiling siya kan gabos maski idtong mga guminarod saiya.  Gabos na tawo sa kinaban maghahaya dahel saiya.  Mangyayari nanggad ini!

            8”Ako an Alfa asin Omega,” an sabi kan Mapangyaring Kagurangnan Dios-an Dios ngunyang, kaidto, asin sa madatong pang panahon.

Juan 18:33-37

            33Naglaog giraray si Pilato sa palasyo, inapod si Jesus saka hinapot, “Ika an hade kan mga Judio?”

            34Nagsimbag si Jesus, “Sadiri mong hapot iyan o igwa nin nagtaram saimo dapit sako?”

            35Nagsimbag si Pilat, “Ano ako Judio?  An mga kahimanwa moa sin an mga poon na padi an nagdara saimo digdi sako.  Ano an ginibo mo?”

            36Nagsimbag si Jesus, “An kahadean ko bakong sa kinaban na ini.  Kun an kahadean ko yaon sa kinaban na ini, nakilaban nkutana an mga sorogoon ko nganing dai ako ikatao sa mga Judio.  An kahadean ko bakong sa kinaban na ini!”

            37”Kun siring, hade ka palan?” an hapot ni Pilato.

            Nagsimbag si Jesus, “Ika an nagsasabi na saro akong hade.  Namundag ako asin nagdigdi sa kinaban sa pagtaram dapit sa katotoohan.  An siisay man na nasa katotoohan naghihinanyog sako.”

Refleccion Personal:

            Na an Kagurangnan Jesu-Cristo Hade kan bilog na Kinaban clarado mga babasahon ngonian na Domingo Cristo Rey.  Sabi sa Enot na Babasahon, Daniel capitulo 7: 14Tinawan siya nin awtoridad, onra saka kapangyarihan na maghade, tanganing paglingkodan siya kan mga tawo sa gabos na nasyon, rasa asin lengwahe.  Magdadanay an saiyang awtoridad, asin mayo nin kataposan an saiyang kahadean.  Pangadyi kan Salmo 93: 1Hade an KAGURANGNAN.  Siya nagugubingan nin Kamahalan asin kosog.  Masarig an namumugtakan kan Kinaban Asin dai matatanyog.  Pasunod man kan Ikaduwang Babasahon, Kapahayagan capitulo 1: 8”Ako an Alfa asin Omega,” an sabi kan Mapangyaring Kagurangnan Dios-an Dios ngunyang, kaidto, asin sa madatong pang panahon.  Asin nadangog ta sa Evangelio segun San Juan, capitulo 18: 37”Kun siring, hade ka palan?” an hapot ni Pilato.  Nagsimbag si Jesus, “Ika an nagsasabi na saro akong hade.  Namundag ako asin nagdigdi sa kinaban sa pagtaram dapit sa katotoohan.  An siisay man na nasa katotoohan naghihinanyog sako.”

            Tunay na clarado na sa pagbasa asin pag-adal ta sa mga tataramon na ini, daing duda man nanggad na si Jesu-Cristo hade.  Ngonian maghapot kita: anong klaseng hade Siya?  Dai niato Siya maipaparejo sa mga kahadean kan kinaban na ini, ta aram ta na an mga hade kan kinaban na ini puro sana sa mga bagay na kinabanon an saindang paghingoha.  Bihirahon an naging hade na sa espiritual an naging prioridad.  Halos gabos sinda poder, cuarta, exito, kasikatan asin kasiraman an hininguha mantang nagrereynar sinda sa daga.

