Year B Ordinary Time 30th Sunday Personal Reflection

            Kagurangnan, salamat ta kami nakakahiling.  Tinawan mo kami nin mata para sa pagbuhay niamo aro-aldaw.  Para sa samong pagtrabaho sa daga, sa dagat asin sa kapalibutan.  Para sa samuyang karahayan.  Para sa paghiling niamo sa kagayonan kan mga ginibo Mo para sa samuya: an kinaban asin an gabos na laman kaini.  Para sa pag-apreciar niamo kan gabos na mga katawohan na pinalibot mo sa samuya: an samong familia asin gabos na harani sa samuyang puso.

            An caso Kagurangnan kami may mga mata pero dakulon na veces kami nabubuta.  Salamat Saimo ta nagagamit niamo an samuyang mga mata, pero naghahagad kami kapatawaran Kagurangnan sa mga veces na dai niamo nahihiling an tama sa sala, an dapat sa dai dapat, an dapat gibohon sa dai dapat gibohon.  An samuyang kaluyahan asin samuyang mga kasalan an nagpapaluya kan samuyang mga mata espiritual.  Naglulubog an mga ini asin kami nabubuta.

            Bako lang kami nabubuta manongod sa samuyang personal na situacion.  Kami nabubuta man sa kaipuhan kan iba.  Sa kaluyahan asin sa mga kasalan niamo napapasipara mi man an mga kaipuhan kan samuyang mga tugang na ipinalibot mo man samuya para na ngani samuyang matabangan kutana.  Nahihiling lang niamo an samuyang mga kaipuhan asin mga kagustuhan pero an saindang mga necesidades samuyang nababalewala.

            Kagurangnan, kaheraki kami sa mga pagkukulang na ini.  Asin patawada kami.  Nagkukurahaw kami ngonian siring na nagkurahaw sa Evangelio ni Marcos an buta na si Bartimeo.  Kagurangnan, logod makahiling kami.  Kami mga buta, bakong buta sa mga mata kundi sa samuyang mga puso.  Kami mga buta sa samuyang personal na situacion.  Kami mga buta sa kaipuhan kan mga dukha.  Kagurangnan, pahilinga kami.

            Cada vez na may mag-coreger sa samuya ta kami nasasala maski na ini makulog tanggapon asin mapait inomon, cada vez na may nagpapahiling sa samuya manongod sa mga bagay-bagay na napapasipara niamo, cada vez na tinatabangan kami nin iba sa saindang pagmakulog, Kagurangnan tawi kami nin puso na mapakumbaba asin tatao mag-ako kan mga ini bilang hale Saimo asin magpasalamat pa ngani sa mga corecciones.

            Pasabongan mo kami Kagurangnan sa samuyang buhay asin sa samuyang pagpamibi kun saen kami tama asin kun saen kami nasasala.  Giyahan mo kami sa tunay na tama na dalan.  Ipahiling mo samuya Kagurangnan kun ano an dapat asin kun ano an bako dapat.  Siring man taw-an Mo kami ki kusog, kan Saimong gracia para maggibo niamo an dapat gibohon, para likayan mi an dapat likayan, para mahiling niamo an mga dapat niamong mahiling.

            Kagurangnan, logod kami makahiling.  Finalmente logod mahiling mi Ika sa langit pagdatong kan panahon na dai na kami makahiling digdi sa ibabaw kan daga.  Amen.

Year B Ordinary Time 30th Sunday READINGS in Bicol

READINGS in Bicol

Jeremias 31:7-9

7 Nagsabi an KAGURANGAN,

“Mag-awit kamo sa kaogmahan

                        Para sa Israel,

An pinakadakula sa mga nasyon.

Mag-awit kamo kan awit nin

pag-omaw,

            ‘Ilinigtas nin KAGURANGNAN an

                        Saiyang banwaan,

            An mga natada sa Israel.’

8 Dadarahon ko sinda hale sa

                        Amihan

            Saka titiponon hale sa mga poro

                        Kan kinaban.

Magigin kaiba ninda an mga buta

                        Saka mga pilay,

            An mga bados asin an mangangaki

                        Na.

Mabalik sinda na sarong dakulang

                        Nasyon.

9 Nagtatangis na mabali an sakong

                        Banwaan;

            Namimibi mantang sakong pinapangenotan.

Dadarahon ko sinda sa mga sapang

                        May tubig,

            Sa sarong patag na agihan

                        Tanganing dai sinda madapa.

Hulti ta saro akong ama para ki

                        Israel

            Asin si Efraim an aki kong matua.”

Salmo 126:1-2.2-3.4-5.6

Kan ibalik nin KAGURANGNAN an

kayamanan nin Sion,

            nakabaing kita sa mga

                        nangatorogan!