            Iyo ngani ini an hapot kan saro kan satuyang mga ginagalangan na kapadian, Monsignor Augusto Laban, anong klaseng hade si Jesus?  Bako lang kan kinabanon na mga bagay, Hade man Siya kaiyan, pero lalong lalo na Hade si Jesus Kagurangnan kan mga bagay-bagay na espiritual.  Iyo ini an Hade kan Universo, si Jesu-Cristo Rey del Universo: Juan capitulo 19 versiculo 5: Nagluwas si Jesus na nakokoronahan nin tonok saka nagugubingan nin purpura.  Sinabihan sinda ni Pilato, “Uya an lalaki!”  Asin ini pa: versiculos 14 hasta 16: Mag-aalas dose nan in odto kaidto kan bisperas nin Paskwa.  Nagsabi si Pilato sa mga Judio, “Uya an hade nindo!”  Alagad nagkurahaw sinda, “Gadanon siya!  Gadanon siya!  Ipako siya sa krus!”  Hinapot sinda ni Pilato, “Boot nindong ipado ko sa krus an saindong hade?”  Nagsimbag an mga poon na padi, “Mayo kami nin ibang hade kundi si Cesar!”  Pakatapos, itinao ni Pilato si Jesus sainda nganing ipako sa krus.

            Si Cristo Hade koronang tonok an nasa saiyang payo, gubing na purpura kan Saiya mismong dugo, an trono Niya iyo an Cruz!  Salamat sa koronang ini, sa purpura na ini, sa Cruz na ini, kita gabos na-salvar.  Nagin kitang mga libre sa kasalan, nahaw-as kita sa karigsokan, nagin kitang mga aki nin Dios-mga aki kan tunay na Hade.  Nagsakit ki kadiit, kamurawayan man na daing katapusan an nakamit sa Saiya asin sa satuya gabos na nagtutubod Saiya.  Ngonian, ano an makukua ta sa sarong hade kan kinaban sana na ini?  Anong makukua ta sa hade na puro lang cuarta, poder, kasikatan asin siram an maw-ot?  Anong makukua ta sa sarong hade na puro lang material na bagay an maw-ot asin dai pakiaram sa bagay-bagay na espiritual ta kino-considerar na inutil, daing data?  Iyo ini an makukua ta: karigsokan!  Kasakitan!  Kamatayan!  An siram ngonian, an daing tapos na pagdusa atchan.

            Si Cristo Hade kan Universo.  Mag-reynar lugod Siya sa buhay ta!  Bako an cuarta, poder, kasikatan o siram kundi an Cruz na tunay na nagliligtas!  An gusto ta na maghade sa buhay ta iyo an Dios, bako an mga dios-diosan!  Magsakit man kita ngonian sa buhay na ini, aram ta man na dakula an satuyang balos, que sa magpasiram-siram na ngonian asin daing katapusan man na pagdusa atchan.

Ika-33 na Domingo kan Ordinaryong Panahon, Taon B

Ika-33 na Domingo kan Ordinaryong Panahon

Taon B

18 Noviembre

Sts. Peter and Paul Cathedral Parish

Daniel 12:1-3

            1Nagtaram an anghel na nakagubing nin lino, “Sa panahon na iyan matunga an dakulang anghel, si Miguel, an anghel na nagsusurog kan saimong banwaan.  Dangan magkakaigwa nin kasakitan, na dai pa lamang nangyari magpoon kan magkaigwa nin mga nasyon.  Pag-abot kan panahon na iyan, an gabos na tawon ang ngaran nasusurat  sa libro nin Dios maliligtas.  2Mabubuhay giraray an kadalan sa mga gadan na; an angkapira mabubuhay sagkod pa man, mantang an iba magtitios nin daing kataposan na kasosogpagan.  3An mga madonong na lider magliliwanag siring sa panganoron, asin an mga nagtukdo sa mga tawo na maggibo kan tama magliliwanag sagkod lamang siring sa mga bitoon.”

Salmo 16:5,8-11

            5An KAGURANGNAN iyo an sakong

                        Kalis asin piniling kahirasan;

            An sakong buhay saiyang

                        Nakakaptan.

            8An KAGURANGNAN namamatean

                        Kong danay na harani sako;

            Harani siya, asin mayo nin

                        Makakatanyog sako.

            9Kaya nag-oogma an sakong puso

                        Asin kalag;

            Nasa katiwasayan man an sakong

                        Hawak,

            10Huli ta dai mo ako itinatao sa

Kagadanan,

            Asin an saimong namomotan dai

mo pinapabayaan sa lulubngan.

            11Ipinapahiling mo sako an dalan

                        Nin buhay;

            Sa saimong atubang yaon an

kapanoan nin kaogmahan,

            Sa too mong kamot yaon an kaogmahan sagkod lamang.