2 Dangan napano kita nin

                        Kaogmahan,

            Nag-awit sa kagayagayahan.

Dangan nagsabi an ibang nasyon

                        Manongod sato,

            “Dakulang mga bay an ginibo

                        Sainda nin KAGURANGNAN.”

3 Dakulang mga bagay an ginibo

                        Niya para sato,

            Kaya kita maogma!

4 Tawe kami giraray nin kauswagan,

                        KAGURANGNAN,

            Siring na an uran nagtatao nin

                        Tubig sa mamarang mga salog.

5 An mga minasabwag  na

                        Nagluluha,

            Mag-ani logod na maogma.

6 An mga naghihibi mantang

                        Minaluwas dara an mga banhi

                        Na isasabwag,

            Mabalik na nag-aawit sa

                        Kaogmahan,

            Dara an saindang inani.

Hebreyo 5:1-6

            An lambang halangkaw na padi, na napili hale sa mga tawo, pinili tanganing maglingkod sa Dios para sainda.  Siya an madolot nin mga regalo saka mga sakripisyo para sa saindang mga kasalan.  2 Mahuyo niyang matitios an mga mangmang saka an mga nalalagalag huli ta siya igwa man nin mga kaluyahan.  3 Huli ta siya maluya man, dapat siyang magdolot nin mga sakripisyo, bako sana para sa mga kasalan kan mga tawo kundi para man sa sadiri niyang mga kasalan.  4 Mayo nin siisay man na minapili sa sadiri niya na magin halangkaw na padi, kundi an Dios an minaapod saiya siring kan pag-apod ki Aaron.

            5 Siring man dai pinili ni Cristo an sadiri niya na magin halangkaw na padi, kundi an Dios an nagpili saiya, kan sabihan siya,

            “Ika an sakuyang Aki,

            Ngunyan na aldaw nagin Ama mo

                        Ako.”

6 Sinabi man nin Dios sa ibang kabtang kan kasuratan,

            “Ika padi sagkod pa man,

            Sosog sa orden ni Melkisedek.”

Marcos 10:46-52

46 Nag-abot si Jesus sa Jerico kaiba an mga disipulo niya asin an dakul na tawo.  Kan naghahale na sinda duman, naagihan ninda an sarong makilimos na buta na nagtutukaw sa gilid kan dalan; siya si Bartimeo na aki ni Timeo.  47 Kan madangog niya na si Jesus na taga Nazaret nag-aagi duman, nagkurahaw siya, “Jesus, Aki ni David!  Kaheraki ako!”

48 Inanggotan siya kan dakul na tawo asin pinaalo; alagad orog siyang nagkurahaw, “Aki ni David, kaheraki ako!”

49 Nag-ontok si Jesus dangan nagsabi, “Padigdiha nindo siya.”

Kaya inapod ninda an buta asin sinabihan, “Pakosoga an boot mo!  Tindog, inaapod ka niya.”

50 Hinukas kan buta an saiyang alikboy paluksong nagtindog saka nagdolok ki Jesus.

51 Hinapot siya nin Jesus, “Ano an boot mong gibohon ko para saimo?”

Nagsimbag an buta, “Maestro, boot kong makahiling.”

52 Sinabihan siya ni Jesus, “Lakaw na; an saimong pagtubod iyo an nagpaomay saimo.”  Nakahiling tolos siya, asin nagsunod ki Jesus.

Year B Ordinary Time 27th Sunday

MASS READINGS:

Genesis 2:18-24

            18Dangan nagtaram an KAGURANGNAN Dios, “Bakong marhay na magsolo-solo an tawo.  Magibo ako nin sarong maninigong kaibahan niya na makakatabang saiya.”  19Hale sa daga ginibo nin KAGURANGNAN Dios an gabos na hayop asin gamgam dangan dinara niya an mga ini sa tawo tanganing ngaranan; an inginaran sainda iyo na an pag-apod sainda.  20Kaya nginaranan kan tawo an gabos na gamgam asin hayop alagad dai siya nakakua nin sarong maninigong kaibahan na makakatabang saiya.

            21Kaya pinatorog nin KAGURANGNAN Dios an tawo asin mantang torog pa ini, kuminua siya nin sarong gusok dangan isinara niya an laman.  22Guminibo siya nin sarong babae hale sa gusok asin dinara niya ini sa lalaki.  23Dangan nagsabi an lalaki,

            “Ini nagngag an tolang kan sakong toloang

            asin laman kan sakong laman.

            Aapodon siyang ‘Babae’ huli ta kinua siya hale sa lalaki.”

            24Kaya babayaan nin lalaki an saiyang ama saka ina dangan masaro sa saiyang agom na babae, asin sindang duwa magigin saro.

Salmo 128:1-6

            1Paladan an tawong may pagkataok sa KAGURANGNAN;

                        Na naglalakaw sa saiyang mga dalan.

            2Kakakanon mo an bung akan saimong kapagalan;

                        Magigin maogma ka asin magkakaigwa nin kauswagan.

            3An saimong agom makakaarog sa ubas na namumunga sa laog nin saimong harong,

                        Asin an saimong kaakian makakaarog sa sadit pang mga kahoy na oliba

sa palibot kan saimong lamesa.

            4Siring kaiyan kapaladan an tawong natatakot sa KAGURANGNAN.

            5Bendiysonan ka logod nin KAGURANGNAN hale sa Sion!

                        Mahiling mo logod an pag-uswag nin Jerusalem

                        Sa bilog mong pagkabuhay!

            6Mahiling mo logod an mga aki kan saimong kaakian!

                        An kataoninonga mapasa-Israel!

Hebreyo 2:9-11

            9Alagad nahihiling ta si Jesus, na sa dikit na panahon ginibong mas hababa ki sa mga anghel, tanganing sa paagi kan biyaya nin Dios, magadan siya para sag abos na tawo.  Ngunyan nahihiling ta siyang nakokoronahan nin kamurawayan asin kaomawan huli kan kagadanan na tinios niya.  10Maninigo na an Dios, na para saiya asin huli saiya an gabos nagkakaigwa nin buhay, iyo man an magpabanal ki Jesus sa paagi nin pasakit, tanganing madara niya an dakul na tawo sa kamurawayan.  Huli ta si Jesus an nangengenot sainda pasiring sa kaligtasan.

            11Huli ta siya an naglilinig sa mga tawo kan saindang kasalan saka an mga nalinigan na igwa nin sarong Ama.  Kaya dai nasosopog si Jesus na apodon sindang tugang.

Markos 10:2-16

            2Nagduman an nagkapirang Fariseo.  Boot nindang pataluksohon siya sa paagi nin paghapot, “Tugot daw kan satong Katogonan na suhayan kan lalaki an saiyang agom?”

            3Sinimbag sinda ni Jesus, “Ano an pagboot na itinao ni Moises saindo?”

            4Nagsimbag sinda, “Itinugot ni Moises na suhayan kan lalaki an saiyang agom pakatapos na maggibo nin kasuratan nin pagsuhay.”

            5Sinabihan sinda ni Jesus, “Nagusrat si Moises kaining togon para saindo huli sa katagasan kan payo nindo.  6Alagad sa kapinonan nin paglalang, isinabi ini, ‘Linalang nin Dios sindang lalaki asin babae.  7Huli kaini, babayaan kan lalaki an saiyang ama asin ina, masaro sa agom niya, 8dangan sindang duwa magigin saro.’  Kaya bako na sinda duwa, kundi saro.  9Kaya dai dapat pasuhayon nin tawo an pinagsaro nin Dios.”

            10Pag-abot ninda sa harong, hinapot giraray si Jesus kan mga disipulo dapit kan bagay na ini.  11Sinabihan sinda ni Jesus, “An lalaking magsuhay sa agom saka umagom nin iba, nagkakasala nin adultery sa saiyang agom; 12siring man an babae na magsuhay sa agom niya dangan magpaagom sa iba, nagkakasala nin adultery.”

            13May nagkapirang tawo na nagdara nin mga aki ki Jesus tanganing saiyang bendisyonan; alagad sinaway sinda kan mga disipulo.  14Kan mahiling ini ni Jesus, naangot siya asin sinabihan sinda, “Pabayae nindong magdolot sako an mga aki!  Dai nindo sinda pag-olangon, huli ta para sa mga arog sainda an Kahadean nin Dios.  15Sa katotoohan sinasabihan ko kamo, an siisay man na dai umako kan Kahadean nin Dios siring sa aking sadit dai nanggad makakalaog dyan.”  16Dangan kinugos niya an mga aki, saro-sarong benendisyonan sinda sa paagi kan pagbugtak kan kamot niya sa ibabaw kan payo ninda.

PERSONAL REFLECTIONS:

            Dakulon na ngonian an satuyang mga tugang na mag-aragom an nagbuburulag.  Kun kaidtong panahon saro iyan na taboo, saro na bagay na ni sa pag-orolay-olay pigbabanggit.  Ngonian maski sa tv asin radio di na sorpresa asin di naman escandalo na madangog ta.  Naabot ngani sa punto na bako lang kino-considerar ini na nangyayari, sala pero nangyayari, a fact of life, kundi kino-considerar na na normal, nangyayari asin ok lang na mangyari, another fact of life.