Hebreyo 10:11-14,18

           

            11An lambang padi naglilingkod aroaldaw dangan nagdodolot kan parehong sakripisyo sa dakul n beses.  Alagad an mga sakripisyong ini dai nanggad makakapara kan mga kasalan.  12Alagad si Cristo nagdolot para sa mga kasalan nin saro sanang sakripisyo na nagdadanay sagkod laman.  Pakatapos, nagtukaw siya sa too nin Dios.  13Duman naghahalat siya sagkod na an saiyang mga kaiwal gibohon nin Dios na tungtongan kan saiyang mga bitis.  14Sa paagi nin saro sanang atang, ginibo niyang banal sagkod lamang an mga nalinigan.

            18Kaya kan an mga kasalan ipatawad na, dai na kaipuhan an mga dolot sa paghale kan mga kasalan.

Marcos 13:24-32

            24”Pakalihin kan panahon nin kasakitan, madiklom an aldaw, dai na maliwanag an bulan, 25 mahuhulog an mga bitoon hale sa langit asin makakayorogyog an mga kapangyarihan sa kalangitan.  26Dangan mahihiling nindang maabot an Aki nin Tawo na nasa panganoron, may dakulang kapangyarihan saka kamurawayan.  27Susugoon niya an mga anghel tanganing tiponon an mga tawong pinili hale sa apat na kanto kan kadagaan poon sa sarong poro kan kinaban sagkod sa ibong na poro.

            28”Manodan logod nindo an adal kan kahoy na higera.  Kun an mga sanga kaiyan magin lumbod, dangan nagdadahon na, aram nindo na harani na an tig-init.  29Siring man, kun mahiling nindong an mga bagay na ini nangyayari na, aram nindo na madali na siyang mag-abot, yaon na siya sa trangkahan.  30Sa katotoohan sinasabihan ko kamo, mangyayari an gabos na ini bago magadan an henerasyon na ini.  31Mapapara an langit asin an daga, alagad dai mapapara an sakong mga tataramon.

            32”Mayong nakakaaram kun nuarin maabot an aldaw o an oras na mangyayari iyan, ni sa mga anghel sa langit, ni an Aki nin Dios kundi an Ama sana.

Personal Reflection:

Namate ko sarong aldaw ining pangadyi kan sarong gurang na padi.  Kagurangnan, sabi niya na sobra na cincuenta años sa servicio bilang padi, sabi niya, salamat sa buhay na itinao mo sako.  Salamat sa vocacion sa pagkapadi na dakulaon mo na regalo sa sako mismo asin sa bilog na Simbahan.  Patawada ako kan gabos kong kasal-an asin kan gabos kong pagkukulang sa sako mismo, sa kapwa ko, lalong lalo na Saimo.  Ngonian na ako gurang na, naghahalip-ot na an aldaw asin naghahalaba na an banggi, nagrararom na an dulom asin an sakong lawas nagluluya na, tabangi ako na maitao pa man giraray saimo an intiro ko.  Maski na dikit na sana, maggibo pa man giraray an mga gusto Mong ipaggibo mo sako.  Maski dikit na sana, itao ko pa man giraray sa kapwa ko an ano pa man na maitatao ko sainda, sa sakong oras, talento asin kayamanan.  Bilog na buhay ko hanggang sa katapusan inaalay ko Saimo o Dios asin sa Simbahan.

Tunay na an perspectiva kan kagadanan nagpapaiba sa perspectiva kan tawo: dahil naiiisip niato an kataposan mas nagiging maimbod kita sa Dios, mas nagiging mamomot-on kita sa satong kapwa lalong lalo na an mga tawo na ikinaag nin Dios sa satong paligid, mas nagiging maingat kita sa satong mga sadiring hawak asin kalag.  An perspectiva kan kagadanan nagpapatanos sa satuyang pag-iisip asin pagboot.  Cada vez en quando marhay man sa satuyang buhay espiritual na sa impaginacion taw-an ki taning an satuyang buhay.  Kun kita may taning na asin sinabihan na sa masunod na taon kita magagadan na, bako maghahanda na kita para sa katapusan?  Kun kita tinawan na sana ki 6 meses sa pagkabuhay, bako magpapasiguro na kita kan mga namomot-an ta asin papasiguraduhun naman niato an satuyang sadiri lalo na sa espiritu para sa pagdatong kan pag-juzga sa satuya?  Kun kita sa aga na magagadan, bako mag-iiba an satong perspectiva sa buhay?  Tunay na wara nakaaram kun san-o kita magagadan.  Puede niato sabihon na bako importante na maaraman ta an mga ini, an importante na andam kita.  Aro-aldaw dapat andam kita.  Lugod preparado kitang mag-render cuenta sa Dios kan satong buhay.

            Ngonian mga tugang na ika-33 na Domingo kan Ordinaryong Panahon, an mga Tataramon kan Dios nagtataram na manunongod sa mga urhing mga bagay: kagadanan, premio, castigo, pagtios, asin kamurawayan.  Sa satuyang kaakian, ta mga aki pa asin makusog pa asin malaksi pa an mga hiro, an mga bagay an urhi bako naglalaog sa satuyang mga consideraciones sa buhay.  Kaya ta gabos.  Gabos naaabot niato.  Warang imposible.  Pero tunay na halip-ot an buhay kan tawo asin asin 20 años di niato namamalayan naging 80 na palan asin an satong awong kulubot na, an tuhod maluya na asin an likod kuba na.  Nag-iiba an satong perspectiva, asin puede sabihon kita mas nagiging madonong sa kadonongan na marhay kan mga gurang.  An satong experiencia nagsasabi na sa satuya na totoong may mga bagay na dapat gibohon asin may mga bagay na dapat likayan.

            Mga tugang kun kita ngonian gurang na asin bako na harayo an satuyang kagadanan, ano kaya an satong pangadyi?

            

PERSONAL REFLECTIONS IN BICOL Taon B Tiempo Ordinario ika-31 na Semana

            Sabi kan Pseudo-Jerome, sarong Padre de Iglesia, ini daw na simbag kan Kagurangnan sa Fariseo na naghapot sa Kaniya kun arin sa mga Katogonan an pinaka-importante, ini daw na simbag maihahambing sa duwang sinusuan ta sa satuyang mga ina kan kita mga aki pa.  Kamotan an Dios, asin kamotan an kapwa.  Sa mga tugon na ini kita nabubuhay asin nagiging banal, harani sa Kagurangnan.  Duwang mga tugon parejo kan duwang sinusuan ta na nagpakusog sa satuya hanggang sa ngonian na kita darakula na.

 ----------------------------------------------------------------------------------------------------------------------

            Sabi man ni Theophilact, saro man na Padre de Iglesia, na iba iba daa an boot sabihon kan sa bilog mong puso, sa bilog mong kalag, sa bilog mong isip, asin sa bilog mong kosog.  Sa bilog mong kalag daa boot sabihon gabos na satuyang mga namamatean asin sentimiento, sa gabos na ini ipahiling ta an pagkamoot niato sa Kagurangnan.  Sa bilog mong puso boot daa sabihon an gabos niatong hawak, sa paagi kaini ipahiling ta Saiya an satong pagkamoot.  Sa bilog mong kusog daa boot sabihon an gabos na kapangyarihan kan satong hawak, sa paagi kan satong hawak ipahiling niato Saiya an satong pusong namomoot.

 ----------------------------------------------------------------------------------------------------------------------

            May pagka-tragico an pagkamoot kan tawo.  Daghang veces, o puede ngani sabihon na pirmi, ining pagkamoot umano na ini nauuli sa wara, sa kawaraan, sa pagkabigo, sa maraot.  Magmoot ka, bako ka man momooton.  Magmoot ka, may iba na.  Magmoot ka, nagadan na an saimong minomotan. 

            May pagka-tragico man an pagsamba kan tawo ngonian.  Iba-ibang dios diosan na an satuyang mga sinasamba.  An cuarta.  An poder asin an exito.  An mga kasiraman sa buhay.  Puro nauuli sa wara.  An cuarta nauubos, an poder asi an exito nawawara, an mga kasiraman sa wara-wara man.