            Clarado para sa satuya mga Cristiano Catolico, mga taga-sunod ni Cristo, na an kasal sa babae asin lalaki, sarong babae, sarong lalaki, asin panghabang-buhay.  Ini an katukdoan Niya mismo sa Evangelio ngonian na ika-27 na Domingo kan Ordinaryong Panahon sa Markos capitulo 10.  Si Jesus, bag-ong Adan asin bag-ong Moises, binabase gabos sa kapinon-an kan panahon.  Sa Primerong Babasahon Genesis capitulo 2, sa kapinonan mismo, nasasabi na an babae asin lalaki ginibo para sa cada saro, sarong babae asin sarong lalaki, asin sinda magigin sarong carne, sarong laman sana.  Kun si Moises man nagtugot na tawan kan lalaki kasuratan kan divorcio an saiyang agom, ini dahil sa matagas na puso kan tawo na hindi nagpapatawad.  Sabi ni San Agustin, sa totoo, si Moises man mismo contra sa paghiwalay, sa divorcio.  Kaidtong panahon an pagsurat kan contrata sa Hebreyo dapat gibohon kan mga escriba, kaya an gusto mag divorcio kaipuhan magduman sa mga escriba na bag-o magsusurat kan contrata sa paghiwalay maghihingoha na pabag-ohon an boot asin puso kan lalaki para bumalik sa babae.  Pagsasaroon ulit sinda, pababalikon ulit sinda.  Kun talagang wara na pag-asa, asin naggibo na an gabos na puedeng gibohon, saka sana masurat an escriba kan contrata kan hiwalayan.  Maski sa panahon ni Moises, binabawal man an divorcio.  Pero ngonian kina-claro ni Jesus Kagurangnan, na bawal maski iyan, na sa kapinonan tunay na an kasal daing hiwalayan.

            Saro na dakulaon na argumento contra divorcio, contra hiwalayan, iyo an kamutangan kan mga kaakian.  Dahil sa dakulon na an mga naghihiriwalay ngonian, maski digdi sa Sorsogon, dakulon na man an mga caso kan mga kabataan na napapariwara: natutumba sa vicio, di na nageerescuela, atab nag-aasawa, nagdodroga, nagagadan.  Ipaabot ta ngonian sa mga sa mga lola asin lolo, tita asin tito, ninang asin ninong na nagsasalo sa mga kabataan na ini asin natatabangan sinda na makua an tama na dalan an satuyang dakulaon na pasasalamat.  Pero dakulon man giraray an napapariwara, asin mateon mo sinda, hilingon mo an saindang situacion, asin ikaw mismo makasabi na an mga nangyayari na bakong marhay sa buhay kan mga kaakian na ini bako man ninda sana sala.  Na dakula na parte kan sala sa satuya, sa mga magurang.  Mahapot kita: saen an mga magurang kaining mga kaakian na napapariwara?  Tunay na bako man garantia an pag-upudan kan mag-asawa para maging matanos an mga kaakian, pero tunay na dakulaon na elemento an pagkamoot asin pag-upudan kan mag-asawa para sa katanosan kan kaakian habang aki pa sinda hanggang sa pagdakula ninda.

            Bako tang pignenegaran an kasakitan asin challenges kan pag-agom, kaya ngani baga sa Ikaduwang Babasahon sa Hebreyo 2 sinasabi kan Kagurangnan satuya na an pagtios parte integral kan buhay.  Sa paagi na bako niatong maintiendihan ki completo nakatabang an satuyang pag-ofrecer kan pagtios sa Kagurangnan para sa katanosan kan satuyang buhay.  Si Jesus mismo sa pagtios Niya sa Cruz kita gabos nailigtas.  Bako dahil nagtitios kita burulag na.  Bako dahil may kadificilan ngonian asin may mga problema an mag-agom burulag na.  Bako dahil ngonian bagan wara na savor an pag-upudan burulag na.  Paano na ang kahapon, nalimutan mo na ba ang inyong mga matamis na sandali, ang inyong mga matamis na oo.  At paano na ang bukas, sigurado na ba kayo na ang bukas ay wala nang pag-asa at iwawaksi niyo na ang ngayon at itatapon niyo na ang kahapon.  Kaya mga tugang lugod tunay na ipagdefender niato gabos na an kasal sa babae asin lalaki, panghabang-buhay.  Ini dahil sa kapinonan arog na kaiyan, dahil sa plano kan Kagurangnan iyan an makakatabang sa satuya, asin sa karahayan kan mga kaakian asin kan mag-agom mismo.  Amen.