            An tawo tragico.  Naabot sa wara, sa kawaraan.  Pati existencia niya, pagkatapos sin setenta o ochenta años an tawo tol-ang na, abo na sana, wara na.  An kahapon wara na.  An sa aga wara pa.  An niyan man yaon pa sana wara na naman.

            An Dios lang an nagpapano sa satuya.  Siya an tunay marhay na exito kan satuyang istorya kan pagkamoot.  Siya an tunay na dapat sambahon.

            Kun bako kita namomoot sa Dios an gabos na satuyang pagkamoot sa mga bagay-bagay asin sa ibang tawo, parejo kan pagkamoot sa satuyang mga sadiri, tunay na gabos ini daing pakakadtohan asin sinda magigin mga pagkamoot na mga tragico.  Sa wara maduman.  Sa kawaraan an kataposan.  Iyo an experiencia kan tawo asin iyo an nagiging experiencia ngonian kan humanidad na nalilimot na sa Dios asin nabubuhay na bagan wara Dios.  Mamundoon.  Makaheherak an tawong dai namomoot sa Dios.

            Kun bako kita nagsasamba sa Dios asin an sinasamba niato sana iyo ining mga dios-diosan, gabos daing sentido asin tragico an buhay kan tawo.  An mapagal pa kaini ta puedeng maging violente an tawong daing Dios.  Iyo baga an nahihiling ta sa TV asin namamate ta sa radio ngonian.  Nata an sarong daing laban na babae aarogon kaiyan kan duwang lalaking?  Nata an sarong nueve años na aki aarogon lang kaiyan kan mga kapwa niya menor de edad man na mga kaakian?  An tawo pag wara Dios menos pa sa tawo.  Menos pa sa hayop.  Dai na tawo an tawo kun wara an Dios.

            Mga tugang ini na Taon nin Pagtubod na pinonan kan bilog na Simbahan kan nakaagi na 11 de Octubre 2012 hanggang sa masunod na 24 de Noviembre 2013 iyo ining saro na paghiro kan Simbahan para ibalik an tawo sa Dios, para ibalik an pagkamoot sa Dios, an pagsamba sa Dios.  Lugod makisumaro kita sa paghingoha kan bilog na Simbahan na magbalik kita sa Dios, asin man humararom an satuyang pagtubod ta maadalan ta an mga dahilan kan satuyang mga tinutuban, para man maihiras ta sa iba lalong lalo na sa satuyang mga ka-familia asin mga nakapalibot sa satuya.

            O Dios, kun dai ka, dai man kami.  Kun dai ka, an tawo menos tawo.  Pero kun yaon ka, tunay na nagigin kaming mga tawong tatao mamoot nin tunay asin magsamba nin tunay.  Amen.

            

READINGS IN BICOL Taon B Tiempo Ordinario ika-31 na Semana

Deuteronomio 6:2-6

            2 Sa bilog nindong pagkabuhay, kamo sagkod an saindong kapagarakian dapat na matakot sa KAGURANGNAN na saindong Dios, asin magkuyog kan gabos niyang togon na itinatao ko saindo, tanganing maghalawig an saindong buhay.  3 Kaya dangoga nindo ini, mga Israelita, asin kuyogon nindo, tanganing mapakarahay kamo asin magdakul duman sa dagang matubang saka mayaman sa gabos na bagay, siring sa ipinanuga nin KAGURANGNAN, na Dios kan saindong mga ginikanan.

            4 “Dangoga, O Israel!  An KAGURANGNAN – asin an KAGURANGNAN sana – iyo an satuyang Dios.  5 Kamotan nindo an KAGURANGNAN na saindong Dios sa bilog nindong puso, sa bilog nindong kalag, asin sa bilog nindong kosog.  6 Dai nanggad nindo paglingawan an mga pagboot na ini na itinatao ko saindo ngunyan.

Salmo 18:2-3,3-4,46,50

            2 An KAGURANGNAN iyo an sakong

                        Parasurog;

            Sakong pailihan, sakong

                        Paratubos.

            An sakong Dios, gapo na sakong

pailihan;

            sakong kalasag, sakong katabang,

                        sakong bantayan.

            3 Minaapod ako sa KAGURANGNAN,

                        Asin iliniligtas niya ako sa sakong mga kaiwal.

            Pag-omawon an KAGURANGNAN!

            4 Napalibotan ako kan mga pisi nin

                        Kagadanan;

            Duminagsa sako an mga alon nin

                        Pagkaraot.

            46 An KAGURANGNAN buhay!

                        Pag-omawon an sakong

                        Parasurog!

            Irukyaw an kadakulaan nin Dios

                        Na nagligtas sako.

            50 Darakulang panggana, itinatao

                        Niya sa saiyang hade,

            Danay na pagkamoot an

                        Ipinapahiling niya sa saiyang

                        Linalahidan,

            Ki David asin sa kapagarakian

                        Kaini sagkod pa man.

Hebreyo 7:23-28

            23 Igwa nin saro pang kalaenan: dakul an nagin padi dahel ta nagagadan sinda asin dai nakakapadagos kan saindang trabaho.  24 Alagad huli ta si Jesus nabubuhay sagkod lamang, an saiyang pagkapadi yaon saiya sagkod pa man. 25 Ngunyan asin sa gabos na oras, ikakaligtas niya an mga minadolok sa Dios sa paagi niya, hulit ta nabubuhay siya sagkod lamang tanganing makimaherak sa Dios para sainda.

            26 Kaya si Jesus iyo an Halangkaw na Padi na makakasimbag kan satong mga pangangaipo.  Banal siya, mayo nin digta o karatan; dai kabilang sa mga parakasala, ilinangkaw siya sa itaas pa kan kalangitan.  27 Bako siyang arog kan ibang mga halangkaw na padi na kaipuhan pang magdolot nin atang aroaldaw; enot para sa sadiri nindang kasalan, dangan para sa kasalan nin mga tawo; mantang si Jesus sarong beses sanang nag-atang para sa gabos – iyan kan idolot niya an sadiri niyang buhay.  28 An pinipili kan Katogonan ni Moises na magin halangkaw na padi iyo an mga tawong igwa nin kaluyahan, alagad an panuga na sinumpaan nin Dios, na nangyari pakatapos niyang itao an Katogonan, iyo an nagpili sa Aki na ginibong banal sagkod lamang.

Markos 12:28-34

            28 Igwa duman nin sarong partukdo kan Katogonan na naghihinanyog kan orolay.  Nahiling niya na marahay an mga simbag ni Jesus sa mga Saduceo, kaya nagdolok man siya ki Jesus dangan naghapot, “Arin na togon an pinakamahalaga?”

            29 Nagsimbag si Jesus, “An pinakamahalagang togon iyo ini: ‘Dangoga, Israel!  Saro sana an Dios na satong Kagurangnan.  30 Kamotan mo an Kagurangnan mong Dios sa bilog mong puso, sa bilog mong kalag, sa bilog mong isip, asin sa bilog mong kosog.’  31 An ikaduwa iyo ini: ‘Kamotan mo an saimong kapwa arog kan pagkamoot mo sa saimo man sana.’  Mayo nin ibang togon na mas mahalaga pa ki kan duwang ini.”

            32 Nagsabi ki Jesus an paratukdo kan Katogonan, “Tama ka, Maestro’ tama an sinabi mo na saro sana an Kagurangnan na Dios, asin mayo nang iba.  33 Kaipuhan kamotan kan tawo an Dios sa bilog niyang puso, bilog niyang isip asin kosog; kapuhan kamotan niya an saiyang kapwa arog kan pagkamoot niya sa saiya man sana.  An duwang togon na ini mas mahalaga ki kan arin man na dolot asin mga tinutong na ata.”

            34 Pagkadangog ni Jesus kan marahay niyang simbag, nagsabi siya, “Bako kang harayo sa Kahadean nin Dios.”

            Pakatapos kaini, mayo nang nangahas pang maghapot ki Jesus.